¹ Nomba nalimwene malaika uwamaka akofuma mu mulu. Alifwele ikumbi, no mukola mfula washingulwike pa mutwe wakwe. Icinso cakwe calikumoneka kubati kasuba na makasa yakwe yali kubati lubingu lwa mulilo. ² Alikete akalupapulo, akanono ako akali akaisuka mu minwe yakwe. Abikile ukulu kwakwe ukwa kukulyo muli bemba no kwakukuso pa mushili. ³ Nomba alibilikishe mwishiwi ilikulu kubati ni nkalamo iikobuluma. Ilyo abilikishe ,ifibulumo cine lubali fyalifumishe ifiunda fyafiko. ⁴ Ilyo utulumba cine lubali twasosele, nali no kutendeka ukulemba, lelo nalyumfwile ishiwi ukufuma ku mulu likoti, "Kakatikeni ifyo ifibulumo fine lubali fyasosa. Wilemba." ⁵ Nomba malaika namwene uwaiminine pe sonde alimishe ukuboko kwakwe ukwa ku kulyo ku mulu. ⁶ Alapile pali uyo uwaikala umuyayaya no muyayaya, uwabumbile umulu na fyonse ifyabamo, isonde na fyonse ifyabapo,na muli bemba na fyonse ifyabamo kabili malaika asosele ati, "Takwakabepo ukukokola. ⁷ Lelo pa bushiku ilyo malaika walenga cine libali alino kulisha ipenga, nolu icankama cakwa Lesa cikafikilishiwa, ngefyo abilishe imbila isuma ku babomfi bakwe bakasesema." ⁸ Ishiwi naumfwile ukufuma ku mulu lyasosele kuli nebo nakabili: "Kabuye,bula ulupapulo ulwaisuka ululimu muminye yakwa malaika uwiminine pali bemba na pa mushili. " ⁹ Nomba naile kuli malaika no kumweba ukumpela akalupapulo akanono. Asosele kuli nebo , "Senda ulupapulo no kulya. Lukolenga munda yobe ukulula, lelo mukanwa kobe yalikolowa kubati buci." ¹⁰ Nalibulile akalupapulo akanono ukufuma mu minwe yakwa malaika no kulya. Lwali ulwalowa kubati buci mu kanwa kandi, lelo panuma nalya munda yandi mwalilulile. ¹¹ Nomba umo asosele kuli nebo, "Ufwile usesema nakabili pa bantu abengi, inko, indimi ne shamfumu."