¹ Nolu malaika alindangile umulonga wa menshi ya mweo, ayakubengeshima kubati ni krustali. Yalikufuma mu cipuna ca bufumu cakwa Lesa naku Mwana wa Mpanga ² ukupita pakati ka musebo wa musumba. Kuli cila lubali lwa mulonga kwali icimuti ca mweo, cikotwala ifisabo ikumi limo na fibili ifya misango, kabili calikutwala icisabo caciko cila mwenshi. Amabula ya cimuti ya bundapishi bwa nko. ³ Takwakatale akuba icitipu nangu cimo. Icipuna cabufumu bwakwa Lesa no Mwana wa Mpanga cikaba mu musumba, na babomfi bakwe bakalekumupyungila. ⁴ Bakamona icinso cakwe, ne shina lyakwe likaba pa mpumi shabo. ⁵ Takwakabe nakambi ubushiku, tabakalekufwaya lubuto lwe nyali nangu lubuto lwa kasuba pantu Shikulu Lesa akalekubengeshima pali bena. Bakalekuteka umuyayaya no muyayaya. ⁶ Malaika alilandile kuli nebo, "Ifi fyebo fya cishinka kabili fyacine. Shikulu, Lesa wa mipashi ya bakasesema, alitumine malaika wakwe ukulangisha ababomfi bakwe ifikofwaikwa ukucitikwa bwangu." ⁷ "Mona! Nkoisa bwangu! Alishuka uyo uukobela ifyebo fyabusesemo ifya citabo ici." ⁸ Nebo, Yohane, ninebo uwalikumfwa no kulekumona ifi fintu. Ulo nalikufyumfwa no kufimona, naliwile panshi kukushinshimina pa makasa yakwa malaika uwali akonanga ifi fintu. ⁹ Alilandile kuli nebo, "Wicita ico! Nebo ndi mubomfi munobe, naba wenu ba kasesema, nabo bonse abanakila ifyebo fya citabo ici. Shinshimuna Lesa!" ¹⁰ Elo alandile kuli nebo, wikakatikapo pali ifi fyebo fyabusesemo bwa citabo ici, pantu akashita kali mupepi. ¹¹ Uutakocita ubulungami, muleke alekutwalilila ukucita ifitali fyabulungami. Uyo umusali ku mutima, muleke alekutwalilila ukubo musali ku mutima. Uyo uwakulungama muleke alekutwalilila ukucita ifyakulungama. Uyo uwa mushilo, muleke alekubelelela ukubo wa mushilo." ¹² " Mona! nkoisa bwangu. Icilambu candi cili na nebo, ukulambula cila umo ukulingana ne ficitwa fyakwe. ¹³ Ninebo Alifa elo na Omega, uwa ntanshi kabili uwa kulekelesha, intendekelo kabili impela. ¹⁴ Abakushuka ni abo abacapa amalaya yabo pakwebati bakakwate insambu sha kulya ku cimuti ca mweo no kwingila mu musumba ukupitila pa mpongolo. ¹⁵ Kunse kwabe mbwa, indoshi, ababulalelale, abamisoka, abapepo tulubi, na onse uwatemwa no kucita ifyabufi. ¹⁶ Nebo, Yesu, nditumine malaika wandi ukushimika ubunte kuli mwebo pali ifi fintu pa nkuta. Ninebo mushila kabili ubufyashi bwakwa Dabidi, ulutanda ulubalika ulucelo." ¹⁷ Umupashi na nabwinga balanda ati, "Isa!" Lekeni onsefye ukoumfwa alande ati, "Isa!" Onsefye uuli ne cilaka, lekeni ese, na onsefye ukoyafwaya, mulekeni apafye abule amenshi yamweo. ¹⁸ Nkosoka kuli onse uukoumfwa ifyabo fya busesemo bwa citabo ici: Umfwa uuli onse alundapo pali yena, Lesa akalundapo pali ena ifinkunka ifyalembelwepo muli ici citabo. ¹⁹ Umfwa umo afumyapo pa fyebo fya citabo ici ifya busesemo, Lesa akafumyapo icakaniko cakwe mu cimuti ca mweo na mu musumba wa mushilo mufyalembwapo mu citabo ici. ²⁰ Uyo ukoshimika ubunte kuli ifi fintu alanda ati, "Eee! Nkoisa bwangu." Ameni! Isa, Shikulu Yesu! ²¹ Ukusenaminwa kwakwa Shikulu Yesu kube namwebo bonse. Ameni.