¹ "Mo posheerima wejo daklanii. Ma kumu kan Yamma, man kumi kan ne. ² Ti ta minano Fowi ka ta dang-gume gbe. Moda daa ka tem, ne daa teka ma, longku ne ta waraa limmoma pirii longkuuma. ³ Manaa wa limmino pirii ti mai, ne ta meeru birang naa yeema po kuuno, longku piree kan ne man wa deema ti po teere. ⁴ Ma penaa dokokoi piree naa waranii." ⁵ Tooma in tewi ti Yeesho, "Fo-mina, minaa peno pirinnee ke ta waranim, min ta pen kokoi ka yaa?" ⁶ Yeesho in liginon ya, "Nei kokoi, kulli, kan kerangi; a doo mo ta war jeleno Fowi Yammam bara ti shikno. ⁷ Moda ma daa penano, madaa penaa Fowi Yamma. Wee yikka wende we war toom ma penaa shii man we shiknii." ⁸ Pilibush in tewi ti Yeesho, "Fo-mina, shukmu shik Fowi, kulang teerei in kermu." ⁹ Yeeshon tewon ti shii, "Ne diyo bak kan ma we war wende kei pennom ya, Pilibush? Ding mo weya shikno weya shikno Fowi. Ke tang tewani ka yaa ka, 'Shukmu shik Fowii'? ¹⁰ Kei kumu kan ne ti ta Fowi kan Fowi ti taano maa? Paaro yene ti yuuma a po kuunom, pene Fowi ye deeni ti taano in ya yashuranni. ¹¹ Kumu kan ne ne ti taano Fowi, Fowi ti taano, nang koo ken kumi longku shurani po kuuju. ¹² Ne teka ma yen kulli, mo kunnga kan ne ta ya shuran yeno ti ya, ta ya shuran ye yeka te longku ne ta meno jeleno Fowi Yamma. ¹³ Wee ye ma telaa ding ti ta shommono, ne ta yaani longku in shokro Fowi ti taano lai. ¹⁴ Mam maa telano koo wen ti ta shommono, ne ta yaani. ¹⁵ Mam maa lekano, ma ta yiu pegrono, ¹⁶ nang nen for-dulo ti Fonno, Shii ta minnuma manni an pegroi ye ta deeni kan ma po-ding- ¹⁷ tei shoom kulli. Kubuk a ta dum yiu shiim longku tei a ti we shikniim koo penaa shiim. Pene ma penaa shii, longku dii kan ma ta deeni ti taama. ¹⁸ Ne ta wesshoma jal mam; Ne ta meeru jelema. ¹⁹ Ta la koddi la wiu kubuk a ta we shikno birangum, pene ma ta we shikno. Longku ne kan dwei, ma ta yooma kan dwei. ²⁰ Darangno teere ma ta penani ne ti taano Fowi, ma ti taano, ne ti taama. ²¹ Maa mo yaara pegrono ni yiwi teerei mo lekano, shii mo lekanoi Fowi ta leu shii, nen leu shii birang nen shugin shikno ti shii." ²² Yawuuda(a Ishkerotim) in tewi ti Yeesho, "Fo-mina, longku wen ye ke ta shuk kuko ti minu waani a ti kubukum mi?" ²³ Yeeshon liginon ya, "Maa mo lekano, ta yiu paarono. Fono ta leu shii, min ta waru shiknii minin deenmun ti jelenii. ²⁴ Moi leunom a ti yiu paaronom. Paaro ye ma ti yaanna te a perii ti shiknom pennai ti shikno Fowi mo shunnanoi. ²⁵ Ne teka ma we te, koddi ye kama ka shaayi. ²⁶ Pene, mo an pegro - ye shii Shoomno Yamma ye Fowi ta shuru ka shommono- ta yuma shubet ti ku we ding shii ta nyimmoma wee ne tebrama. ²⁷ Ne wesshama twaalan sheeri; Ne minaa ma twaalan sheeri. Nei minui kaa ye kubuk ti minim. Mo posheerima wejo daklanii, ma wejo ya shewoi. ²⁸ Ma yaara yeno teka ma, 'Ne ta koono, nen meeru jelema.' Ma maa lekano, ma ta ya beere longku ne ta war jeleno Fowi, longku Fowi yekano. ²⁹ Wende ne teka ma in tang waraa yooro, ma yuwaro, ma ta kumani. ³⁰ Ne ta yuma paaro gbe birangum, longku an-gup kubuk te ta waru. A kan kumen ti kuunom, ³¹ pene longku kubuk in peni yano leka Fowi, Ne yuwai bara we ye Fowi tekano. Ma illo kama koomu ti po te."