¹ Ka bi paaro ye Yeesho yuwai, in pereni kan me an yiu shubetni in teleni galung kidron, ye kan doong biro ye riyo tai kan me an yiu shubetni. ² Pene Yawuuda, mo ta pilin ka shii, penaa po teerei, longku Yeesho nunnga war po teere kan me an yiu shubetni. ³ Nang Yawuuda, yinna toom me an-bee-deet kan peddi me an toom an-kpaa kan Parishaawa, shaddi kan wulon deet, toodilen, kan shari gei. ⁴ Nang Yeesho, mo penaa we ta yooro ti shikni, in gina in tel shinui, "Ma ta gassho bino nong?" ⁵ In liginno ta shinui, "Yeesho niyo Naajeret." Yeeshon dewon ti shinui, "Nei shii" Yawuuda, mo pilaan ka shii, shi maa sherin kan me an-bee-deet. ⁶ Bara ye Yeesho tekan ti shinui, "Nei shii," in meeju ka guni in shugiyyo ti buk. ⁷ Nang in tel shinui birang, "Ma ta gasho bino nong?" in liginno birang ta shinui, "Yeesho niyo Naajeret." ⁸ Yeeshon liginno, "Ne tekama na nei Shii. Nang mamaa ta gasshani bino, ma wessho ma mee mo kooju." ⁹ Tenei longku kem paaro ye teka ta shii ya: "Ti shakki me ke minano a doo ye shugo koo dokum." ¹⁰ Nang Shimon Biiturus, ye kan agarum ti kirani, in kpaatu in kaan kumo shook an-kpaa ye ti kira temme in fororo. Shommo shook an-kpaai Malkus. ¹¹ Yeesho in tewi ta Biiturus, "Maan ka agarumi ta minaro. Ne ta yiu gurang doo ye Fowi minano nen she maa?" ¹² Nang galan ku me an-bee-det kan an toomro kan me andongori Yawuudawa, in yiu Yeesho in dawi. ¹³ In warin shii ka toom shikno Annas, longku shii an-gbarumno Keyaabas, moi mon gbo an-kpaa ta shenoi. ¹⁴ Pene wo shii Keyaapaji mo teka ya yuwa kpang mo niyo dok muru longku memme ding. ¹⁵ Shimon Biiturus in yiu bino Yeesho, kan mondok an yiu shubetni, mo an yiu shubet tere penani ti piree kan mo gbo an-kpaa, in reni ti biino Yeesho we war ta dang an-kpaai; ¹⁶ pene Biiturus shereni ti po dang ti pewe. Nang mondok an yiu shubet, mo an-kpaai penaa shii, in peru in ya paaro ti la pomun an po dangii, in riru ka Biiturus ta. ¹⁷ Nang la pomuni, mo an jooro po dangii, in tewi ti Biiturus, "Ke ti shakki me an yiu shubetno lamoo maa?" in liginno ta shii, "A nem." ¹⁸ Nang shooki kan andongori shengri ti po tere, ta shen deet, koddi ka dulaw, in ti wowwo shikju. Biiturus sherin ti jelejui, sheri ta wowwo shikni. ¹⁹ Nang mon gbo ankpaa in tel Yeesho ti ku me an yiu shubetni kan shupponi. ²⁰ Yeeshon liginon ti shii, "Ne yuwa paaro ti kubuk ti piira. kpaaliyo ding ne ti ya shuppo ti ta for-fok kan mina Yamma piree Yawuudawa ti galin. Nei tewo manni wei ka jirim. ²¹ Longku wen ye ke ta tellei? telo me yaara wee ne teka. gee, shinui penaa wee ne teka." ²² Kaa ye Yeesho teka we te, dok ti shakki me andongoori ye shengri ti po tere in paalo Yeesho in tewi ya, "Tenei wee ye ke po liginani ti mon gbo ankpaa?" ²³ Yeeshon liginon ti shii, "Manaa daklaa paaro, ken tew piree ne daklaani, pene manaa teka yen kpang, longku wen ye ke paalanoi?" ²⁴ Nang Anash in shur gunnii ti Keepash mon gbo ankpaa. ²⁵ imon Biiturush sheeri ti po shen deet. Nang memmen tewon ti shii, "Ke maa ke ti shakki me an yiu shubetni maa?" in yooni jiram ya, "A nem." ²⁶ Dok ti shakki shook mon gbo ankpaai, po peen no la mo Biiturush foraa kumoi, ya, "Naa wa shikko ti ta doongii kan shii maa?" ²⁷ Nang Biiturush in yooni jiram birang; Nang kpantidi gok in ya kwii. ²⁸ Nang in sharin Yeesho ti jeleno Keepash we war minano gup. Woroju kan vupnoi, nang a ri ta minaim, yaa longku wo shin yooju kan doon ti shikju wo shin kaano sha wesshina temre telani. ²⁹ Nang an gubi ta Pilate in peru shikjui ya, "Ma yuuna gunno la mooi ka wen?" ³⁰ in liginno ta shinui, "Moda la moo ye daa daklo wem, min daa warin shi toomkom." ³¹ Nang Pilate in tewon ti shinui, "Ma shar shii po kuuma, man wa shiiro shii ka ye shoro ma kunngan." Yawudaawa in liginon ti shii, "Minii kan kumen shiiro we tuk niyom." ³² Teka ka te ta shinui longku paarono Yeesho in kemoro ye teka ta shii peen muro ye shi ta yaani. ³³ Nang Pilate in reeni ta mina gup birang in ye Yeesho in tewon ya, "Kei an gup Yawudaawa wee?" ³⁴ Yeeshon liginon, "Tenei telyo po kuuko ya, koo memme sheerako pinno?" ³⁵ Pilate in liginno, "Nei niyo Yawudaawam, nei ya? wanna ka paaroi memmeko kan men gbidino ankpaa. Ke yuwaai wen?" ³⁶ Yeeshon liginno, "Gubnoi she kubuk tem. Moda gubno daa we kubuk te, me yuwoju shookno na neyaa no kuuno ti kira Yawudaawa. Pene wende gupnoi ti po tem." ³⁷ Pilate in liginno ya, "Kei gup ya ma kaa tei?" Yeeshon liginno, "Ke teka kpang ka nei gup. Wo longku we te ye pattannen, nangii longkurei yene rina kubuk, longku nen jimro fok kulli. Ding mo leka kulli ti yaaro eleno." ³⁸ late in tewon ti shii, "Kulli wenee?" bara ye teka kaa te, in per shik Yawudaawai birang in tewon ti shinui, "Nei wa la moo kan kelnyom. ³⁹ Pene ma kan waari maa ye koddi temre telani yuwa ne ti for ma kira ka niyo dok. Ma leka ne for ma kira ka gup Yawudaawai ya?" ⁴⁰ Nang in yallina ta shinui birang, "A la moom, penei Barnaba." Wende Barnabai mo an bang kumo.