¹ Nang Pilate in shar Yeesho in yuun biro-biro. ² Me an bee deet in lau we ku arat. In showi ti kuuno Yeesho in showin lannan gakal. ³ In waru jelei ta shinui ya, "Kerangko mo diyo bak, an gup Yawudaawa!" in ti palla ta shinui. ⁴ Nang Pilate in per pewe birang in tewon ti shinui, "Ma gee, ne ta perinman ka shii man peni nei wa shii kan kelnyom." ⁵ Yeesho in peru, showii kan wo ku arat kan lannan gakal. Pilate in tewon ti shinui, "Ma gee, wono ta shii!" ⁶ Pene bara men gbidino ankpaa kan andongori weya shikno Yeesho, in alin ka yallo dik ya, "sheewo shii, sheewo shii!" Pilate in liginno ya, "ma koon ka shii man wa sheewina po kuuma, longku nei wa shii kan kelnyom." ⁷ Yawudaawan liginon ti shii, "min kan shoro, kaa ye shoroi teka shii ta tuk shii longku ne ye teka yajii laano Yamma." ⁸ Bara ye Pilate yaara paaro ye, shewon yiu shii kping, ⁹ nang in ri ta mina birang in tel Yeesho, "Ke wannai ti tong?" nang Yeeshon tooro kuuni a liginom. ¹⁰ Birang Pilate in tel shii, "ke ta yuuno paaro maa? kei peno ne kan bang foranken kira koo sheewoko maa?" ¹¹ Yeesho in liginon ya, "ke kan bang ti kuunom bara we maa minnako ti kudang. Pene, mo minano ti kei kan shasshalau yen gbo." ¹² Ti ku eleni te, Pilate in gassho koko forin kira ka shii, pene Yawudaawa in alin ka yalloi, ya, "ma kaa foraan kira ka la moo, kei an jeerono Sheejam. Konong maa yuwoni an gup ta kpakyo Sheeja." ¹³ Bara ye Pilate yaara ka te, in peru ka Yeesho in deeni ti ku juk shiire ti piree ti ye ka "Yemman shiila," pene ta po Aramaic yaa, "Gabbatha." ¹⁴ Wendei darang limyo shik longku temre telani, pelle koddi awa an paragbanang. Pilate in tewi ti Yawudaawa, "Ma gee, an gupma woro!" ¹⁵ In alin ka yalloi, "Koon ka shii won, koon ka shii won; sheewo shii!" Pilate in liginon ti shinui, "Ne sheewo an gupmai wee?" Men gbidino ankpaa liginno ya, "Mini kan an gubum bara Sheeja." ¹⁶ Nang Pilate in minin Yeesho ti shinui ka we sheewani. ¹⁷ Nang in shar Yeesho ta shinui, in peru ta shii, sharii kan gbong biro ti kuuni, wo war piree ti ye ka "piri gunglung kuu," ti ta po Aramaic ti yei ka "Golgotha." ¹⁸ In sheewo Yeesho ti po tere, gale kan niyo palau, dok ti kira temme dok ti ku kira jiyau Yeesho ti shakkijui. ¹⁹ Pilate in ya balla in tannon ti shik biro sheewii. Ballaan ya:YEESHO NIYO NAAJERET, GUP YAWUDAAWA. ²⁰ Yawudaawa gbe in maaro temo te longku piree sheewan Yeeshoi nimmi kan gokmina. Yuwa ballai ti po Aramaic, Latin kan Greek. ²¹ Men gbidino me ankpaa Yawudaawa in tewi ti Bilaatush, "Wessho ballani ka, 'Gup Yawudaawai,' pene ballo ka, 'Lamoo teka, "Nei gup Yawudaawa.'"" ²² Bilaatush in liginon, "Wee ne fuwa po ballani yuwai balloro." ²³ Bara ye me an bee deet shewa Yeesho, in pal lannai, in bwatto tai pereu, dok sheeno konong ti shakkijui; kan lannan joorini. Pene lannan joori dok a don po jaaro taim, jaklaani ka teere wee yinnan ti bong lannai we shaaru laddi. ²⁴ Nang in tewi ti shaayi, "Kama wejo jaaro tai, pene kama ving kaari, kaman pen mo ta tappo kwi." Yuwaa ka tei longku in kem paaro Yamma ye teka ya, "Shinui in bwaaro lannano ti shakkiju in ving kaari ti ku lannan joorino." Tenei wee me an bee deet yuwaa. ²⁵ Pene sherii nimmi kan po shewo Yeshoi nonni, kan molano nonni, Maryamu manna Kiloopash, kan Mary Magdaaliya. ²⁶ Bara ye Yeesho weya shikno nonni kan mo an yiu shubetni ye leka sheri nimmi, in tewi ti nonni, "Nonno, gee, laaji wono!" ²⁷ Nang in tewi ti mo an yiu shubetnii, "Gee, nonko wono!" wee yikka ti koddi teere mo an yiu shubetnii in ye tei in warin minani. ²⁸ Ka bino te, penaa we ding fuwaro longku in kemro wee balilaa ti ta paaro Yamma, Yeesho ya, "Fokno isshii." ²⁹ Ka kuluk kemi ka doo yen shwang kping dayii ti po teere, nang shinui in shar fong in showin ti ta doon shwangii, in showi ti po la biro in warin foknii. ³⁰ Bara ye doon shwangii riya ta fokno Yeesho, in tewi ya, "Fuwaaro." Shii in tumuru kuuni in foran kira ka kerangni. ³¹ Nang Yawudaawa, longku darang te we limmo shik, longku a ti wesho kuma ti ku shewo darang nesshom(Darang nessho teerei ween kpang ding), in tel Bilaatush mo beblo shojui in durin shinui ti po biro shewoi. ³² Nang me an bee deet in wa beblo sho mo an dok kan an palawi me shewa shinui kan Yeeshoi. ³³ Pene bara ye wanna shikno Yeesho, in we fuwaa po muroni, nang a beblo shonim. ³⁴ Nang, dok ti shakki me an bee deet in kpe jara-gongono Yeesho ka kash, kpantidi dom kan doo in perin. ³⁵ Mo weyaa shigi ka adooni jimraa, birang jimroni yen kulli. Penaa ta shi we ye ji teka yen kulli longku ma sheema man kumi. ³⁶ We te yuwaaro longku in kemro paaro Yamma ye teka ya, "A doo wiyakni dok ye ta belanim." ³⁷ Birang, manni paaro Yammai teka ya, "Shinui ta gee mo shin kpeyaai." ³⁸ Ka biino te, Yushubu niyo Armatiya, longku shii an yiu shubetno Yeesho(pene ka jiri longku ta shi Yawudaawa), in tel Bilaatush ka we shar kumano Yeesho. Bilaatush nang in kumin piri. Nang Yushubun wa shar kumai. ³⁹ Nikidiimu shi ma in wanna, shii mo naka war jeleno Yeesho ka yippo. In waru ka burlan mor myrrh kan aloes, pelle tirai shik-dok. ⁴⁰ Nang in shar kumai ta shinui in dau shigi ti ta lanna yen yelek-yelek kan turaalii, ka ye Yawudaawa ti yuun nanoju. ⁴¹ Pene ti piree ye shewan Shii ka doong biro; ti ta doong ye ka duwo yen fo yei nau nanin niyo ti taiim. ⁴² Longku tei darang limmo shik Yawudaawa kan duwoi nimmi, nang in liin Yeesho ti tai.