¹ ene ka po vuvnoi darang yen dok ti ta shaklo parlau, tida bambiri kpindi-kpindi ta pirii, Maryamu Magdaaliya in waru ku duwoi in we gbumloo sheela po duwoi. ² Nang tei in yuru yoba we war shikno Shimon Biiturush kan shikno mo an yiu shubet ye Yeesho leka shii, in tewon ti shinui, "Shinui foraan Fo-mina ti ta duwoi, minaa peno piree ye shinui liyaan shiim." ³ Nang ma Biiturush kan mondok an yiu shubetni in koo war ku duwoi. ⁴ Yuwaa yobai ka shaayi, mondok an yiu shubetni in be Biiturush in fooro ku duwoi ka toom. ⁵ Nang in tuwo dooni in we lannai lii ti waani, pene a ri ta duwoi ta shiim. ⁶ Shimon Biiturush in foottu ka biini in wa ri ta duwoi.In we shik lannai liyani ti po teerei ⁷ kan lanna ye dakan kuuni. A liin ti jele lanna ye yelek-yelekim ligo doi in li te dokro. ⁸ Nang mo dok ti shakki an yiu shubetnii, mo foonna ku duwoi ka toomi, in ri ta shii, in we shiki in kumi. ⁹ We foottu wende a peno ti ta paaro Yamma ya ta illoni ti ta duwom. ¹⁰ Nang me an yiu shubetni in meeju minaju birang. ¹¹ Pene Maryamu sherero ti jele duwoi ti pewe in ti yuun kwii. Maa ti ya kwii, nang in tuwon dooro ta duwoi. ¹² Nang in we shik malaiika palau kan ween pe deeju dii, mondok ti po li kwi, mondok ti po shuba shoi ti piree liaan kumano Yeeshoi. ¹³ Shinui in tel tei, "Poomun, shi ta kunngo wen?" in liginno ta tei ti shinui, "Longku shokraa Fo-mina ta shinui, naa peno pirinnee ye liyaan ta shinuiim." ¹⁴ Bara ye teka ka te, in shiru doro in we shikno Yeesho sheerin ti po teerei, pene a peno yaa Yeeshom. ¹⁵ Yeeshon tel tei, "Poomun, shi ta kunngo wen? shi ta gassho biino nong?" tei in nyimmina ya kaarei mo an shuran ta doongi, nang in tewon ti shi ya, "Anshubet, maa shaara shii ma ke, teuno pirinnee ke liyaan, nen wa shokuttu." ¹⁶ Yeeshon tewon ti tei, "Maryamu." in shiwo shikro, in tewon ti shi ta po Aramaic, "Rabboni" (Ye ta tewani ka "Anshubet"). ¹⁷ Yeeshon tewon ti tei, " Mo ji tau shiknom, tidang nei ammo jeleno Fowim, pene koo shin wa tewi ti mamolonno Ne ta ammo jeleno Fonno kan Foma, Yammano kan Yammama." ¹⁸ Maryamu Magdaaliya in wa tewon ti me an yiu shubetnii, "Ne weena shikno Fo-mina," tennano we tenei shii. ¹⁹ Ka kiryippo darang no teerei, darang dok ti shakki darang parlauwi, po dangii nummani ti piree kan me an yiu shubetnii longku shewo Yawudaawa, Yeeshon waru in sherennin ti shakkijui in tewon ti shinui ya, "Kuttan sheeri ti ma." ²⁰ Ka bi tewon we te, in shuklon ta kirani kan po jele gonghoni. Me an yiu shubetnii in ya beere kping ka weyan shikno Fo-mina. ²¹ Yeeshon tewon ti shinui birang, "Kuttan sheeri ti ma. Kaa ye Fowi shunnano, ne maa ne ti po shurma." ²² Bara ye Yeesho teka we te, in fiyan shunono ti kuujui in tewi ya, "Ma yiu shoomno Yamma. ²³ Mo ma fuddaan shasshalauni, yuwaai fuddoro; mo mai fuddo shasshalauniim, shii ta diyon ka teerei a fuddanim." ²⁴ Tooma, mo ti shakki ge-palau ye, ye ti ye ka Didimush, a don shim koddi ye Yeesho wannaim. ²⁵ Digi me an yiu shubeti in tewon ti shii, "Min weya shikno Fo-mina." in liginno ta shii ti shinui ya, "ma nei wa bi teran shewo ti ta kiranim, nen liin po kirano ti zwal shewoim, nen li kirano ti po jele gongoniim, ne ta kumanim." ²⁶ Ka bi shaklo pididou me an yiu shubetni ti ta minaju birang, Tooma koddi ka shi. Yeesho in waru kaa ye po dangii nummani, in sherennin ti shakkijui, in tewi ya, "Kuttan sheeri ti ma." ²⁷ Nang in tewi ti Tooma, "Shoru po kirako ken nawin ta kirano. Shoru kirako wono ken nau po jele gonghono. Mo ko yoko an kura kumenum, yoko an kumen." ²⁸ Tooman liginno in tewon ti shii, "Fo-minano kan Yammano." ²⁹ Yeeshon tewon ti shii, "Longku ke weya shikno, ken wara kumani. Kpang yuwaro we me a wa shiknom, in kumi kan ne." ³⁰ Nang Yeesho in yuyyo we temo maam ti toom me an yiushubetni, we maam yei balilo ti ta Takadda tem, ³¹ pene ballaa tenei longku man kumi Yeeshoi Kiriti, laano Yamma, kumen kan shii ta min ma kerang ti ta shommoni.