¹ Wende koddi temre Teelani nennga yooro. Yeesho penaa koddini yuwaa ye shii ta wessho kubuk te ka wo ammoni jeleno Fowi Yamma. Kaa ye shii leka po sheeni ye dii ti kubuk, leka shinui po ding. ² Wende shuuro fuwaa po kem sheerino Yawuuda Ishkeroti laano Shimon mo pilin ka Yeesho. ³ Shii penaa Fowi minaa we ding ti ta kirani kan shii wanna ti jeleno Yamma ta meni birang jeleno Yammai. ⁴ Shii in illo shikni ti po sha wesshinai in for lannani. Nang in shar taawul in dawi ti gunni. ⁵ Nang in paro doo ti ta paawi in yiu fuddon sho me an yiu shubetni in ti teklon bi ka taawul ye bo daka ti gunnii. ⁶ Shii in foottu kuuno Shimon Biturush, mo Biturush ya, "Fo-mina, ke ta fuddono shono ya?" ⁷ Yeeshon liginon ti shii ya, "We ne ta yaani ye mai jemlo tidangum ka bi ma ta penani." ⁸ Shimon in tewon ti Shii, "Ke ta fuddono shonom." Yeeshon liginon, "Mana fuddokom, ke kan po aako ti piree kan nem." ⁹ Shimon Biturush in tewon ti Shii, "Fo-mina, a shono waani ye ke ta fuddanim, ding kama kirano kan kuuno." ¹⁰ Yeeshon tewon ya, "Ma mondok maa fuwaa po bino doo, leka bara fuddo shooni waani, pene shiknii ding futtani; ke futtani, pene a koo nongum." ¹¹ (Longku Yeesho fuwaa pen mo ta pilin ka Shi; nang tenei wee ye teka ya,"A ma ding ye futtanim.") ¹² Bara ye Yeesho fuwaa po shutto shoojui in shoppo lannani in meni po diyoni, Shii in tel shinui, "Ma penaa we ne yuwaa longkumaa? ¹³ Ma ti yeeno ka 'An-shubet' ma teka kpang, nei kaa tei. ¹⁴ Pene ne ma, Fo-mina kan An-shubet, nen futtoma shooma, nang ma futto sho shaayi. ¹⁵ Ne tennga ma we ye ma po yaani ka yene yuwa mai. ¹⁶ Ne teka ma yen kulli, a doo shook ye yeka fominanim; koo la an shuran ye yeka mo an shunnim. ¹⁷ Ma maa penaa we te, ta liima kpang mamaa yuwaa shunii. ¹⁸ Ne ta yaani paaroma ma dinngum; Ne penaa me no shakkaa - pene ka te ye we ballaa in kemi: 'Mo shuwaa wesshinano in shiwoni an geino.' ¹⁹ Ne ta teuma we te wendei in tang waraa yooro longku ma yuwaaro, man kumi ka NEI NEI. ²⁰ Ne teka ma yen kulli, mo yikka mono shunna yikkai ne, mo yikkano ding yikkai mo shunnano." ²¹ ra ye Yeesho teka we te, in turmoni ti ta shoom. Nang in tewi ti kudam, "Ne teka ma yen kulli dok ti shakkima ta pilani ka ne." ²² Me an yiu shubetni in yiu gejyo shaayi, ya kaare ta ya paaro tei kan nong. ²³ Dok ti shakki me an yiu shubetni, mo Yeesho leka, deeni nimmi kan Yeesho. ²⁴ Nang Shimon Biturush in tuklo mo an yiu shubet teere ya, "Telo Shii ti ya nyimmoi kan nong." ²⁵ Nang in teen shikni shikno Yeesho in tel Shii, "Fo-mina, wo nongee?" ²⁶ Nang Yeeshon liginon, "Shii mono ta shil we-ta-kele nen minin ti shii." pene in shil we-ta-kelei, in mini ti Yawuuda laano Shimon Ishkeroti. ²⁷ Birang ka bi we-ta-kelei, Shuuron reeni taanii, nang Yeeshon tewon, "Wee ke leka yaanii, yu peep." ²⁸ Pene a doo mo ti po sha wesshinai ye penaa longku wen ye Yeesho teka we te ti shiim. ²⁹ Peddi nyimmaa ya, longku Yawuuda sharii kan luru kine, Yeesho tekani, "Pillu wee kama leka longku temrei," koo mo min we ti me an kenni. ³⁰ Ka bi ye Yawuuda shuwaa we-ta-kelei, in kuman pereni peep.Ka yippo ta we tere. ³¹ Bara ye Yawuuda kookoni, Yeesho ya, "Wende shokra la niyon ding, in shokron kan Yamma ti taani. ³² Yamma ta shokro shii ti kuuni, ta shokro shii peep. ³³ Nyitti shibono, Ne ka ne ti jelema koddi la wiu. Ma ta gassho biino, ka yeno teka ti Yawuudawa, 'Piree ne ta warani, ma ta dum waranim.' Wende ne teka ma we te sheema. ³⁴ Ne ta minmai kumen yen fo, ma lewo shaayi; kaa ye no lekan ma, ma yu kaa te man leu shaayi. ³⁵ Kaa we te koo nong ta penani ya mai me an yiu shubetno, mam maa leka shaayi." ³⁶ Shimon Biturush in tewon ti shii ya, "Fo-mina, ke ta warani tong?" Yeeshon liginno, "Piree ne ta warani, ma dum yiru biino wendem, pene ma ta koorui ka bi." ³⁷ Biturush in tewon ti shii ya, "Fo-mina, longku wen ne ta yiu biigo wendem mi? Ne ta min kerangno longkuko." ³⁸ Yeeshon liginno ya, "Ke ta dum min kerango longkuuno ya? Ne teka yen kulli, gog a ta ya kwiim we war koddi ye ke ta ya jiramno sho tat."