¹ Mo kilajiya muni na kwa ikwe, ni na yaco e yavalu na gauna ni vi vararawataki e na visiga mai bere. ² Ni ru na dau lomanidru ga na ecolo, eru na viavialevu, eru na dau tata vaburabura, eru na tasi varorogo vuwadru na ledru tuqwaqwa, eru na tasi vaokaoka, eru na tasi yalosavasava. ³ eru na vi buraji va viwekani, eru na dau yalayala girigiri, eru na vibeitaki, eru na tasi rewajiya ru yalo, eru na dau ocaoca, eru na dau bura jidru na tamata oka, ⁴ eru na dauvisoliyaki me ru mate, eru na dau vaivukivuki, eru na yalolevu, eru na lomaniya valevu na marau eru na lomaniya valailai na Kalou. ⁵ E ledru ga na lotu varairai, e jika i vuwako na keya djina io mo la dei mai vuwadru eru kodaki ikwe. ⁶ Ni ru na kodaki ke o rau na unu vailawaki i na viwere eru na dau rewajidru na yalewa riva e notu vuwadru na i valavala bura, eru na vagolei dei i na garogaro bura. ⁷ Eru dauvavulici, ia eru tasi rewajiya me ru kilajiya na kwa djina. ⁸ Io kodaki o Jani vata o Jabiri o rau ikwe eru dau qajiya o Mosese, eru dau qajiya kodaki muni ke na kwa djina: eru tamata yalobura, e tasi lai okaji na ledru vabaujiya, ⁹ Io eru na tasi tubu cake me ru levu: e na varaitaki" vuwadru na ecola na ledru lialia, me kodaki na ledru o rau igi. ¹⁰ o iko, dau tekuciya na lequ i vavuvuli, na lequi naki, na lequ vabaujiya, na lequ vosojiya vabalavu, na lequ i loloma, na lequ vosojiya na bura. ¹¹ na vivaburabura taki, na vivararawataki, na kwa ea yaco vuwako yau mai Anitioki, mai Ikoniona, mai Lisitira; na keya levu na vivaburaburataki aqu vosojiya; iya e vacoloniko au na Turaga mai na vikwa taucoko ikwe. ¹² Io, o rau taucoko eru na mata lotu djina vuwa o Karisito Jisu, e ru na vaburaburataki. ¹³ Ia o rau na tamata bura qanidru na dau vitemaki, eru na tubu cake me ru bura sara, ni ru dauvivacalai, eru na vacalai talega o rau. ¹⁴ Ia o iko, mo tudei i na kwa o vavulici ke na kwa e ru va djinadjina taki vuwako, nio na kilajiya se ocei e vavuliciko. ¹⁵ Ni o vo kilajiya nai vola tabu, ni o si luve, ikwe e na vavukuniko rewa mo cola nio vo vabaujiya o Karisito Jisu. ¹⁶ Ni Kalou e vavuniya nai vola tabu taucoko e yaga ikwe me i vavuvuli, me vunaujiya na bura, me vai ke na vivadodonutaki, me vai ke nai vavuvuli ni kwa dodonu. ¹⁷ Me yaco ke na tamata ni Kalou me varautu, ni vo varautaki ina valavala oka taucoko.