¹ Uniniro abẹ, ni i ma na ẹfunwẹnfunwẹn fẹnyan wọ. Akọnẹbẹ ma ẹfunwẹnfunwẹn abẹ u di din sa bi wo Osibina ẹfa ṣa, ubaka iṣoma ẹẹ̀sẹro abẹ kpina wo erọ ibe ke. ² Ọrẹ ọnẹ wè èke e din Osibina ẹÈfunwẹnfunwẹn nẹ - ẹfunwẹnfunwẹn fẹnyan nẹnẹ nowo ka Ijisọs Ẹkraist ṣa iwukpe ke na ayẹ wo Osibina ẹfa ṣa nẹ, ³ ẹfunwẹnfunwẹn fẹnyan nẹnẹ a àka na Ijisọs owo ka e wo Osibina ẹfa ṣa na e me je gbeli Osibina. Ọnẹ a wa ẹkraistiyuru eẹ̀funwẹnfunwẹn, nẹnẹ nẹ wọ ka à á ṣa na, nẹnẹ mi diye wo ẹrọ akana na. ⁴ Ni wo Osibina ẹfa ṣa, egben abẹ, ni diya fọrẹ ba ke, ubaka ẹfẹna nẹnẹ wo ni ibe fọrẹ ọnẹ nẹnẹ wo ẹrọ na. ⁵ Bi wọ ẹrọ ṣa, ọnẹbẹ uùba ọnẹ nẹnẹ bẹ ga na wo ẹrọ ṣa, ẹrọ diye piya ba atọn. ⁶ Ti wo Osibina ẹfa ṣa. Ẹfẹnẹfena è é din Osibina na de piya ta atọn. Ẹfẹna e è me wo Osibina ẹfa ṣa na e è piya ta atọn. Ọrẹ ọnẹ ti wa din ẹgaba ẹẹ̀funwẹnfunwẹn akà iyuru eèfunwẹnfunwẹn. ⁷ Uniniro, ni teyi ti ni abẹn ẹga, ubaka unini wo Osibina ẹfa ṣa ẹfẹna nẹnẹ è é ni na bẹ ba ẹ wo Osibina ẹfa ṣa e diye din Osibina. ⁸ Ẹfẹna e è me ni na e me din Osibina, ubaka Osibina wa unini. ⁹ Ubaka ọnẹ bẹ fọ Osibina uùnini nyẹn i te etin, ka Osibina filẹ yo ogben ọgbọgbọ ṣa ẹrọ ibe, kadakada ka ti di wo ẹrọ ubaka ayẹ. ¹⁰ Ọnẹ unini kpoto ma nẹ, e me gbe ka i ti ni Osibina, àmá ka e ni tu, e diye file yo ogben ka a da inyanpun nẹ ti iluwe abẹ. ¹¹ Uniniro abẹ, è é gbe Osibina siye egan, ka atọ ti ni abẹn ẹga. ¹² E me su ẹfẹna nẹnẹ gba Osibina gba na. Te e ni abẹn ẹga, Osibina ma gbeli tu, yu unini diye ṣina ogugule i ti ibe. ¹³ Ọrẹ ọnẹ ayẹ tiye din ka ti wo yi ibe na ayẹ diya wo ti ibe, ubaka e kuru i yẹ Ẹfunwẹnfunwẹn nẹ tọ. ¹⁴ Kẹgan, ti din ke ti diya nowo ka Ẹdẹda file Ogben ka a wa ẹrȯ ọọ̀nafanro nẹ. ¹⁵ Ẹfẹnẹfẹna nowo ka Ijisọs a wa Osibina oÒgben nẹ, Osibina wo yi diye wo Osibina ibe. ¹⁶ Kẹgan, ti din ti diya na unini nẹnẹ Osibina su nẹ tọ na wọ ke. Osibina wa unini, ẹfẹna è é diya ma wo unini ọnẹ na ma wo Osibina ibe, Osibina diye wo yi ibe. ¹⁷ Ubaka ọnẹ, bẹ sẹ unini ọnẹ gule i te etin ke, kadakada ka ti di gbuloko ẹ̀karọṣẹṣe iìsubu, ubaka akọ e siye we na, kẹgan ka atọ siye we ẹ́ro ọnẹ. ¹⁸ E me su ọrọrẹ unini. Akọnẹbẹ, unini ogugule da gban ọrọrẹ ki ve, ubaka ọrọrẹ su osiye aka oya. Àmá ẹfẹna à á sọnmọrọrẹ na bè e mi sẹ ya gule unini. ¹⁹ Ti ni ubaka Osibina tayi ni tu. ²⁰ È é gbe ka oro ga ka, "I ni Osibina" àmá e goli yọ oda, iṣomaro ya. Ubaka ẹfẹna nẹnẹ e è me ni yo ọda ẹga, nẹnẹ a gba na, è é diye ni Osibina, nẹnẹ e è mi gba gba na. ²¹ Kẹgan, ọnẹ a wa obuburu nẹnẹ tẹ na ì yẹ ẹfa na: Ẹfẹnẹfẹn è é ni Osibina na gbadọ ni ka ayẹ ọda.