¹ Veta kwa kara tupu yira mundunduma wa vininke vya viwa vya karo kumeho, ano ngoli kapishi vinke vyene vyene. Kwavo va kuya kwa Karunga kupitira muveta naku vhurashi kumangurura vantu kundjo na ndjambo odo vadjamberanga kehe mwaka. ² Ashi ndi mo ngoli, kudjamba ndjambo da kehe pano ndi kapi da shaya? Vakareli Karunga va kushuka shikando shimwe tupu ndi kapi vakara na liywi lya undjoni lya mumutjima. ³ Ano ngoli ndjambo da kehe pano da kuvhurukita tupu ndjo da vantu kehe mwaka. ⁴ Mukonda ashi honde, ya ntwedu nayi ya vimpendje nakuvhurashi kudongonenapo ndjo da vantu. ⁵ Opo ayire Kristusa muno mu udjuni, kwaghambire ashi, "Ndjambo na vitapa kapi wavipanda, ano ngoli ove kwa ngwapayikira rutu; ⁶ ndjambo da kushwakerera nadi da ndjo kapi wadipanda. ⁷ Ame makura ani ghamba aashi, ''Kengenu, ame unopamo ove ove Karunga wande ame kwaya niyatikitemo matjangwa yira momo ghatanta muveta." ⁸ Pamuhovo aghamba ashi, "Ove kapi wahora ndi wapanda ndjambo, ndi vitapa, ndi ndjambo da kushwakerera, ndi da ndjo. Odino ndjambo varuwananga kutwara mu veta. Ove kapi wa dipanda." ⁹ Ghuye aghambanka waro ashi, "Kengenu, ame uno kwaya niyatikitiremo mpango doye." Ghuye kwaya aya shayekitepo likwatakano lya kuhova aya turepo lyalipe. ¹⁰ Muviruwana vya weno, mbyo vatukushurura natuvantje kundjo detu pa kutapa rutu rwa Yesusa Kristusa rukare ndjambo ya rumwe tupu. ¹¹ Kehe liyuva kehe uno mupristeli, kuyimana aruwane virughana vyendi, vya kehe liyuva vya kundjamba ndjambo ya kehe liyuva ya kuvyukuruka ngoli kundereko kughupapo ndjo. ¹² Kristusa kwa djambire ndjo da vantu ndjambo yimwe tupu ndjambo djuni, makura mbyo akashingira kurulyo rwa Karunga. ¹³ Ghuye kuna kutaterera dogoro nkoko ngaka tulira Karunga vanankore vendi vakare ulyatero wa mpadi dendi. ¹⁴ Na ndjambo yimwe tupu ghuye kwatikitiliramo vapongoki navantje kunaruntje nanaruntje. ¹⁵ Mpepo ya kupongoka nayo kwatupa umbangi wavino. Pa kuhova aghamba ashi, ¹⁶ "Weno mongani kukwatakano navo kumayuva ghakumeho, mo ana ghamba Hompa. Nganitura veta dande mudimutjima davo, ame ngani ditjanga munda yavo." ¹⁷ Makura atwikireko nka waro ashi, "Ame kapi ngani vhuruka ndjo na ukaro wavo." ¹⁸ Opo pakaro lidongonono lya ndjo, kapi pa hepa kukara ndjambo ya ku upapo ndjo. ¹⁹ Mpo ngoli, vaunyande weno tuna kara nalihuguvaro lya kukangena mundjugho ya kupongokerera kupitira mu honde ya Yesusa. ²⁰ Mbyo atupa ndjira ya yipe ya liparu ya pito munkonda, kuna kutanta ashi mururtu rwa mwene. ²¹ Mukonda ashi tuna kara na mupristeli wa munene wa ndjugho ya Karunga, ²² tuyendenu na dimuctjima dakukutapa na lipuro lya ushili na di mutjima va mwayera da kushuko na liywi lya mumutjima lya kupira udjoni na marutu ogho vakusha na mema gha kukena. ²³ Tukorenu ngoli mulihuguvaro lyetu olyo twatongononanga, munkondashi Karunga kuvhura kumuhuguvara ashi ghuye kuvhura kutikitamo matwenyidiro ghendi. ²⁴ Tukorangedenu ngoli umwe na unyendi tukare na shihoro ntani nakuruwana viruwana vya uhunga. ²⁵ Twasha shaghekenu vigongi vya mu mbunga kriste yetu, yira momu varuwana vamwe. Mpo ngolishi, tukukorangedenu unene kumuntu na unyendi momutuna kumona ashi liyuva lya Hompa kuna kutika papepi. ²⁶ Nkene ashi kudjonena wina atwe twawana ukonentu mbyo twatambura mbudi ua ushili, kapi pakaranka ndjambo kehe yino ya kudongononapo ndjo detu. ²⁷ Weno, kutatererako tupu lipanguro lya kutjilita na mundiro wa kungongoma ogho ngaghu veveko va nankore va Karunga. ²⁸ Kehe ghuno wakudjona veta ya Mosesa pa kare va mbangi vaviri ndi vatatu ghuye ndje kufa pahana nkenda. ²⁹ Weni muna kughayara ashi lipanguro lya kuhura kuni olyo ngawana wa kushentja mona Karunga, wakudina honde ya likukwatakano oyo vamu kushita ntani na kushwaghura mpepo ya nkenda? ³⁰ Mukonda ashi atwe twamuyiva ogho aghambo ashi; "Nkoko yande; ame nagani vyuta rughoko." Mo ana kughamba Hompa, ntani "Hompa ndje ngapanguro muhoko wendi." ³¹ Lihudi lya linene lya kuwira mumaghoko gha Karunga wa monyo! ³² Vurukenu kumayuva ogho akapito, opo shayire shite papenu, anwe kwa kalire na lididimiko lya linene muruhepo rwenu. ³³ Pavirugho vinya kava mushwauranga na kumutuka na kumuhepeka muvi kenge mantjo ghavantu pavi rugho vimwe anwe kamukupakeranga navantu ovo kavaruwanango vya kufana ngoweyo. ³⁴ Anwe kamupakeranga mbili vaka dorongo, ntani kava mushakananga limona lyenu. Mukonda anwe mwayiva ashi mwakara na limona lya kukarererapo. ³⁵ Kapishi mushuve lihuguvaro lyenu, lya kara na mfuto yayinene. ³⁶ Karenu na lididimiko muruwane ovyo vya yendo Karunga kumutjima, ngamukawane matwenyidiro ghenu. ³⁷ "Mushirugho shashifupi, makura ogho ana kuyo ngayatike pahana kukara maranga. ³⁸ Vahungami vande ngava parukira mu lipuro. Ano ngoli nkene tupu ava vyuka kuruku, mutjima wande na kuvahora nkashi waro." ³⁹ Ano ngoli atwe kapishi vantu va kuvyukanka kuruku ovo ngava kadjonauko, atwe kwakara nalipuro ntani monyo detu ngadi kaparuke.