¹ Doki shaklo paragbanang in waraa ya temre teelani, Yeesho in war Bethany, pirinnee kan Laajoro, mo Yeesho pigro shii ti ta duwo. ² Ti po teerei in ya wesshina kiryippo, Mattan ti bwayinna, pene Laajoro ti shakki me deju ti toomno Yeesho ti po sha wesshinai. ³ Nang Maryamu in shar la dundi turali yen kpang ye gijii yen tomon, in shakki ti shoono Yeesho, in teglo shoi ka shok kuuro. Giji turali in berero ta minai. ⁴ Yawuuda Ishkeroti, dok ti shakki me an yiu shubetni, ya, ⁵ "Longku wen ta daklo turaali tei a ta pilin we in bwara kinei ti me an kenni maa?" ⁶ Pene teka we te, a longku ye leka me an kenni ta shiim, pene bara ye shii anjiri. Kan la luru kinei ti kirani in jir peddi kine ye ti taii. ⁷ Yeesho ya, "Wessho tei ta li wee kan tei longku darang nanno. ⁸ Koo dimin ma ka shaayi kan me an kennii. Pene ma ta weno koo diminum." ⁹ Pene jimo Yawuudawa in yaanna ya Yeesho ti po tere, in waru ta shinui, a longkuno Yeesho waanim, penei kama waraa gee Laajoro, mo Yeesho pigroo ti ta duwo. ¹⁰ Men gbidino ankpaa in gal fokju longku shinin tuk Laajoro; ¹¹ birangii longkuni ye Yawuudawa gbe kokoju in wa kumi kan Yeesho. ¹² Ka kpaaliyo jimo yen gbe in waru po temrei. Bara ye yaara ya Yeesho ta waru Urshalima, ¹³ in shaddo pettan kira biro dabiino in waraa kpom foki in yallina kanbangi ya, "Hossanna! kpangi sheno mo wanna ta shommono Fo-mina, an gup Ishereila." ¹⁴ Yeesho in we la girbi in deenin ti kwi; kaa ye balli, ¹⁵ "Wessho ya shewoi, laano Shihiyoona; gee, an gupji ta waru, deeni ti ku la girbi." ¹⁶ Me an yiu shubetnii a peno we ta ka toomum; pene bara ye shokraa Yeesho, in nyimmina ta shinui ya ballaa we te ti kuunii kan ya yuwan we te ti shii. ¹⁷ Wende galan jimoi in tewi ya shin ka shaayi koddinee ye yiyan Laajoro ti ta duwoi in pigittu shii. ¹⁸ Birang wo longku we tei ye jimo memme peraa kpom fokii, longku ye shinui yaraa ya yuwa we maam te. ¹⁹ Parishawa in tewi ti shaayi, "Ma gee, ma ta dum ya wem; gee, kubuk kookan ti biinii." ²⁰ Wende ka peddi Elenawai ti shakki me amma ya wawoi. ²¹ Shinui in war shikno Pilibush, mo wanna ti Betshaida ye ti Galili, in tel shii, ya, "An-shubet, min leka we shikno Yeesho." ²² Pilibush in wa teru ti Andarawus; Andarawus in wanna shinan Pilibush, in wa tewi ti Yeesho ta shinui. ²³ Yeeshon liginon ti shinui ya, "Koddi wanna ye la niyon-ding ta we shokran. ²⁴ Ne teka ma yen kulli, ma ar-shau ma shuwo ti buk in ommorom, ta deeroi tei dok waani; pene ma ommaro ta peru ya ari gbe. ²⁵ Mo leka kerangni ta ving kwi; mo vinnga kerangni ti kubuk te ta liyani we war ta kerang po-ding. ²⁶ Mo ding ti wawno, mo yiru biino; piree kan ne, me an wawno ta deeju ti po tere. Ding mo ti wawno, Fono ta minin gbe ti shii. ²⁷ Wende posheerino turmaro ne ta teu wen? 'Fowi, kaurono ti ta koddi te ya'? penei longku we te yene wanna koddi te. ²⁸ Fowi, shokro shommoko." Nang ele in peru ti kudang ya, "Ne shokro tei ne ta shokrani birang." ²⁹ Nang jimo memme me shenkrii me yaara paaroi ya yuwai mirit. Peddi ya,"An shuran kudang yuunan paaro." ³⁰ Yeeshon liginno ya, "Ele te shaanai longkunom, penei longkuuma. ³¹ Shiire kubukki wendei: wende an-gup kubuk te ta ving shii. ³² Ma shokrano ti kubuk, ne ta ye koo nong ti jeleno." ³³ Shii teka we te longku shuklo peen muro ye shii ta yaani. ³⁴ Jimoi in liginon ti shii, "Min yaara ti shoro ya Kiriti ta deenii po-ding. Ke ta tewani ka yaa ka, 'La niyon-ding ta shokranii'? La niyon-ding tei nongee?" ³⁵ Yeeshon tewon ti shinui, "Aaroi bambiri ti shikma koddi la wiu. Ma yu mere tidang bambiri aaroi, kulang yippoi ta wemam. Mo ta ya mere ka yippo a peno piree ta waranim. ³⁶ Kaa ye ke kan aaroi, kumu kan aaroi longku man shiwo shibo aaro." Yeesho tebra we te in kooni in wa latto shikni. ³⁷ a ye Yeesho yuyya we maam gbe ti doojui, pene a kumu kan shiim ta shinui ³⁸ longku paarono Isheya an-pigro in kemoro, ye teka ta shii ya: "Fo-mina, kunnga paaromu kamai nong, shuklaa kumenno Fo-minai ti nong?" ³⁹ Longku we te a kumu ta shinuiim, Isheya teka birang ya, ⁴⁰ "Shii numma adoojui, in kpal posheerijui; nang wo we ka adooju in peni kaposheeriju, in shiruju, nang nen tassho shinui." ⁴¹ Isheya teka we te longku shii weya shokranno Yeesho in ya paaronii. ⁴² Pene ding ka tei, me an-gup gbe in kumi kan Yeesho; pene longku Parishaawa, shinui a tewom longku shi kaiju ti ta mina-abo. ⁴³ Legejui gbe ye memme ti minju ti kuune ye Yamma ta minin. ⁴⁴ Yeeshon tewi ka elen bang ya, "Mo kunnga kan ne, a kumii kan ne waanim ding kan mo shunnanoi, ⁴⁵ birang mo weya shikno ding weyai shik mo shunnanoi. ⁴⁶ Ne wannai ka aaro ti kubuk, longku ding mokunnga kan ne a ta diyoni ti ta dilum. ⁴⁷ Ding mo yaara paarono in kuroni yiwani, ne ta shiiro shiim; nei waru longku shiiro kubuk tem, pene ne wannai markwi. ⁴⁸ Mo kuraano moi yiu paaronom, ka an shiiro shii. Paaro yene teka ta shiiro shii koddi ilit kubuk. ⁴⁹ Ne yuwa paaro tei ka po kuunom, penei an Fowi ye shunnano, ye minnano paaro yene po yaani kan po tewani. ⁵⁰ Ne penaa paaronii kerang po-ding, tenei paaro yene teka - ka ye an Fowi tennano, Ne tekai kaa tei."