¹ Amman a zəgina sau: i damak zaman ndaye dlama sartu kabine tlapar. ² Ndawa a dlaɓa nakshi nda ntu aɗakshi, ndak ntu dagwda, ndak aro marəm, ndak dlǝmiɗ dlugun Sǝku, ndak muwa ma'yawaucin shi, ndak kuri godeta, na ndak aipu. ³ Adlaɓa nakshi na mugurum bai, ndak jiba ndawa ii gəshakshi, ndak rubu-rubu, na jǝba aɗa bai, ndak tarzuma, ndak kuri be bǝlan. ⁴ A dlama nakshi ndak ta zǝger, nda aɗa gauɗak, ndak arro marəm, ndak ntu bik bədlaɗu ii kǝma na ntu Sǝku. ⁵ Akshi a dlaɓa na gǝnawa ɗǝga Sǝku, amman a dlama na gamɗaya na kərmi gu. A gwapina naci dari zaɗak ndangu. ⁶ I A kunakshi na ndawa jǝgab wara a təfa ii wunduwawin a gizatak amatin wara gagərayak bai. Jandu ne amatin wara ganiyak na aipu, gwapənakshi ke da ɗak dǝvu gaɗa ntu be damadama kə arokshi. ⁷ Amatu tuku a jiba gugzau, amman ngalte a ayana akshi ii zǝgi jirewa bai. ⁸ Ka ki mi Yannisu na Yumbirisu dlam gamɗaya na Musa. Kasǝn ke malamcin papiya tuku fatawanke a gamɗaya na jirewa. Akshi ne ndawa wara gəshakshi gadləmatak, gabshu ii kunu bari jirewa. ⁹ Amman akshi aya pǝɗǝm bai. Atəro dləɓgənakshi a vǝrayin gara ii patata ii tiye, kakə ndatiwu. ¹⁰ Amman ci tən, ka ɗəgəna be mi na gugzi ci, na halga, na be mi na ɗawi kəma ga, na bari jirewa ga, na irɗi tir ga, na ntuta ga, na kanadi ga. ¹¹ gǝzata, na kabine, na mak be mi wakatu na iyu ii Antakiya, na Koniya, na Listra cham. Na dəmana sa gǝzata mak. Amman i kunu makshi Mǝgǝngyi rra na Iyu. ¹² Ndawa mak wara ancu da dlam mbasu kə nakwana ii kun Masipu aye sa gǝzata. ¹³ Nda kəmangar na ndak lǝvata ke a dlaɓa nakshi gaɓshu tlapar. A jǝba ɗawa ndawa ii pata. Akshi na aɗakshi ke nda jǝba ɗawa nakshi ii pata. ¹⁴ Amman ci tən, aci kǝma na be wara ka gugzu zam kabar na jirewa na gǝshi gayi. Ka zǝgana ndawa mi ka gugzu da rikshi. ¹⁵ Tən ci mayim gamgam ka zəgana kakkadi tuku mi go aipu. Jandau a dumuna dlaɓa na ci baci zǝgaya gaɗa rra ii bari jirewa i kun Masipu Yeso. ¹⁶ Mak rama Sǝku da fiya dari gəri. Na paiɗa gaɗa gugza, gaɗa kasakta, gaɗa ɗaɗam kuru gaɗa lǝma ii kunu adalta. ¹⁷ Su tuku gaɗa nǝn Sǝku da dlaɓ gazgayak tlapar, ga sapratak gaɗa duk wana bǝlan.