¹ To Nunuwa Səku ramdi patata maya, i damak zaman ndo jəgab a dlakdanakshi da ɗak jirewa, dampina ankal shi iɗak nunuwa ləspər ndak pi ankal na gugza aljan, ² i kun papiya na munafukkwina. Gishakshi a dlaɓ gamɗak. ³ A dabta na ziba na gini bikta wara Səku dlamu gaɗakshi da ɓəri na sambarkata i gadavak ndak bari jirewa wara zigana jirewau. ⁴ Atəro mak be wara Səku dlamu ro bəlan. Gaɗa mak be wara wagənu na sambarka akunu, kalkal bai wa kuri. ⁵ Atəro nda ɗəvaru dari ramak Səku na magita. ⁶ Ka tani bitku i yaganauccin nin, ka dlaɓa naci guzuɓ jirewa ki Masipu. Atəro ndatka ləma ci na ramak bari jirewa na gugza bəlan wara ka ɗəgau. ⁷ Amman akurina labar duniya wara gwanguraucin ammatu antutau. Gaɗa kasən se ka gabɗi adaci ikunuk be wara kə Səku. ⁸ Gaɗa gugza wana təka na paida bai. Amman be wara kə Səku na paida i kunu be tawanke. Atiro ikunu gara na alkawar gaɗa aro təku na aro wara ani. ⁹ Ramatuku ki jirewa bata nda gəndu mak. ¹⁰ Be dawu kenen ja wana tuku tlapar. Gaɗa jana dawak aro kunuk Səku baci aro, baci rak ndawa mak, amman musamman ndak bari jirewa. ¹¹ Arami ka gugzi bituku. ¹² Ka kasakta bai tiye da muwi mapəndikwina ci. Gaɗa kasən a dlab naci bi gugza ii ndak ɗəga, iri rama, na hal, na ntau, na jirewa na kunu gayi ke. ¹³ Har se na dew, karɗa bai na karatu, na wazik, na gugze ndawa. ¹⁴ Ka ngesta bai na bari me ci na atu, wara nda bari ci darik nabikwina lakwtu wara gazgaraucin barkawati ci. ¹⁵ Ankalci na bitiku. Da dlaɓa a kunakshi, Gaɗa takəma ci da dlaɓ dazgaya irik tike. ¹⁶ A shalina aɗaci na gugza mi ka dlamau. Karɗa bai na jandau. Gaɗa darik dlamo kasən ka rana aɗaci na ndak kərəmta ci.