¹ Ka biino te Yeeshon shuk shikni birang ti me an yiu shubetni ti po shiiruk Tiberiya. Tenei koko ye shukan kuunii: ² Shimon Biiturush ka shaayi shinan Tooma mo ti ye ka Didimush, Nathaniel la Cana ye ti Galili, shibono Zabadi, kan niyo palau birang me an yiu shubetno Yeesho. ³ Shimon Biiturush in tewon ti shinui, "Ne ta waraa yippo shirim." Nang in liginno ta shinui ya, "Minu ma min ta yiu biigo." In wa ri ta gong dooi ta shinui, pene a doo we ye yikka ta shinuiim yippo ding. ⁴ Pene, kan vubnoi, Yeesho sheerin ti po paali, pene me an yiu shubetni a peno ya Yeeshom. ⁵ Nang Yeeshon tel shinui, "Shibo kparin, ma kan we ye po shaani ya?" in liginon ti shii ta shinui ya, "ongngoo." ⁶ Shii in tewon ti shinui, "Ma ving ja we yippo shirimi ti ku kira temme gongii, ma ta weeru." Nang in ving jai in yegi ta po tollu longku gbe shirimi. ⁷ Nang an yiu shubet ye Yeesho leka kpingi in tewi ti Biiturush, "We tei Fo-mina." Bara ye Shimon Biiturush yaara yaa Fo-mina, in dau lanna kawoni (longku foraa lannani), in teron shikni ti ta dooi. ⁸ Digi me an yiu shubetni in warju ti ta gongii(longku a tali kan po gangro dooim, pelle tawo shik palau), in ti tollo jai kan keman shirim ti tai. ⁹ Bara ye shinui peraan ti ta dooi, in we deet shewle kan shirim liin ti kwi, kan we-ta-kele. ¹⁰ Yeeshon tewon ti shinui, "Ma warin ke peddi shirim ye ma baa yirui." ¹¹ Shimon Biiturush in wanna in tollu jai in amrin po gangroi, kemani kan gbidino shirim, shin 153, kan gberoi, a jaaro ta jaim. ¹² Yeeshon tewon ti shinui, "Ma waru ma shabbo fokma." A doo niyo ti shakki me an yiu shubetni mo telaa shii, "Duma kei nongeem?" Shinui penaa shii Fo-mina. ¹³ Yeeshon wanna, in shar we-ta-kelei, in minin ti shinui, kan shirimi birang. ¹⁴ Tenei an tat koddi ye Yeesho shuga kuuni ti me an yiu shubetni ka bi ye illa ti ta duwo. ¹⁵ Bara ye shinui shabba fokju, Yeeshon tewi ti Shimon Biiturush, "Shimon laano Yuwana, ke lekano ye yeka shema mee ya?" Biiturush tewon ti shi, "Oo ta Fo-mina, ke penaa ne lekako." Yeeshon tewon ti shii, "kang galmano me." ¹⁶ In tewon ti shii birang an palauwi, "Shimon laano Yuwaana, ke lekenaa?" Biiturush in tewon ti shii, " Oo ta Fo-mina, ke penaa ne lekako." Yeeshon tewon ti shii, "jooro ku dinnyino." ¹⁷ In tewon ti shii an tati, "Shimon laano Yuwaana, ke lekanaa?" Biiturush in yooni den longku ya Yeesho telani sho tat wende, ya, "Ke lekanaa?" in tewon ti Shii, "Fo-mina, ke penaa we ding, ke penaa ne lekako." Yeeshon tewon ti shii, "Kang dinnyino. ¹⁸ Ne tekako yen kulli, koddi ye kai la, ke ti show lannako ken war pirinnee ke leka ding, pene ma ka kooraa, kan min kirako, mondokin showko lanna in warinken piree kei lewo waranim." ¹⁹ Nang Yeesho teka we tei we shuklo peen muro ye Biiturush ta shokron Yamma. Ka bi ye teka we te, in tewi ti Biiturush, "Yiru biino." ²⁰ Biiturush in shiwo shikni in we an yiu shubet mo Yeesho lekai in ti yiu biijui, wo la mo tekan shikni kan Yeesho ti po sha wesshina ye teeka ya, "Fo-mina, ta leu tukkei nong?" ²¹ Biiturush in we shikni in tel Yeesho, "Fo-mina, la mooi ta ya wen?" ²² Yeeshon tewon ti shii, "Manaa leka shii in deeni we war koddi yene ta meeru, sheekei wen? kooru ti biino." ²³ Nang paaro te in fu ta piri ti shakki mamolon, ya mo an yiu shubet teere a ta muranim. Pene Yeeshoi tewo ti Biiturush ya an yiu shubet teerei ta muranim, pene tekai ya, "Manaa leka shii in deeni we war koddi meyanno, sheekei wen?" ²⁴ Tenei an yiu shubet mo jimraa we te, mo yuwaa balla te, min penaa jimroni yen kulli. ²⁵ Ka digi wei gbe ye Yeesho yuyyaa. Moda daa balilaa ding, Ne nyimma kubuk po kuuro a ta dum shar Takadda ye ta ballaniim