Etah-oks_1jn_text

Ẹpan 5

¹ Ẹfẹnẹna a nawọ ka Ijisọs a wa Ẹkraist ayẹ nẹ bi wo Osibina ẹfa ba e, ẹfẹnẹfena è é diye ni ẹdẹda ọbẹn ẹga kẹgan è èke ni ogben nẹnẹ bi wo yẹ ẹfa ba na. ² Akọ ti siye din e din ka ti ni Osibina eègben abẹ ẹga nẹ: ọgbọna nẹnẹ tè e ni Osibina nẹnẹ ti diye wọtọn nẹ yo obuburu abẹ na. ³ Ubaka ọnẹ a wa unini no Osibina ne: ka tẹ fọ yo obuburu abẹ su. Yo obuburu e me diyu run oro. ⁴ Ubaka ẹfẹnẹfẹnẹ bi wo Osibina efa ba na fọra ẹrọ. Ọnẹ e diya wa afọrẹ nẹnẹ fọrẹ ẹrọ ke kpẹnẹkpẹnẹ tọ ọnawọ. ⁵ Ẹra a wa ẹfẹna nẹnẹ fọra ẹrọ na a? Ọnẹ nẹnẹ nawọ ka Ijisọs a wa Osibina oogben. ⁶ Ọnẹ a wa ẹfẹna nẹnẹ wo ebi akà enyọn ọọ̀rẹ ṣa na: Ijisọs Ẹkraist. A ma ṣa ebi aare ọọ̀rẹ, àmá ka ebi bile ẹnyọn ọọ̀re. ⁷ Ubaka e su ẹta nẹnẹ à á nu ubedin na: ⁸ Ẹfunwẹnfunwẹn, ebi, akà ẹnyọn. Ẹtẹta ẹnanẹ na na abẹn. Ubaka e su abẹ ẹta nẹnẹ nowo òsosi Ẹdẹda, Ega, akà Efunwẹnfunwẹn Ọnwọnwọn. Abẹ ẹtẹta ẹnanẹ wa ọọrẹ. ⁹ È é gbe ka tẹ na erokoro uùdedin, Osibina uùbedin fọrẹ. Ubaka ọnẹ wa Osibina uùbedin nẹnẹ a na yẹrẹ yo ogbẹn ẹpan nẹ. ¹⁰ Ẹfẹnẹfẹna à á na Osibina oÒgben wọ na su ubedin ayẹ àyẹ́ ẹbẹba iìwu. Ẹfẹnẹfẹna à á ma na Osibina wọ na sẹ ya ṣina iṣomaro ke, ubaka a ma na udedin nẹnẹ Osibina na yẹrẹ yo ogben ẹpan. ¹¹ Ubedin ayẹ a wa ọnẹ: Osibina fọ ẹrọ otutunmotutun, ẹrọ ayẹ diye wo yo ogben ibe. ¹² Ẹfẹna nẹnẹ è é su ogben na su ẹrọ. Ẹfẹna nẹnẹ è é me su Osibina, Osibina oÒgben na e me su ẹrọ. ¹³ Ẹ wọra ẹpẹn ẹnanẹ nẹ nọ kadakada ka ni di din ka ni din ẹrọ otutunmotutun - nẹ anọ nẹnẹ nawọ Osibina oÒgben iìwuru. ¹⁴ Kẹgan, ọnẹ a wa uloko ogbigbe nẹnẹ ti su ì yẹ ẹrẹn na, ka tè e ṣin kẹnakede ì yo onini ọọ̀rẹ na, a da wọ tọ. ¹⁵ Kẹgan, tè e din ka a wọ tọ na - ẹkẹnẹkẹna tè e ṣin ya na - ti din ka tẹ na ẹkẹna áyè nẹnẹ ti ṣin ya na. ¹⁶ È é su ẹfẹna nẹnẹ à á gba yọ ọda ka e luwe nẹnẹ a à ma ṣẹn wo ufo na, e gbadọ siye adura, Osibina èke diya fọ ẹrọ nẹ ya. Iluwe nẹnẹ à á ma ṣẹn wo ufo na ayẹ mà a ga. Iluwe ọbẹn da ṣẹn wo ufo; Ì ma ga ka ni siye adura yẹrẹ yẹ ẹpan. ¹⁷ Ọsẹriyuru fẹnyan wa iluwe, àmá e su iluwe nẹnẹ a à ma ṣẹn wo ufo na. ¹⁸ Ti din ka ẹfẹnẹfẹna bi wo Osibina ẹfa ba na è é luwe. Àmá ẹfẹna nẹnẹ bi wọ Osibina ẹfa ba na da bẹsẹ ya, oduduro ayẹ èke diya rẹ yo orọn. ¹⁹ Ti din ka ti wo Osibina ẹfa ṣa, ti diye din ka ẹrọ fẹnyan bọra wo oduduro ayẹ iìwogbigben. ²⁰ Àmá ti din ka Osibina oÒgben ṣa ke e diya fọ odidin nẹ tọ kadakada ka ti si din ẹfẹna nẹnẹ wa ikuwa na. Kẹgan, ti wo ẹfẹna nẹnẹ wa ikuwa na ìiwu, ì yo ogben Ijisọs Ekraist. Ọnẹ a wa Osibina iìkuwa akà ẹrọ otutunmotutun nẹ. ²¹ Egben abẹ, ni me je gbeli ujun abẹ.