1 Ame kuna kumutantera ghushili mwa Kristus. Liywi lyande lyamumutjima kuna kara ghumbangi wande mumpepo yakupongoka, ashi vino nakughamba kapishi vipempa, 2 Mushima wande ghuna kara naliguvo ntani rutu rwande kuna kukora unene. 3 Ame ko naghumwande kuna shana nukare mulifingo lyaKarunga nutunde mwaKristus, ntjeneshi mbyo vyakuvhura kukwafa muhoko wetu. 4 Vavo mbo va Israeli. Vavo mbo atoghorora Karunga vakare vana vendi, mbyo avapa ghuyerere wendi, mbyo avapa likukwatakano kumwe naye, mbyo avapa veta naghukareli Karunga, ntani mbyo avapa matumbwidiro ghendi. 5 Vavo mbo ruvharo atoghorora Karunga omo atundilira Kristus parutu-ghuye ndje mupangeli wanavintje. Ghuye vamutange naruntje na naruntje. Amen. 6 Ano ngoli kapi tuna kutanta ashi nkango daKarunga kapi datikiliramo. Mbyovyo shi kapishi vantu navantje ovo atoghorora Karunga kwatunda muva Israeli. 7 Ndi kapishi navantje vatundo ovo vatundo muruvharo rwa Abrahamu ngava kara vana vendi. Nane ngoli,'' Mbovo tupu vatundiliro muruvharo rwa Isaak tupu mbo vatumbwidira ruvharo rwendi.'' 8 Kutanta shi, Ovo vashampuruka parutu vavo kapishi mbo vana vaKarunga. Nane ngoli mbovo vashampurukira mumatumbwidiro ghaKarunga mbo vavarura ashi varuvharo rwendi. 9 Nkango damatumbwidiro ndodino ashi: '' Pashirugho shaweno kumwaka ghuna kuyoko nganika vyuka, nganiya wana Sara ana wana mukeke wamumati.'' 10 Kapishi mbyovino tupu, Rebeka naye kwashampurukire vana vamukafumu ghumwe tupu, Mukurona wetu Isaak- 11 Vavo vanuke shimpe nakuva shampurukashi vahana kuruwana vyaviwa ndi vyavidona, vino kwavirughanine mposhi shihoro shaKarunga shakutoghororapo ghumwe shitikemo, kapishi mukonda yavirughana, nane mbovo atoghororamo mwene- 12 ghuye kwatantilire Rebeka ashi,'' Mukurwa muntu ndje ngarughaneno munyendi.'' 13 Yira momu tupu vatjanga ashi: '' Ame kwahora Jacob, Esau kwamunyenga.'' 14 Weni omo tuvhura kughamba? Mwa Karunga mwato ghuhungami ndi? Hawe, kapishi mo ngoli. 15 Ghuye kwatantelire Moses ashi, ''Ame kufera nkenda ogho nahoro kufera nkenda, ntani ame kupakera shinka ogho nahoro kupakera shinka.'' 16 Mposhi vino kapishi kutwara mushihoro sha muntu, ndi kuviruwana vya muntu, nane ngoli kutwara mughufe nkrnda, wa Karunga mwene. 17 Yira momu atanta matjangwa kwa Farao ashi, ''Ame kwa kupa ghunene na mfumwa, na lighano ashi nkondo dande ngadi monekere mumoye, na lidina lyande ngli yuvikirepo mughudjuni naghuntje.'' 18 Mposhi, Karunga kufera nkenda waghu anahoro. 19 Ove ngaghu ghamba name ashi, ''Karunga ne vinke ana kushanena mapuko muvantu?'' 20 Are ghumwe ogho ashweno rumwe dimuragho dendi?'' Ove muntu, munke, wakuvhura kutomonona Karunga? shishitwa na kuvhurashi kupura mushiti washo ashi, ''Vinke wantulira nufane weno?'' 21 Mushongi lirova nane kapi akara na nkondo kulirova, ashonge vininke viviri kulirova limwe tupu, shimwe shakufumana. 22 Nangeshi Karunga, ndje oghu anahoro kushorora ugara ntani ghunankondo wendi ghuyivikwe, kukara mulididimiko mukuwapayika ugara walidjonaghuko? 23 Ghuye kwaruwana vino ayite ghuyerere wendi waghunene mumwetu atwe va mumarutu ogho apakeranga mbili, ghuye kwatu wapayika ngatutambure ghuyerere wendi? 24 Ghuye kwaruwana vino kukwetu, ovo ayita, muva Juda, ntani na vapagani? 25 Yira momu vatanta mumbapira ya Hoseya ashi: ''Vantu ovo vapiliro kukara muhoko wande nganu vatambura vakare muhoko wande, ntani ovo napilire kuhora nganu vatambura nashihoro. 26 Palivhango opo opo vatwenyanga ashi, 'Anwe kapishi muhoko wande, mpo ngava kamutwenya ashi 'Vana vaKarunga wa monyo.''' 27 Isaya kwakalire nakughamba vya kuhamena Israel ashi, ''Nampili ngoli shavuka shivaro sha va Israel yira musheke walifuta, vangapi tupu ngava paruko mo, 28 mbyovoshi Hompa kapi ngakukata-kata kutikitamo nkango dendi muno mughudjuni.'' 29 Yira momu tupu apumbire pamuhovo Isaya ashi, ''Hompa wa mbunga davakavita rwetu, ndi tuna kara yira varuvharo rwetu, ndi tuna kara yira Sodomu, ntani tufane yira Gomora.'' 30 Weni omo tuvhura kutanta? Nkwandi weno ashi vapagani, ovo vapiliro kukondjera ghuhungami, vawana ghuhungami, ghuhungami wa kutunda mulipuro. 31 Ano ngoli muhoko wa wa va Israel, ogho wa kondjeliro ghuhungami wa kutikita mo veta, kapi va yitikitiliramo. 32 Mukonda munke? mukondashi likondjero lyavo kapi valitamikire nalipuro, kwalitamikire naviruwana. Vavo ava punduka muliwe lya kupunduka, 33 yira momu vatjanga ashi, ''Ame nganutura liwe mu Siyoni liwe lya kupundukita liwe olyo ngali yapuro vantu. Ano ogho ngapuro kapi ngava mufita ntjoni.''