¹ Jesusa a kughu varongwa vendi murongo navaviri kumwe nakuvapa nkondo kupitakana mpepo dakunyata, kudiutjidamo dirupuke, nakuverura kehe rudi rwmaghuvera ghakukushuva-shuva. ² Weno madina ghavapositoli murongo navaviri ngo ghano. Wakuhova, Simoni ( oghu kava kughanga nka Peturusa ), ntani Anderasi mughunyendi; Jakopo mona Zebede; ntani Johanesa mughunyendi; ³ Filipusa, ntani Baritomeu;, Tomasa; ntani Mateusa mufutiti mutero; Jakopo mona Arufeusi, ntani Tadeusa; ⁴ Simoni wamupampi; ntani Judasa Isikalyoto ogho amu shoroliro. ⁵ Avano murongo navaviri Jesusa ava tumu. Ava rondora nakughamba, '' Kapishi muyende kulivango vatunga vahedana, ntani kapishi muka ngene mudoropa yavaSamaritani. ⁶ Yendenu tupu kuntjwi dakukombana mumundi wava Israeli; ⁷ ntani omu muna kuyenda, yuvitenu nakughamba ashi, ' ghuntungi waliwiru waya papepi.' ⁸ Verurenu vakuvera, rambwitenu vafe, kakushurenu vakavingondwe, ntani katjidenu mpepo dadidona. Mahoko-hoko muna viwana, kavi tapenu mahoko-hoko. ⁹ Kapishi mushimbe kehe ngorodo, ndi siliveli, ndi ngoporo mutundjato twenu. ¹⁰ Kapishi mushimbe ndjato damuruyendo rwenu, ndi vikoverero viviri ndi vicapa, ndi virughanita, murughani kuparukira mundya dendi. ¹¹ Kehe shitata ndi mukunda mukakenga, kapaparenu mo wamuwa, nakukara naye dogoro ngamu kavyuke. ¹² Apa mukangena mumundi, mororenu. ¹³ Ntjene mumundi muwa, renkenu mpora yenu yikare papayo. ano ngoli ntjeneshi kapishi yiwa, renkenu mpora yenu yi muvyukire naghumwenu. ¹⁴ Kovo ngavakamudiro kamutambura ndi kutegherera kunkango denu. Apa ngamutunda mumundi ogho ndi shitata, kukukumunenu mubundu yitunde kumpadi denu. ¹⁵ Vyaghushiri nakumutantera, ngavi kapitakana livango lya Sodoma naGomorrah muliyuva lyampanguro nta osho shitata. ¹⁶ '' Kengenu, ame kuna kumutuma yira ndjwi mukatji kamambungu, mposhi karenu muna rungarara yira vambaroka ntani muna kuruka yira mputukuwa. ¹⁷ Nomenenu vantu! vavo ngava mutapa nwe kumpanguro, ntani ngava kamutoghonena mushinagoge davo. ¹⁸ Makura ngava mutwara kumeho yavapangeli navaHompa mukonda rwande, ngamuvape ghumbangi ntani nakuvahedana. ¹⁹ Apa ngava mukwata, kapishi mgamukupakere shinka kuhamena weni ndi vinke ovyo tuka ghamba, morwa evi vyakughamba ngava vimupa anwe paruvede ndoro. ²⁰ Morwa kapishi anwe ngamu kaghambo, ano ngoli mpepo ya shenu oghu ngaghambo mumwenu. ²¹ Mukurwamuntu ngatokwera mughanyendi kumfa, ntani shamuntu monendi. Vana ngavashapuka nakukulimba nava kurona vavo nakuvatokwera kumfa. ²² Ngava munyenga kehe ghuno mukonda yalidina lyande. Ano ngoli kehe ghuno ngadidimiko dogoro kughuuhura, ogho muntu ngaka yoghoka. ²³ Apa ngava muhepeka anwe mushitata shino, tjwayukirenu kwakukwamako, vyashiri nakumutantera, anwe kapi ngamu yenda kupitira mushitata shaIsraeli kumeho mona muntu ngaka ye. ²⁴ '' Murongwa kapi a pitakana mushongwa wendi, ndi mukareli pawiru yamuhona wendi. ²⁵ Vya wapa murongwa ashi ghuye a kare yira mushongi wendi, ntani mukareli yira muhona wendi. Ntjene vavo ngavayite muhona wamundi Belisebuli, weni ghunene wamadina vamutwenya varangweka vendi. ²⁶ Mpo ngoli ashi mwasha vatjira, morwa shi kwato osho shavando eshi ngashi diro kuhoroka, ntani sha sha vando eshi ngavadira kuyiva. ²⁷ Kehe vino nakumutantera mumundema, kuvighamba mughukenu, ntani kehe vino muna kuyuva mumatwi ghenu kadidi, ngava viyuvita pawiru yandjugho. ²⁸ Kapishi muvatjire ovo va dipaghango rutu ano ngoli kwato kuvhura kudipagha monyo. Nani tjirenu oghu a vhurango kudjonaghura navintje monyo ntani natu mulivango lyalidjonawiro. ²⁹ Mandjunge maviri kapi vaghaulita nashiringa mbiri? Ano kwato limwe lyagho lyawerango palivhu ghana kuliyiva shenu. ³⁰ Ano ngoli nampili huki dakumutwe ghoye dapwa kudivarura. ³¹ Kapishi kutjire. Anwe mulyo kupitakana mandjunge ghamangi. ³² Mpo ngoli ashi kehe ghuno wakuntongonona ame kumeho yaVantu, name nka ngani kamutongonona kumeho yavavava muliwi. ³³ Ano ngoli oghu antjwenango ame kumeho yavantu, name ngani kamushwena kumeho yavava muliwi. ³⁴ '' Kapishi mu ghayare ashi ame kwa yera niyite mpora pano palivhu. Ame kapi na yera niyite mpora, ano ngoli likunyengo. ³⁵ Morwa kwayera niya ture ghunkore pakatji kamwanuke wamukafumu navashe, ntani ghunkore pakatji kamwanuke wamukadona navawina, ntani ghunkore pakatji kamuntu nangumweyendi. ³⁶ Mukafumu nkore dendi ngava kara mbovo varangekwa vendi. ³⁷ Oghu ahoro vashe ndi vawina kupitakana ame kapi a ngwapera; oghu ahoro monendi wamukafumu ndi monendi wamukadona kupitakana ame kapi angwapera ame. ³⁸ Oghu adirango kudamuna shilivindakano shendi nakunkwama me kunyima kapi a ngwapwra me. ³⁹ Kehe ghuno wakuruvha liparu lyendi ngali kombanita. Ano ngoli wakulikombanita liparu lyendi morwa rwande ngali wana. ⁴⁰ '' Oghu a mutamburango nwe kuntambura me, ntani oghu a tamburango me nka kutambura oghu a ntumo me. ⁴¹ Oghu a tamburango muporofete mulidina lyamuporofete ngakawna ndjapo yamuporofete, ntani oghu a tamburango mukafumu wamuhungami mulidina lyamukafumu wamuhungami ngakawana ndjapo yamukafumu wamuhungami. ⁴² Kehe ghuno wakutapa kwaghumwe wavano vavadidi namoiri nkinda yamema ghamatenda a nwe mulidina lyamurongwa, vyashiri na kumutantera nwe, uye kapi ngakara nandjira mukukombanita ndjapo yendi.''