¹ Lidi lya nkango odo twa yuvitanga yino ashi: Atwe twakara na mupristeli wa munene wa weno ogho aka shingiro kurulyo rwa shipundi sha Uhompa osho sha fumano muliwiru. ² Ghuye muruwani wa mundjugho ya kupongokerera ya ushili oyo adika Hompa, kapishi muntu. ³ Kehe uno mu pristeli wa munene kumutura mushiruwana aruwane navintje atambure vitapa naku djamba ndjambo. ⁴ Ashi ndi Kristus shimpe mpwali pano pantunda ya livhu, ndi kapi ana kara mupristeli, mukonda ashi va pristeli va kudjamba kutwara muveta shimpe mpovalipo. ⁵ Vavo kuruwana viruwana vya muntembeli ovyo vafaneka va upeko mundundumba wavyo vya karo muliwiru. Karunga kwatapire marondoror kwa Mosesa kumeho ya kudika nkuru ndjugho: Karunga aghamba ashi, "Kenga nawa ghuruwane navintje vifane yira momu vana kavi kunegheda kundundu." ⁶ Weno Kristusa kwamu tura amane shirughana sha Upristeli shashinene shakupitakana vakuhova, ghuye kwayita nka waro ligwanikitiro lya liwa lya makukwatakano gha matumbwidiro ghamawa. ⁷ Ashi ndi likukwatakano lyahova kundereko lipuko lya karopo, ndi kundereko hepero pakare lino lya uviri. ⁸ Makura Karunga akenge maudjini gha vantu vendi, makura aghamba ashi, "Kengenu mayuva kuna kuya omo ana kutanta Hompa opo ngani turapo likukwatakano lyalipe na lira lya va Isragheli ntani nalira lyava Yuda. ⁹ Kapishi likukwatakano lya kufana yira lyava kurona vavo muliyuva olyo nava kwatire kulighoko nivaghupe mushirongo sha Egipte. Kapi valimburukire kukilkukwatakano lyande, makura mpo nava shuvire mo anan kughamba Hompa. ¹⁰ Olino ndyo likukwatakano lya lipe olyo naruwanita kupitira mundjugho ya Isragheli muruku rwa ngogho mayuva --mo anakughamba Hompa. Veta dande nganiditura mumaghano ghavo, ntani nka ngani ditjanga mudimutjima davo, ntani vavo ngava kara muhoko wande. ¹¹ Kapi ngapa kara umwe ashi ndje wa Kuronga va unyendi ntani wa kutantera va unyendi ashi, yiva Hompa'. Mukonda ashi navantje ngava ndjiva me, akare mwanuke, akare mukurona. ¹² Mukonda ashi ame nganikara na nkenda kundjugho davo, ndjo davo kapinka ngani divhuruka waro." ¹³ Nkene kuna kughamba likukwatakano "lyalipe," Karunga kuna kutanta ashi lya kuhova lya kurupa, kehe shino shakukurupa shapwa mulyo ntani ntantani ngavidongonokapo.