¹ Kehe pano mupristeli wamunene, kwa mutoghorora mumbunga ya vantu, kwa mutoghorora aruwanene vantu mu viruwana vya Karunga, ghuye atape vitapa na kudjamba ndjambo da kudongononapo ndjo. ² Ghuye kuruwanena navantje va kupira ukonentu navo vapuko, mukonda ashi ghuye naye akara nakupira nkondo kwa mwene. ³ Mukonda yino, naye anahepa kudjamba ndjambo ya kudongononapo ndjo dendi, yira momu aruwanenanga mbunga ku ndjo davo. ⁴ Shiruwana shino kapishi shakehe uno, sha ndjegho atoghorora Karunga mwene, yira Aroni. ⁵ Nampili Kristusa kapi akutulire mwene akare mu Pristeli wa munene. Ano ngoli, ndjegho aghambiro kukwendi ashi, "Ove monande; Namuntji na kara vasho." ⁶ Mumatjangwa ghamwe kawata waro ashi, "Ove mupristeli wa naruntje ngakwamo ghukaro wa Melekezedeki." ⁷ Mumayuva ogho akalire narutu, Kristusa kwa tapire ndapero na kukukwambera na kulirana kukuya na liywi lya linene na maruntjodi kwa Karunga, wa kuvhura kumuyoghoramo mu mfa, ndapero yendi ayikatika mukonda ya upongoki wendi. ⁸ Nampili momu akalire ashi ghuye monendi, ana hepa kumona ruhepo mposhi akuronge ashi vinke vina kutanta kulimburuka kwa Karunga. ⁹ Muruhepo rwendi ghuye atikitiliremo navintje, mposhi kehe uno wa kulimburukwa kwendi, ayive ashi ndje ayito lighoko lyakutwara kuliparu lya naruntje. ¹⁰ Mukonda yino Karunga amutoghorora akare mupristeli wa munene nga kwame mu ukaro wa Melekezedeki. ¹¹ Kuvhura tughambe vya vingi vya kuhamena Yesusa, ano ngoli udito mukuvifwaturura konda munakupata kapi muviyuva. ¹² Pashirugho shino mwawapera kukara varongi, ngoli shimpe mwahepa muntu wa kumuronga shimpe madi ghamuhovo gha nkango da Karunga. Kukwenu mashini mwahepa, kapishi ndya! ¹³ Mukonda ashi kehe uno wa kunwa mashini mwanuke, ghuye kwato ghukonentu wa nkango da ushili. ¹⁴ Mpo ngoli ashi ndya dava kurona. Vakurona vandunge vayivo kuhangura ghuwwa utunde ku Udona.