¹ Opo Jesus ghaghurumukire atunde kundundu, mbunga yayinene yamukwane ghuye. ² Makura muntu wavingondwe ayire kukwendi ntani atongaminine kughuto wendi,aghamba, ''Hompa, nange ghuvipanga, kuvura ghundenkite ame nikenge.'' ³ Jesus aghonyonona lighoko lyendi ntani amukwata ghuye, aghamba, ''Ame navipanga. Kena.'' Mpopo akenine kuvingondwe vyendi. ⁴ Jesus aghambire kwendi,''Kenga ashi ove nakuvighambashi kwakehe murwana. Yenda nandira yoye, kakuneghede naghumoye kuva pristeli, ntani katape ghushwi ogho amurawilire Moses, ngoghumbangi kukwavo. ⁵ Opo ghuye ayire muCapernaum, mukurona wavakavita aya kwendi, akanderere kwendi ⁶ ntani aghamba, ''Hompa, mukareli wande anarara kumundi kwato kuyenda ntani kuna kukora unene.'' ⁷ Makura Yesusa aghamba kwendi, ''Ame kuniya ntani niya muverure ghuye''. ⁸ Mukurona wavakavita alimburura ntani aghamba, ''Hompa, ame kapi vina ngwapere ashi ove ukangene munda ya ndjugho yande. Ghamba tupu nkango makura mukareli wande ndi kwaveruka. ⁹ Mbyovyo ashi ame name nimuntu ogho vatoghorora munda ya upangeli, ntani ame nakara navakavita munda yande. Ame kughamba kwaghumwe, ''Yenda, '' Makura ghuye kuyenda, ntani kwaghumwe, ''Yiya, ''makura ghuye kuya, ntani kwamukareli wande, rughana vino, makura ghuye kuvirughana. ¹⁰ Opo Yesusa ayuvhire vino, ghuye atetukire ntani aghamba kovo vamukwamino, ''ntani vyaushiri ame nakughamba kwenu, ame kapi nawanamo ghumwe walipuro olyo mu Israeli. ¹¹ Ame kunakumu tantera anwe, vavangi ngava katundilira kughupumeyuva ntani kughutokeyuva, ntani ngavaya shungira kuntishe na Abrahamu, Isak, Yakop, mughuntungi waliwiru. ¹² Ano ngoli vanantungi ngava vatjidira mumundema wa pandje, oko ngakukakaro malira nkali ntani nama kukwetjo pamayegho.'' ¹³ Yesusa aghamba kumukurona wavakavita, '' yenda! momo ghuna pura, ngoli vavikuraghanena ove.'' Makura mukareli averukire pavili ndjoyo. ¹⁴ Opo Yesusa ayire kundjugho ya Petrusi, ghuye amonine ngumweyi ya Petrusi ana rara kunakuvera lishakima. ¹⁵ Yesusa akwata lighoko lyendi, makura lishakima alimutundu. Makura ghuye ashapuka ntani atameke kumukokavera ghuye. ¹⁶ Opo ngurova yayire, vantu vayitilire Yesusa vavayingi ovo dakwatire mpepo dadidona. Ghuye atjidamo mpepo na nkango ntani averura navantje ovo vaveliro. ¹⁷ Mundjira yino mo vya tikiremo ovyo aghambire Isaya muporofete, mukughamba, '' Ghuye mwene aghupire mauvera ghetu ntani akutwikire mahamba ghetu.'' ¹⁸ Weno opo Yesusa amonine mbunga yinakumu kundurukida ghuye, atapa manangwiro vayende musheli munya ya lifuta lya Galileya. ¹⁹ Makura mulirongi wa matjangwa amuyere ntani aghamba, ''Murongi, ame kuni kukwama ove kehe kuno ngauyendera.'' ²⁰ Yesusa aghamba kukwendi, ''Vambwawa vakara namakwina, ntani vidira vya kuwiru vya kara navitunguru, enengoli mona muntu kundereko kwakutateka mutwe wendi.'' ²¹ Ghumwe wavarongwa aghamba kukwendi, ''Hompa, mpulitire ame pamuntango niyende nikavhumbike vavava.'' ²² Ano ngoli Yesusa aghamba kukwendi, ''nkwame ame, ntani shuva vafe vavhumbike vafe vavo.'' ²³ Opo yesusa angenine muwato, varongwa vendi vamukwamine munda ghuye munda yagho. ²⁴ Makura mpo pashapukire likundungu lyalinene mulifuta, mpo ashi wato kwaufukire namankumpi. Ano ngoli Yesusa kwaralire turo. ²⁵ Varongwa vayire kukwendi nakumurambwita, avaghamba, ''Tupopere, Hompa, atwe kuna kufa!'' ²⁶ Yesusa aghamba kwavo, ''Vinke munakutjilira, anwe valipuroghona?'' Makura ghuye arambuka ntani akava mpepo ntani nalifuta. Makura apa kara likuturo lyalinene. ²⁷ Vantu vyavatetulire ntani avaghamba, ''Muntu munke ghuno, nampili mpepo ntani lifuta kumulimburukwa ghuye?'' ²⁸ Opo Yesusa ayire muruha rumwe ntani kushirongo shava Gararenesa, vakafumu vavili ovo vakalire nampepo dadidona avaku gwanekere naye. Vavo kwarupukire mumbira ntani kwakalire shiponga ngudu, mpo ashi kundereko munaruyenda ndjira kapitango oyo ndjira. ²⁹ Makura, vavo avalili nakughamba, ''Vinke ovyo turughana nove, mona Karunga? Ove kunaya ghuyatuhepeke atwe kumeho yashirugho vaturapo?'' ³⁰ Weno ghutanga wavinguru vyaviyingi kwakalirepo kuna kulya, kapishi ghure navo. ³¹ Mpepo dadinona datwikilire kukushenga kwa Yesusa ntani adighamba, ''Nange ghututjidamo, tutume mo ghunya ghutanga wavinguru.'' ³² Yesusa aghamba kwado, ''Yendenu!'' mpepo dadidona darupukiremo ntani dayendire muvinguru, ntani makura ghutanga naghuntje aghukwangulire ghughurumuke mulifuta makura avifu mumema. ³³ Ovo vatakamitiro vinguru avaduka vatundepo ntani avayendi mushitata ntani nakukatanta navintje, shinenepo ovyo vya shorokiliro vakafumu ovo vakaliro nampepo dadidona. ³⁴ Makura, shitata na shintje kwayire vaya wane Yesusa. Opo vamumonine ghue, avamukanderere atundemo mulidingonoka mukunda lyavho.