¹ Ruvede runya Jesus kwapitire mumafuva muliyuva lyaSabata. Varongwa vendi ndjara yava kwatire, makura ava tameke kutjoraghura ntafu va lye. ² Opo vavimonine vafalisayi, ava mutantere ashi: ''Kengashi, Varongwa voye kuna kuruwana evi vashweneka muliyuva lya Sabata.'' ³ Jesus ava limburura ashi, ''Kapi mwavarura evi aruwanine Ndafita, opo ya mukwatire ndjara kumwe navantu vendi? ⁴ Ayendi mundjugho yaKarunga, a ka lye mboroto da ndjambo, edi vava dilikire kulya, nkwandi vaPristeli tupu vadi pulitilire. ⁵ Ndi walye kapi mwavharura mu veta ya Karunga ashi, vaPristeli weni omu vava tukire veta ya liyuva lya Sabata muntembeli ngoli naghu ndjoni shi? ⁶ Ngoli ame kuna kumutantera ashi oghu apitakano ntembeli mpwali mpaapa. ⁷ Ndi mwayiva ashi vinke dina kutanta nkango dino, 'Ame ghufenkenda nahoro, kapishi ndjambo,' ndi kapi muna pangura vano vakupira ghu ndjoni. ⁸ Mbyevishi Mona muntu ndje mwenya Sabata nka.'' ⁹ Jesus apa atundirepo makura akangena muSinagoge davo. ¹⁰ Mwamo mwakalire mukafumu wakufa lihoko. Vafalisayi makura ava pura Jesus ashi, ''Vya pulitira mukuverura muliyuva lyaSabata ndi?'' Nalighano lyakurenka ashi vamuwane undjoni. ¹¹ Jesus ava limburura ashi, ''Opo munakara mukatji kenu are akaro na ndjwi yimwe tupu, ano nange ayi were mulikwina, makura adire kayi ghupa mo muliyuva lyaSabata? ¹² Pa muntu na ndjwi are wamu lyo po? Mpo ngoli ashi muliyuva lya Sabata kuvhura kuruwana mo vyamu lyo.'' ¹³ Makura Jesus atantere mukafumu ghunya ashi, ''Ghononona lihoko lyoye.'' Makura ghuye aghononona, lihoko aliveruka likare yira ghunyalyo. ¹⁴ Vafalisayi makura ava rupukamo, vakakuyonge ashi weni omu vamuruwana Jesus mposhi vamudipaye. ¹⁵ Jesus apa avi nongonwine vino, makura atundupo. Vantu vavayingi ava mukwama, makura ghuye ava verura navantje. ¹⁶ Makura ava pampalikida ashi ndi kapishi vamuyiyaghuke, ¹⁷ morwa ashi ditike mo nkango da muporofete Jesaya, atantiro ashi, ¹⁸ Kengashi, mukareli wande oghu natoghorora; mbyo namuhorererapo, oghu andjendo kumutjima. Mwendi nganitura mpepo yande, ngaka yuvite dimuhoko vyauhunga. ¹⁹ Marwanambo kapi ngaghakarapo ndi ashi malira nkali; ntani nka kudereko oghu ngayuvho liywi lyendi mumaharango gha ndjira. ²⁰ Ndi rukare ruu rwakudifuka, kapi ngaru tjora, ndi nga dimite ntjantje, ghuye ngadidimika dogoro ngatikite mo uhunga, ²¹ ntani dimuhoko nadintje mwendi ngadihuguvara.'' ²² Makura mutwiku ghumwe ntani nka ghuye shipurupuru, akaliro na ndemone, ava muyita kwa Jesus. Ghuye amuverura, makura atameke kumona nakughamba nka. ²³ Mbunga mudima makura ayi tetuka, na kutanta ashi, ''Ngoli ghuno mukafumu ne mona Ndafita ndi?'' ²⁴ Ngoli vafalisayi apa vayuvire mbudi yino, avare ashi ghuye kapi atjida ngamo mpepo dadidona nankondo dapeke, nkwandi nankondo da Belisebubu, mukondi wampepo dadidona.'' ²⁵ Apa amonine Jesus ashi mo vanakughayara ngoli, makura avatantere ashi: Kehe shino shirongo shakutavakano shene ngashihanaukapo, shikare shitata ndi mundi wakutavakano wene kapi ngaghuyimana. ²⁶ Nangeshi Satan kutjida mo Satan, makura kupakara ngoli likutavaghano. Weni ngoli omo untungi wendi ghuyimana? ²⁷ Nangeshi ame mpepo dadidona kuna kuditjidamo nankondo daBelisebubu, makura ava vana venu nankondo dare vaditjidanga mo? Mukonda yevino mpo ngoli vakarera vapanguli venu. ²⁸ Ngoli nangeshi nankondo daKarunga natjidanga mo mpepo dadidona, yivenu ashi untungi waKarunga ghunamuyere. ²⁹ Weni muntu omu avhura kungena mundjugho ya lipenda akavake mo vininke vyendi hana tanko kumanga lipenda olyo? Ntani angena akavake mo vininke vyendi mundjugho. ³⁰ Kehe uno adiro kuhamena kukwande aku limba name, ano kehe uno wakudira kupongayika name, kuhanaura. ³¹ Mpo ngoli nakumutantera ashi, kehe ndjo na lishwaghu vantu kuvhura kuyiva dongonwenapo, ngoli lishwaghu lyaku mpepo yakupongoka nakulidongononapo shi. ³² Kehe uno wakughamba nkango yayidona kwa Mona muntu, ghuye kumu ghupirapo. Ngoli kehe uno wakughamba nkango yayidona ku mpepo mupongoki, ogho kwato kumu ghupirapo, ndi nampili mu udjuni ghuno, ndi ogho ngauyoko. ³³ Nangeshi mutante ashi shitondo shiwa na nyango yasho yiwa, ndi murenke ashi shitondo shitondo shidona nanyango yasho yidona, myevishi kunyango nko vadimbwiliranga shitondo. ³⁴ Ene ngoli anwe vana vavambaroka, anwe muvadona, weni ngoli omu mughamba vyaviwa? ³⁵ Morwa ovyo vyayuro mumutjima kanwa nako mbyo kaghambanga mbyovyo. Muntu wamuwa kushorora vyaviwa vyamuungawo wendi wauwa, ene ngoli muntu wamudona kushorora vyavidona vyamuungawo wendi waudona. ³⁶ Ngoli ame kuna kumutantera ashi, kehe yino nkango yakupira mulyo, aghambanga muntu, ndjo kukenita muliyuva lya mpanguro. ³⁷ Mbyovyoshi kunkango doye nko ngava kupongwera, ano kunkango doye nko ngava kupangwilita nka koko''. ³⁸ Makura valirongi vamatjangwa na vafalisayi ava tantere Jesus ashi, ''murongi, atwe tunasha ghuruwanepo shitetu tushimone.'' ³⁹ Jesus makura ava limburura ashi: ''Vantu vaweno vavadona varushonda mbo vana shano shitetu. Kwato nka shitetu shakuvaruwanena nkwandi shitetu sha mu Porofete Jona. ⁴⁰ Yira moomu tupu akalire Jona mayuva matatu mwi na matiku mushira sha limuntjwi, mo ngoli naye Mona muntu ngakara mayuva matatu mwi na matiku kuntji ya livhu. ⁴¹ Muliyuva lya mpanguro vakafumu vamu Ninive ngava pirukira vantu ava vavape undjoni, morwa ashi vavo kwakushighulire kuliyuvito lya Jona, Monenu, oghu apitakano Jona mpwali pano. ⁴² Hompa wamukadi wakumbindakano ngashapuka muliyuva lya mpanguro ya vantu vamuhoko ghuno avape undjoni, mbyevishi ghuye kwatundilira kughura waudjuni aya teerere ukonentu wa Salomoni, monenu, wakupita kana Solomoni mpwali pano. ⁴³ Nangeshi mpepo yayidona ayi tundu mo mwa muntu, yayo kurenda-renda mushirongo shamburundu, yishane shane ghuturo, makura apa yidira kuwana ghuturo. ⁴⁴ Makura yayo kutata ashi, 'Kuna kuvyuka kundjugho yande oyo narupukire.' Ene ngoli apa yikavyuka kuyawana ndjugho vanayikwere yinakene. ⁴⁵ Makura yayo kuvyuka yikashimbeko nka mpepo dimwe ntano nambiri dadidona kupita kana yene. Makura dado kungena ditunge mo. Viruwana vya murwana gho kukara vyavidona kupita kana vyakuhova. Navantu vavadona vamuhoko ghuno mo ngavakara ngoli. ⁴⁶ Jesus haka hokorwe mukughamba atantere mbunga, nani vawina navaghuni vendi vana yimana pandje, vanashana kughamba naye. ⁴⁷ Makura muntu ghumwe amutantere ashi: ''Vanyoko navaghuni voye pandje vanakara, vanahoro kuhoro kughamba nove.'' ⁴⁸ Makura ghuye amu limburura ashi: ''Vanane vakuni ntani navo vaghuni vande nka ne vakuni?'' ⁴⁹ Makura ghuye aghonyonona lihoko lyendi kuvarongwa kumwe nakughamba ashi: Kengenu, Vanane navaghuni vande mbava! ⁵⁰ Morwashi kehe ghuno wakuruwana viruwana vya vavava vamuliwiru, ndje mughunyande, ndje mpandjande, mbo Vanane mbovo.''