¹ Ia qu vu varojiya e mata ni Kalou o Jisu Karisito, o kiya ena lewaidru na cola qai nidru na mate, ena lea lesu mai i na leya matanitu: ² Mo vunautakiniya na tata; vakaikai ena gauna oka, ena gauna bura. Mo kuwa na kwa e bura, vunaucijidru o rau eru cala dau vorojidru i nai vavuvuli, qai vosojiya valevu sara. ³ Ena yaco mai na gauna eru tasi vosojiya ke nai vavuvuli dodonu me kodaki na ledru dodomo bura, niru na va levunidru ke na ledru i vavuvuli ni vo nunu eru bebe. ⁴ Aru na vagolejiya dei eru bebe i nai tukutuku jina aru lesu i nai tukutuku wale. ⁵ Ia o iko mo yalo makuga ina kwa taucoko, vosojiya na kwa rarawa; mo vaveya na cakacaka ni vavuvuli, vaveya sara na kwa o vo lesi ke mo i talatala. ⁶ Niqu vo varau tumequ sovaraki vou voleka na siga ni lequ toki yaji. ⁷ Qu vu vala oji i nai valu oka a qu vo rewajia na qwaqwa, qu vo qulumia vakaikai na vabaujia. ⁸ Mai bere me lequ nai sala vaturaga ni cakacaka dodonu o kia ena solia mai vakoyau na turaga o kia na turaga ni lewa dodonu, i na siga igi, ena jikai ni ko au takia ga, vorau talega eru okajia na leya rairai mai. ⁹ Mo vakaikai mo la vawatotomai vuwako yau. ¹⁰ Ni vo biujiko yau o Timasa ni lomania o vuravura ikwe a volai Cesolonaika. O Kirisikiki kalatia, o Taito i Talemetia. ¹¹ O Luke e notakia no vuako yau. Meya mai o Marika me ru lavata mai; ni vo yaga vuako yau ena cakacaka. ¹² Quvou vatalajia o tikiko me lai Efeso. ¹³ Nai taboi qua biujia mai Tiroa vua o kiripo, nio vou lamai mo kau mai qai nia nai vola, ia mo numia sara nai vola kuli- ni- sivi. ¹⁴ E vou levu na kwa bura e vaveya vuako au o Alekisada. nai matai ni varasa ena saumia vua na Turaga me kodaki na lea cakacaka. ¹⁵ Mo qarau niko talega mai vua; ni vo qajia valevu na lemadu tata. ¹⁶ Ni qu varautaki niko yau i mata, ni vou jikai na tamata me maru no vata tu. eru vou biujiko yau na tamata taucoko; me kua ni wili vuwadru. ¹⁷ Ia vou novata qai niko yau na Turaga, e vakaikai taki niko yau me me kilai sara me balejiko yau na kwa eru vunau takinia, meru na varogo talega orau na vi matanitu taucoko. ia qu vu vacolai mai na gusu ni laione. ¹⁸ Ena vaco niko yau na Turaga mai na vikwa bura taucoko me vayaco niko yau talega ni leya matanitu va lomalagi; Me vai vuwa na varokoroko me kua ni mudu. Emeni. ¹⁹ Aqu loloma yaji vo Pirisila qai niya o Akuila qai nidru talega na la lewe ni were Onesiforo. ²⁰ E nokoto mai i Koronica o Arasito. ²¹ Iya qu vou biujia yaji o Tirofino mai Milito ni vo tauvimate. Sagaia mo simata ma ni sibere na vula -i-kakasali. E loloma yaji vuwako o Upolo o Putena o Laino o Kilotia, o rau taucoko na viwekani. ²² Me qai novata qai nia mutu yalo na Turaga o Jisu Karisito, Me lemutou na loloma. Emeni.