¹ Ghuno Melekezedeki, kwa kalire Hompa waSaremu, kwa kalire mupristeli wa Karunga wa kuliwiru-wiru, mundjira ya kuka vyuka Abrahamu oko aka fundire vaHompa agwanekere naye makura amu kandayiki. ² Makura Abrahamu atapa navintje ovyo aka shimbire vikare ndjambo vya shina Murongo. Lidina Melekezedeki pakuhova, kutanta ashi, "Hompa wa ghuhungami"; ntani ghuye kwakalire nka "Hompa wa Saremu," kutanta ashi, "Hompa wa mbili." ³ Ghuye kundereko vashe, kundereko vawina, kundereko ntundiliro ya vakurona vendi, kundereko liyuva olyo vamuyita ndi lya mfa dendi. ⁴ Monenu tupu omo anenepa oghuno mukafumu na Abrahamu mukurona wetu naye kwatapire vitapa vya shi namurongo kwavo aka kwatiro muvita. ⁵ Veta kwa tanta aashi valira lya Abrahamu vahepa kutapa shinamurongo kwavo vaweka vatape kulira lya Levi ovov vakaro mushirughana sha ghupristeli, nampili momu vakara lira limwe tupu. ⁶ Ghuye Melekezedeki, kapi atunda mulira lyava Levi, awane vitapa vya shina murongo kwa Abrahamu, makura amutungiki, ngawane matumbwidiro kwa Karunga. ⁷ Kwavino kapi kwa kara mashinganyeko ashi mukurona ndje wa kushwera mwanuke lirago. ⁸ Vapristeli mbo vapongayikango vitapa vya shinamurongo, nampili ngoli vavo navaantje ngavafa ku upako tupu Melekezedeki matjangwa kwatanta ashi ghuye ngakarererapo. ⁹ Kutanta ashi na Levi wa kupongayika vitapa vya shinamurongo, pakuhova naye atapire vitapa vishinamurongo kupitira mwa Abrahamu, ¹⁰ mukonda Levi kwa kalire shimpe murutu rwa vakondi vendi mwa Abrahamu opo agwanikilire na Melekezedeki. ¹¹ Veta kwatanta ashi va pristeli vana hepa kutundira mulira lya Levi, vano va pristeli na kuvhurashi kudongononapo ndjo da vantu, mbyo pakara hepero ashi pakare mu pristeli yira Melekezedeki, kapi ashi wa tunda mwa Aroni? ¹² Mukonda shi nkene ghu pristeli ghuna runduruka, veta nayo yina hepa kukutjindja. ¹³ Muntu ogho ghuna tuna kughamba pano muyogholi wetu ogho atundo mulira lya peke lya piro kuruwana rumwe ku shidjambero. ¹⁴ Kehe uno avi yiva nawa-nawa ashi ghuye kwatunda mulira lya va Yuda, ano ngoli Mosesa kapi aghamba ashi va pristeli kuvhura kutunda mulira lino. ¹⁵ Navintje vino vyapwa kare kughamba nkene ashi ngakushoroka mupristeli wapeke wa kufana yira ukaro wa Melekezedeki. ¹⁶ Ghuye kapi awana ghu pristeli, kupitira muveta na nkondo da vantu, nani ngoli kwatunda kunkondo dakukarererapo. ¹⁷ Matjangwa kwa tanta kukwendi ashi: "Ove mupristeli wanaruntje kupitira mu ukaro wa Melekezedeki. ¹⁸ Makura ukaro na veta da pakare mbyo ghaditulira kuntere, ¹⁹ mukonda ashi veta kapi yatikilira kehe vino ano ngoli mbyo vatupa lihuguvaro lya kutikiliramo tuye pepi na karunga. ²⁰ Karunga mwene ndje atuliropo mughano pa kutoghorora uno mupristeli, ²¹ Ano ngoli kapi atulirepo mughano wakufana ghuno opo atulire likukwatoghona lya upristeli wa kuhova, ghuye kwa mutuliremo namughano wa Karunga aghamba kukwendi ashi, "Hompa kuna ghana ashi kapi ngarundurura maghano ghendi: 'Ove ngahhukaro mupristeli naruntje nanaruntje.''' ²² Weno kutanta ashi Yesusa ana kara mutikitimo ntani ndje ligwanikitiro lya liwa kupitakana lya kuhova. ²³ Vapristeli vakuhova vangi vakaliro ntani kava fanga mbyo kapiranga ku twikira viruwana vyavo. ²⁴ Ano ngoli Yesusa ghuye ngakarererapo naruntje- nanaruntje ntani na upristeli wendi ngaghu karererapo naruntje na naruntje. ²⁵ Ghuye kuyoghora vantu vakuya kukwendi avayite kwa Karunga vapitire mumwendi, ntani ghuye kuva shungidirapo kwa Karunga. ²⁶ Yesusa ndje mupristeli wa munene twa hepa, uye apongoka, kapi akara nalipuruko, kwato ndjo, kwa mupongora kuva kandjo mbyo vamu yerura apitakane vyamu liwiru-wiru. ²⁷ Ghuye apitakana va pristeli vavanene navantje, ghuye kapi ahepa kudjamba da kehe liyuvha kundjo dendi ntani nadnjo da vantu. ghuye kwa djamba ndjambo y anavantje rumwe tupu pa kukutapa mwene akare ndjambo. ²⁸ Mukonda ashi veta ndjo ya kutura mu pristeli wa munene ogho apiro nkondo dakutikiliramo. Ano ngoli nkango da mughano, odo dayiro kururwa veta, kwaya turamo mona, akare mutikitimo wa navintje.