¹ Apa amanine Jesus kuronga varongwa vendi murongo na vaviri, makura atundupo ayende akayuvitire muvitata. ² Makura Johanes apa akayuvire viruwana vya Jesus ghuye shimpe mudorongo, atumu mbudi kuvarongwa, ³ na kughamba ashi, ''Ove ghunya ghunakuyo ndi tutaterere wapeke?'' ⁴ Jesus alimburura na kuvatantera ashi, ''Yendenu mukatantere Johanes evi munamono navi munayuvhu. ⁵ Vatwiku kunakumona, virema kunakuyenda, vanavingondwe kunakukushuka, vipurupuru kunakuyuva nka, vafe kunakuvarambwita kughufe, ntani mbudi yayiwa kunakuyiyuvita kuvanyandi. ⁶ Mutungikwa ndjeghu adiro kugarapa morwa rwande.'' ⁷ Vakafumu vanya apa vavyukire, Jesus makura atameke kutantera mbunga vyakughamena Johanes, ''Ovinya munakamona mumburundu ne-mbuu dina kukunyunganga kumpepo ndi? ⁸ Mara evi munayendere mukamone ne-mukafumu anadwato muvyuma vyaghureru-reru ndi? Muuhunga, ovo vadwatango vyuma vyaureru-reru kwatunga mumandi ghava Hompa. ⁹ Ngoli kovinya munakamona ne-muporofete ndi? Mo, nakumutantera ashi, ghuye apitakana muporofete. ¹⁰ Ghuye ndje ghunya vatjanga, 'Monenu, ame kuna kutuma vatapi mbudi kumeho yenu, ovo ngava muwapayikiro ndjira denu.' ¹¹ Ghushili nakumutantera, mukatji kovo vashampuruka vakamali kudereko wamunenepo yira Johanes muyoyi. Nampili ngoli ndje muntu wamudidipo mughuntungi waliwiru ngoli munene kupitakana ghuye. ¹² Kutundilira kumayuva gha Johanes muyoyi dogoro weno, Untungi waliwiru kwapita mulidjonauko, ntani vantu vakudjonaura kwaghu ghupa kunkondo. ¹³ Vaporofete navantje ntani veta kwa porofeta dogoro kulimoneko lya Johanes; ¹⁴ ntani nangeshi ghunatokora kuviyuva, ghuye ndje Elijah ogho ngayo. ¹⁵ Kehe uno akaro namatwi ghakuyuva ayuve. ¹⁶ Kunke nuvhura kufanika muhoko ghuno? Yira vanuke vana kudanaukiro pambandje, vana shungiro vavo kuna kukuyiyira ¹⁷ na kughamba ashi, 'atwe tunadana udano, ngoli anwe kapi munadana. Tunakara muruguvo, ngoli kapi munaliri.' ¹⁸ Johanes kapi aya mukuya lya na kunwa vinyu, ngoli vaghambire ashi, 'Akara na ndemone.' ¹⁹ Mona muntu kwayire ghuye kulya na kunwa ngoli vaghambire ashi, 'Monenu, mukafumu wamakurulya na ghunkorwe, muholi wavafutiti mutero ntani vanandjo!' Ngoli ukonentu wahungama kuviruwana vyendi.'' ²⁰ Makura Jesus atameke kushwenena vitata omo vyashorokilire viruwana vyendi vya nkondo, mukondashi kapi vakushighulire. ²¹ "Vita kukwenu, va Chorazin! Vita kukwenu, va Bethsaida! Nangeshi viruwana vya nkondo kwaviruwanine mu Tireni ntani Sidoni ovi vinashoroka mumwenu, ndi vakushighura kare vawave livhu. ²² Ngoli ame kuna kumutantera ashi paliyuvha lya mpanguro ngalikara lyalidona kupitakan lyenu. ²³ Ghukare ove Kaperenaumu, ashi ngava kutumbe tupu dogoro naliwiru ndi? Nampili kuna kumanga, mushirongo sha vafe ngavakuvhukumina! Mbyovyoshi vitetu evi vyashorokiro moye, ashi ndi muSodomu vya shorokilire, yayo ndi mpoyili po shimpe. ²⁴ Ngoli kuna kumutanterako ashi, vyashirongo sha Sodomu ngavikara hasha kupita kana anwe muliyuvha lya mpanguro.'' ²⁵ Muruvede runya Jesus kwa ghambire ashi: ''Ove nakupandura, Vava, Hompa waliwiru nalivhu, mbyevishi ove wahoreka vininke vino kuvakonentu nava nandunge, mbyo vya vitapa kuvantuntu tupu. ²⁶ Nhi, Vava, mo ngoli wavihorera. ²⁷ Vininke navintje kwavimpa Vavava, ntani kudereko oghu ayivo Mona nkwandi vashe pentjavo, ntani nka kudereko ogho ayivo Vashe nkwandi Mona pentjendi ntani nakehe ghuno ahorera mona kuvinegheda. ²⁸ Yenu kukwande namuvantje, anwe warorora udito, muyawane lipwiyumuko. ²⁹ Kukambekenu djoko yande mukurongereko kukwande, mbevishi ame kwaghomoka mbyo nakudidipita mumutjima, mposhi ngamuwane lipwiyumuko lya monyo denu. ³⁰ Mbyevishi djoko yande yireru, ano ngoli mudigho wande warerupa.