¹ O kiya ikwe, luvequ mo qai vakaikaitaki niko i na loloma vo notu vuwa o Karisito Jisu. ² Ia na vikwa o a varogo mai vuwako yau e ru maliwa na lewe levu e ru dauni vadjinadjina, mo soliya vuwadru na tamata yalodjina, e ru rewajiya me ru vavulicidru na tani. ³ O kiya iqoi mo dau vosojiya na bura, me kodaki na sojiya oka i Jisu Karisito. ⁴ E jikai ni kiya na tamata e dau la i nai valu me vaogaogataki niya tale i na cakacaka ni colo ikwe; me oka ke vuwa e a djigitaki niya me sojiya. ⁵ Ia o kiya e gugumatuwa ina vi waqe, e na tasi vaisalataki vaturaga, kodaki e tasi tekuciya na keya i varau. ⁶ Nai vatawa ni were e cakacaka, me na kaniya i mata e vua. ⁷ Vanumiya na kwa qu dau kwaya; iya me soliya vuwako na Turaga na yalo e kilajiya rewa na kwa taucoko. ⁸ Vanumiya o kiya e vu mai na leya kawa o Tevita o Jisu Karisito, o kiya e tucake mai na mate, me kodaki na lequ i tukutuku oka. ⁹ O kiya ikwe qu vosojiya ke na bura, me kodaki na tamata varau bura, iya qu a vesuki ke, iya na tata ni Kalou e jikai ni vesuki. ¹⁰ O kiya ikwe a qu vosojiya ke na vikwa taucoko eru vuku ga na djigitaki, me ru na rewajiya muni na cola e yaco e na vuku i Karisito Jisu, qainiya na viva kalougatataki e jikai ni mudu. ¹¹ E djina na tata kodaki du na mate vata, du na cola vata talega. ¹² Kodaki du na vosojiya na bura, du na lewaiya vata qaniya, iya kodaki du na maduataki niya ena maduwataki niko datou talega o kiya. ¹³ Kodaki e du na tasi va djinajiya e yalo djina no ga o keya, e na tasi maduwatakiniya rewa vainiya ¹⁴ Mo va numidru ke ina vikwa iqoi, ia mo varojidru matuwa ina mata ni turaga me ru kuwa ni vibatakiniya na tata, na kwa e tasi yaga e dau vacala nidru eru dau varogo. ¹⁵ Gumatuwa sara mo vatakiko mo oka e na mata ni Kalou, na tamata daucakacaka e jikai kiya na kwa me maduwa ke, mo wasekiya vadodonu na i vavuvuli djina. ¹⁶ Ia na dautalanowa vasisila e tasi yaga, mo tuba dai mai ke, ni na va tubu cake ke na i varau e tasi valotu. ¹⁷ Ia na ledru tata e na kakana no ga me kodaki na vidjikoso bura: e kodaki muni ke o Imeneo qaneya o Filito: ¹⁸ E ru vo ladai mai na vavuvuli djina, o rau niru kwa ni vo oji na tu cake tale mai na mate; o rau e ru vukiciya ke no ledru vabaujiya e valu. ¹⁹ Ia na yavu dei ni Kalou e no tu ga, ia e kodaki ikwe na tata e volai ke, e kilajidru na leya tamata na Turaga: ²⁰ Me ru ladei mai na; varau bura o rau yakiya e ru cavujiya e yavalu e ru talei, e ru yavalu eru tasi talei. ²¹ Ia kodaki e kiya na ecolo e vasavasavatakiniya, mai na vikwa iqoi e na yaco me bilo talei, e vasavasavataki, e na yaga sara vuwa na Turaga, ni vo varau tu i na cakacaka oka taucoko. ²² Ia mo tuba dei mai i na vanananu bura vasaravou; ia mo tekuciya ga na yalo dodonu, na vabaujiya, na loloma, na viokaji qanedru e ru dau masujiya na Turaga i na yalo e savasava. ²³ Ia mo tuba dei mai na viba lialia e du tasi lai vavulici ke, ni o vo kilajiya e ru na vavuniya ga na viba. ²⁴ Ia e tabu ni viba na i talatala ni Turaga; ia me yalo malumalumu vuwadru taucoko na tamata, me i vavuvuli vavuku me dau vosojiya, ²⁵ Me vavulicidru i na yalo malumalumu o rau eru dau vivoraji ke na soliya vuwadru na Kalou na vivutuni me ru kilajiya ke na kwa jina, ²⁶ me ru na cola tale mai na i lawaki ni nitu ni a dau vabobulataki nidru me kodaki na leya lewa.