¹ Nalyumfwile ishiwi ilikalamba ukufuma mwi tempele no kulanda kuli bamalaika cinelubali ukweba ati, "kabuyeni muye mwitile pa calo inweno cine lubali ishabukali bwakwa Lesa." ² Malaika wakubalilapo alile kwitila ulunweno lwakwe pe sonde; ifibenga ifyabubi kabili ifikali fyaliponene pa bantu abakwete ululembo lwa ciswango, abo abalikupepa icimpashanya caciko. ³ Malaika wabubili alitile ifya mulunweno lwakwe muli bemba. Yalyalukile umulopa, kubati mulopa wa muntu uwakufwa, ne ca mweo conse muli bemba califwile. ⁴ Malaika wabutatu alitile ulunweno lwakwe mu mimana na mu tumfuku-mfuku twa menshi, kabili shalyalukile umulopa. ⁵ Nalyumfwile malaika wa mu menshi akolanda ati, "Muli bakulungama- mwebalipo kabili mwebaliko, mweba mushilo - pantu mulipingwile ifi fintu. ⁶ Pantu balitile umulopa wa bantu abashila naba kasesema ba kwa Lesa, mulibapele umulopa ku kunwa; cakulinga kuli bena." ⁷ Nalyumfwile icipailo cayasuka, "Ee,Shikulu Lesa wa maka yonse, ifyabupingushi bwenu fya cine kabili fya bulungami." ⁸ Malaika wakulenga bune alitile ifya lunweno lwakwe pa kasuba, kabili kalipelwe isambu shakoca abantu no mulilo. ⁹ Balipile ne cikabilila icikalamba, kabili balipontele ishina lyakwa Lesa, uwa maka pali ifi finkunka. Tabalapile nangu ukumupela ubukata. ¹⁰ Nomba malaika wakulenga busano aitile ulunweno lwakwe pa cipuna ca bufumu bwa ciswango, kabili imfifi yalifimbilre pa bufumu bwaciko. Balisumine indimi shabo pa mulandu wa bukali. ¹¹ Balipontele Lesa wa mu mulu pa mulandu wabukali ne filonda, nalyo line balikene ukulapila kumibele yabo. ¹² Malaika wa kulenga mutanda aitile ifya mu lunweno lwakwe mu mumana uukalamba uwa Yufrate. Amenshi yauko yalyumine pa kupekanya inshila yaba shamfumu abo abali no kufuma ku kabanga. ¹³ Nalimwene imipashi yakukowela itatu iyo iyalikumoneka kubati fyula ikofuma mutunwa twa cisoka, utwa ciswango, notwa ba kasesema wa bufi. ¹⁴ Pantu mipashi yakukowela iyalikucita ifisungusho fya fipapusho.Balikuya ku mfumu sha pesonde lyonse mukwebati bakolongane capamo ku bulwi pa bashiku ubukalamba ubwa kwa Lesa wa Maka yonse. ¹⁵ ("Mona! nkoisa kubati mupupu! wakupalwa uulola, uufwala amalaya yakwe pakwebati tendele ubwamba kabili pakwebati tabamwene ifyamusebanya ifyabwamba bwakwe.") ¹⁶ Balibaletele pamo pa cifulo icitwa Armagedone mu ciHebere. ¹⁷ Nomba malaika wakulenga cinelubale alitile ifya mu lunweno lwakwe mu mwela. Nolu ishiwi likalamba lyalifumine mwi tempele na ku cipuna ca bufumu, likoeba ati, "cilicitilwe!" ¹⁸ Kwali no kumyansha kwa nkuba, amapate, ukushenkana kwa mibulukuto, elyo ne cinkukuma icikalamba-icinkukuma icikalamba ukucila pali fyonse ifyacitika ukufuma apo umuntu abela pe sonde, eco icinkukuma calikulile. ¹⁹ Umusumba ukalamba walyakanishiwe mufiputulwa fitatu, ne nko shonse imisumba yaliwile. Nomba Lesa alibukishe Babele apakalamba, kabili alipele ulya musumba ulukombo ulwaikwisulamo umwangashi uwapangilwe ukufuma ku bukali bwakwe ubwacipyu. ²⁰ Icishi conse califuminepo, elyo ne mpili tashasangangilwe. ²¹ Amabwe ayakalamba, ayafinine kwati litalanta, yafumine mumulu nokuponena pa bantu. balipontele Lesa pa cinkuka camabwe pantu cilya cinkuka calibipishe.