¹ Lipuro kutanta ashi lihuguvaro lyalinene lya vininke ovyo tuna kutaterera ntani kwa kara umbangi wa vininke ovyo twa piranga kumona. ² Kutantashi mulipuro movawananga vakurona vetu uhungami wa Karunga. ³ Mukonda ya lipuro atwe twayiva ashi Karunga kwa shita udjuni na nkango yendi, vininke vina kumoneko kwa tunda kuvininke vya ku pira kumoneka. ⁴ Mukonda ya lipuro Abeli kwa djambire ndjambo ya kupitakana ndjambo ya Kayini, ghuye mulipuro mo awanine umbangi ashi ghuye muhungami, mukonda Karunga kwatapire umbangi ashi ndjambo yendi ya hungama, ntani lipuro lyendi shimpe kuna kughamba kuliyuva lya namuntji nampili momu ghafa kare. ⁵ Mukonda ya lipuro Henoka kwamughupirepo apire kumakera mfa. "Kapi nka amonikire, mukondashi Karunga kwamu upirepo." Kumeho ya kumughupapo, awana umbangi ashi ghuye kwayenda Karunga kumutjima. ⁶ Pahana lipuro kwato wa kuyenda Karunga kumutjima. Kehe uno wa kuya kwa Karunga akare nalipuro ashi Karunga mpwali ntani ghuye ndje wa kufuta vantu vana kumushano. ⁷ Lipuro kwa renkitire Nowa alimburukwe ku nkango da Karunga kuhamena vya kumeho ovyo vya piliro kukarapo pa shirugho osho, ghuye kwa limburukire Karunga makura atungu wato wa unene omo vavhulire kuparukira na lipata lyendi. muliparu lya weno, mo avhulire kupangura udjuni makura ghuye a wana uhungami wa Karunga wa kutundilira ku lipuro. ⁸ Lipuro kwa renkire Abrahamu, a limburuke opo amuyitire Karunga, ayende kushirongo osho ashanine kumupa shikare upingwa wendi. Ghuye kwa yendire tupu, ahan kuyiva ashi kuni ana kuyenda. ⁹ Lipuro kwa murenkitire akatunge mushirongo sha matwenyidiro akakare muna virongo mushirongo shapeke. ¹⁰ Ghuye kwatatelire shitata shashinene osho ngaya faneka na kutateka ntani mudiki ndje Karunga. ¹¹ Lipuro kwa renkitire Sara akare na marutu maviri ashampuruke nampili momu akurupalire unene, mukondashi ghuye kwa kalire na lipuro ashi ngawana matwenyidiro. ¹² Mwa uno mukafumu umwe tupu ogho vawanine ghuye akurupa movatunda vavangi yira ntungwedi dakuwiru da kuhura pa ndanda da musheke wa kuntere ya lifuta wa kupira kuvhura kuvarura. ¹³ Navantje kwafelilire lipuro vahana kuwana matwenyidiro kwa Karunga. Vavo kwa vimonena tupu ku ure mbyova pura na kutambura kumwe nakukutongonona ashi vavo vayeni kuntunda ya livhu. ¹⁴ Vano vakughamba weno vakutoghorora ashi vavo kunakushana shirongo shavavene. ¹⁵ Ashi ndi vavo kuna kughamba shirongo aosho vahovire kutunga, vavo ndi vavyuka kukwavo. ¹⁶ Ano ngoli, vavo kuna kushana shirongo djuni, sha muliwiru. Mposhi Karunga kwato kukuyivha ntjoni pa kumutwenya vavo ashi Karunga wavo, ghuye kwava wapayikira shitata shavo. ¹⁷ Lipuro kwarenkitire Abrahamu, aka djambe monendi Isaka , opo amushetekire Karunga. Monendi ahuru ti, ogho ngakawano matwenyidiro. ¹⁸ Abrahamu kwa mutantelire ashi, " Mwa Isaka mo ngamu katundilira ruvharo roye." ¹⁹ Abrahamu aghayara ashi Karunga akara nankondo ngavhura kukavhumbura monendi Isaka ku va fe, ndi tughambe tupu ashi, kwa mu vhumbulire Isaka atnde kughufe. ²⁰ Lipuro kwa renkitire Isaka atungike Yakopo na Esaghu ngava kawane matwenyidiro ghakumeho. ²¹ Lipuro kwa renkire Yakopo atungike vana va Yosefu vaviri, ghuye pepi na mfa. Yakopo akurumana shipara shendi atu mutwe wendi, pa mpango atongamene Karunga. ²² Lipuro kwa renkitire Yosefu, Opo akalire pepi namfa dendi, aghamba vya kuhamena mudiru wava Isragheli ntani ghuye ava tanter weni omo ngva ruwana vifupa vyendi. ²³ Lipuro kwa renkitire vakurona va Mosesa, opo va mushampurukire, va muhoreke makwedi matatu mukonda vamoneshi mwanuke wa muwa, vapire kutjira veta ya Faragho. ²⁴ Lipuro kwa renkitire Mosesa opo akulire, ashwena kumutwenya ashi wa mona Faragho wa mukadi. ²⁵ Ghuye atoghorapo mukumuhepeka kumwe na muhoko wa Karunga kupitakana mukukara mu ruhafo rwa ndjo rwa shirugho shashifupi. ²⁶ Ghuye kwamonekire ashi, lishwaghu mwa Kristusa ghuye kwalimonine ashi limona lya linene unene lya pitakana ghungagho wa mu Egipite. Mukonda ashi ghuye kwa tambire mfuto ya kumeho. ²⁷ Lipuro kwa renkitire Mosesa atunde mu Egipite. Ghuye kapi atjilire ghugara wa Hompa, ntani akara na lididimiko yira ndjeghu amonino Karunga wa kupira kumoneka. ²⁸ Lipuro kwa renkitire vatameka kudana shilika sha Paska kumwe na kumwayera honde, kumavero mposhi mudipayi wa vanuke vambeli apire kuguma mbeli dadirume dava Isragheli. ²⁹ Lipuro kwa renkitire va Isragheli vavindakane mulifuta lya ligeha yira livhu lya likukutu. Ano ngoli va Egipite opo vakambadalire kuvindakana ava fu kumema. ³⁰ Lipuro kwa renkitire makuma gha Jeriko ghabomaghuke, opa vayi kundurukire mayuva matano-namaviri. ³¹ Lipuro kwarenkitire Rahaba wa runtjo apire kufa kumwe na vantu va urunde, mukonda ghuye kwa tambulire na kuhoreka vakafumu vaviri. ³² Vinke vya vingi ovyo tuvura kughamba? shirugho kapi shitu pulitira nkene tughamba vyakuhamena kwa Gidyoni, na Baraka, na Simisoni, na Jefuta , na Ndafita, na Samwel ntani vya kuhamena va porofete. ³³ Lipuro kwa renkitire vafunde virongo, va ruwanene ghuhungami, ntani vawane matwenyidiro. Vavo kwapatire tunwa twava nyime, ³⁴ ava dimita mundiro wa nkondo, avaparuka lighonga lyavanankore, ava veruka kumaghuvera gha kukushuva-shuva, ava wana nkondo da kurwa vita. ntani ava wana nkondo da kufunda vana nkore vavirongo peke. ³⁵ Lipuro kwa renkitire vaka mali va mone vakafumu vavo vakavhumbuke mumfa. Vamwe kwava hepekire unene, ngoli ava shwena kukutapa ashi, nampili vafe ngava vhumbukira monyo waghuwa wa kupitakana wa pa livhu. Vamwe kwava hepekire unene, ngoli ava shwena kukutapa ashi, nampili avafu ngava vhumbukira monyo waghuwa wa kupitakana wa pa livhu. ³⁶ Vamwe kwava shentjire na nakuvashepura, na kuva manga namauketanga kumwe na kuvatura mudorongo. ³⁷ Vamwe kwava dipayire namawe. Vamwe kwava dipaghire nakuvataghura mukatji. Vamwe kwava dipayire namaghonga. Vamwe kavarenda-rendanga. vavo kudwata vipapa vya ndjwi na vimpendje. Vamwe kwa kalire muruhepo, kwava hepekire, nakuvaruwana mwamudona. Matjangwa ghamwe kwa tanta ashi, kwava dipaghire namawe. Nakutaghura marutu ghavo mukatji. kwakalire mumasheteko ghamanene. Kwava dipayire namaghonga. ³⁸ Udjuni kapi wava wapilire. Vavo kava renda-renda nga mumburundu na kuma ndundu, kumarupako na kumakwina ghamulivhu. ³⁹ Ovano navantje kwafumanine unene mukonda yalipuro lyavo, vavo kapi va wanine matwenyidiro ghavo. ⁴⁰ Karunga kwatu pungulira vininke vyaviwa, ghuye kapi ashanine ashi vavo vatikitemo shiruwana shavo shalipuro atwe twahana kukarapo.