¹ Nomba pakwisa kwa kwa Shikulu Yesu Kristu no kulongana ukwa kuba nankwe, tukomupapata apakalamba, mwe bamunyinefwe, ² ukwebati mwitelentenshiwa nangu ku tentulwa, cibe ku mupashi nangu ku cebo, nangu fye ku nkalata iikomoneka ukufuma kuli fwebo, pa mulandu wa kwebati ubushiku bwa kwa Shikulu bulishile akale. ³ Mwileka muntu amubepe munshila iili yonse. Pantu tacakese mpaka ubusangu bukese no muntu wa bupulumushi akasokoloke, umwana wa boni. ⁴ Uyu e uyu uukanya kabili uuisansabika umwine pali conse icitwo mulungu nangu icishinshimwa. Ecalenga, alekwikala mwitempele lya kwa Lesa no kulekuitunga umwine kubati e Lesa. ⁵ Bushe tamukoibukisha ukwebati ulo fye nali na mwebo nali mukumweba ifi fintu? ⁶ Nomba mwalisakwishiba icicilikila ukusokololwa kwakwe, apo akesa kusokoloka panshita ya kulinga. ⁷ Pantu icankama ica bupulumushi cicili cikobomba, kanofye umo amucilikisha mpaka afumishiwa mu nshila. ⁸ Nolu umupulumushi akasokololwa, uyo Shikulu Yesu akepaya ku mupu wa mukanwa kakwe no ku mucita icafye ku kusokololwa kwa kwisa kwakwe. ⁹ Ukwisa kwa mupulumushi kukaletwa umwabela ukubomba kwa kwa Satana mu maka yonse, ne fishibilo, ne fipesha mano fyabufi. ¹⁰ na ku fyabubifi fya misango yonse ifibepa abo bonse abakoonaika, pantu balikene ukutemwa icishinka noku pusukilamo. ¹¹ Pamulandu wa ici Lesa akobatumina amaka ya kubafulunganya pakwebati basumine ifyabufi ¹² kabili ukwebati bonse abo bakasekwe abatasumina icine lole mucifulo cakwebati basumine icishinka balitemwa ukucite ifyabubifi. ¹³ Lole tufwile ukupelo amatotelo kuli Lesa pali mwebo, bamunyinane abatemwikwa bakwa Shikulu, pantu Lesa alimisalile nge fisabo fya kubalilapo ukupusuka ukupitila mukusangululwa no mupashi no kucetekela mu cine. ¹⁴ Alimikutile kuli ifi ukupitila mu mbila nsuma yesu, pakweba ati mukwate ubukata bwa mfumu Yesu Kristu. ¹⁵ Eco kanshi, mwe bamunyinane, iminineni ndi no kwikatisha ifishilano ifyo mwasambilishiwe, libe ni ku cebo nangu fye muli kalata wesu. ¹⁶ Nomba Shikulwifwe Yesu Kristu umwine na Lesa Shifwe, uwatutemwa kabili uwa tupela ukusansamuka kwa muyayaya ne subilo lyabune ukupitila mu kusenaminwa, ¹⁷ basansamushe no kukoselesha imitima yenu mu milimo yonse iya bune ne cebo.