¹ Panuma ya ifi fintu naliloleshe, kabili namwene icibi icakwisuka mu mulu. Ishiwi lya intanshi ilyo naumfwile lyalikulanda kuli nebo kubati lipenga, likolanda ati, "Isa kuno, kabili nkokulangishe ififwile ukucitika panuma ya ifi fintu." ² Pa mukumofye nali mu mupashi, kabili nalimwene kulya icipuna ca bufumu nacibikwa mu mulu, ninshi palikele no muntu. ³ Noyo uwaikelepo alikumoneka kubati libwe lya yaspa na kaneliani. Kwali no mukola mfula washingulwuke icipuna ca bufumu. No mukola mfula walikumoneka kubati libwe lya emerodi. ⁴ Ukushinguluka icipuna ca bufumu kwali nafimbi ifipuna amakumi yabili na fine, nabaikele pafipuna filya bali bakalamba amakumi yabili na bane, abafwele insalu ishabuta, ne filongwe fya golide pamitwe yabo. ⁵ Pacipuna cabufuma palifumine ukubyasha kwa nkuba, ukubuluma no kupona kwa tulumba. Inyali cinelubali shalikwaka kuntashi yacipuna cabufumu, inyali cine lubali ishali mipashi shakwa Lesa. ⁶ Kuntanshi ya cipuna cabufumu pali bemba wa cilolani, nga icakubengashima. Pakati kacipuna ukushinguluka icipuna kwali ifibumbwa fya mweo fine, sululu na menso, kuntanshi na kunuma. ⁷ Icibumbwa ca mweo cantashi caali kubati ni nkalamo, icabubili ici bumbwa ca mweo caali kubati kana ka ng'ombe, icabutatu icibumbwa ca mweo calikwete icinso ca muntu, ne cabune icibumbwa ca mweo cali kubati ni kapumpe ulepupuka. ⁸ Ifibumbwa fya mweo fine cilacimo calikwete amapindo mutanda, ifyakwisulamo na menso pamulu na mwisamba. Ubushiku na kasuba tafileka ukulanda ati, "Wa mushilo, wa mushilo, wa mushilo, ni Shikulu Lesa wamaka yonse, uyo waliko, uulipo, kabili uukesa." ⁹ Lyonse ilyo ifibumbwa fya mweo fikopela ubukata, umucinshi, na matotelo kuwaikala pa cipuma ca bufumu, uyo uwikala umuyayaya na pe, ¹⁰ abakalamba amakumi yabili na bane bawa panshi pa waikala pa cipuna ca bufumu no kumushinshimuna umuyayaya no muyayaya. Babika ifilongwe fyabo panshi ya cipuna cabufumu,ukusosa ati, ¹¹ "Mwalilinga mwebo, mwe Shikulu kabili Lesa wesu, ukupokelela ubukata no mucinshi na maka, pantu nimwe mwabumbile ifintu fyonse, kabili kukufwaya kwenu eko fyabeleleko no kubumbwa."