¹ Nolu nalimwene umulu upya ne sonde lipya, pantu umulu wa ntanshi ne sonde lya ntashi filipitile, na bemba tasangilwepo. ² Nalimwene no musumba uwashila, Yelusalemu mupya, uwaikile ukufuma mu mulu kuli Lesa, uwapekaniwa kubati ni nabwinga uwa wamina umulume wakwe ³ Nalyumfwile ne shiwi ukufuma ku cipuna ca bufumu likolanda ati, "Moneni! Ubwikashi bwakwa Lesa bwaba pamo na bantunse, kabili akulaikala nabo. Bakaba abantu bakwe, kabili Lesa umwine akalaba nabo kabili akaba Lesa wabo. ⁴ Akakumuna ifilamba fyabo fyonse mu menso yabo, ne mfwa tayakabeko nakabili, nangula ubulanda, nangula kulila, nangula ku kalipwa. Ifya kale filipitile. ⁵ Uyo uwali naikala pa cipuna ca bufumu alilandile ati, "Moneni! Nalenga ifintu fyonse ifipya." Alilandile ati, "Lemba ifi pantu ifi fyebo fya cishinka kabili fya cine." ⁶ Alilandile kuli nebo, "Ifi fintu naficitwa! Ninebo Alifa na Omega, ukutendeka kabili impela. Kuli uyo ali ne cilaka nkomupela ukunwa ukwabulo kushita ukufuma ku kamfuku mfuku ka menshi ya mweo. ⁷ Uyo ukacimfwa akapyana ifi fintu, kabili nkaba Lesa wakwe, kabili akaba umwana wandi. ⁸ Lelo kuli ba camwenso, abashitetekela, abaselausha, ba kepaya,abalalelale, indoshi, abapepo tulubi, na bonse ababifi, icifulo cabo cikaba muli bemba wa mulilo wa libwe lya mingu. Iyi emfwa ya cibili." ⁹ Umo uwa muli ba malaika cine lubali alishile kuli nebo, untu akwete inweno cine lubali ishaisulamo ifinkunka cine lubali ifyakulekelesha, kabili alilandile ati, "Isa kuno. Nkokulanga na bwinga, umukashi wa Mwana wa Mpanga." ¹⁰ Nolu alinsendele mu mupashi ku lupili lukalamba kabili kulwakusansuka kabili alindangile umusumba wa shila Yelusalemu ukoikila ukufuma mu mulu kuli Lesa. ¹¹ Yelusalemu alikwete ubukata bwakwa Lesa, ne cengelo cauko cali kubati cisamo caluma umutengo, kubati libwe lya Krustali ilya kubeka nga yaspi. ¹² Yalikwete ilinga ilikalamba ne cibuamba icitali icali ne mpongolo ikumi na shibili, na ba malaika ikumi na babili pa mpongolo. Pa mpongolo palilembelwe amashina ikumi na yabili aya bana bakwe Israeli. ¹³ Ku kabanga kwali mpongolo shitatu, ku kapinda ka kukuso impongolo shitatu, ku kapinda ka kulyo impongolo shitatu, na ku masamba impongolo shitatu. ¹⁴ Icibumba ca musumba calikwete imifula ikumi na ibili, napa mulu washiko pali amashina ikumi na yabili aya batumwa ba Mwana wa Mpanga. ¹⁵ Uyo alikulanda na nebo alikwete umwando wakupiminako uwapangilwe na golide ku kupima umusumba, impongolo shauko, ne cibumba cauko. ¹⁶ Umusumba washimpilwe mu fifutu fine ifya kulingana, ubutali bwauko wali kulingana no bwipi bwauko. Alipimine umusumba ku mwando wa kupiminako, nalimo bamailosi amakana ikumi na yabili mu butali (ubutali, ubwipi, no kulepa fyalilingene). ¹⁷ Alipimine ne cibumba cauko, 144 imikono ukutikama mukupima kwa buntunse ( ukuli kabili ekupima yakwa malaika). ¹⁸ Icibumba calikulilwe na Yaspi no musumba wa golide uwafikapo, kubati cilola icalengama, ¹⁹ Imifula ya cibumba yalipulamikwe ne misango yonse iya libwe ilya uma umutengo. Ilya ntanshi ni Yaspi, ilya bubili ni Safiri, ilya citatu ni Kelkedone, ilya cine ni Smaragidi, ²⁰ ilya cisano ni sardonukisi, ica mutanda ni sardi, ilya cine lubali ni Krusoliti, ilyakulenga cine konse konse ni beruli, icalenga pabula ni topashi, icalenga ikumi ni krusoprashi, ilyakulenga ikumi na limo ni uakinti, ne lyakulenga ikumi na yabili ni ametusti. ²¹ Impongolo ikumi na shibili ni ba margariti ikumi na babili; cila mpongolo yapangilwe ukufuma kuli margariti umo. Imisebo ya musumba ni golide uwafikapo kubati cilola icalengama. ²² Nshamwenemo itempele mu musumba, ico Shikulu Lesa uwa Maka yonse no Mwana wa Mpanga etempele lya uko. ²³ Umusumba tawali kukabila akasuba nangula mweshi ukulausanikila pantu ubukata bwakwa Lesa bwali kusanika pali wena, ne nyali ya uko Mwana wa Mpanga. ²⁴ Inko shikalakwenda no lubuto lwa ulya musumba. Ishamfumu sha pesonde shikaleta ubukata bwa shiko mukati. ²⁵ Impongolo sha uko tashakesalwepo akasuba, kabili tabwakalekwila mulya. ²⁶ Bakaletamo bukata no bucindami bwa nko, ²⁷ lelo takuli nangu cimo icakukowela icikengilamo mulya, nangula onse uukocita ifyakuseleusha napamo ifyakubepa, lelo kano fye abo amashina yabo yalembwa mu Citabo ca Mweo ica Mwana wa Mpanga.