¹ Nẹ gba ọ nẹnẹ Ẹdẹda à á nẹ tọ na ka bi i ki ye tu Osibina eègben, ọnẹ e diya wa ẹkẹna nẹnẹ tẹ wa na. Ọ́nẹ uùba, ẹrọ e me din tu, ubaka e me din ya. ² Uniniro, atọ e mi wa Osibina eègben nẹ bè e mi diya à á nyẹn akọnẹ tè ̀eke siye wa na. Ti din ka ọgbọna nẹnẹ Ekraist àka fọ iwu nyẹn na, tè èke gben ya, ubaka tà àka gba ẹ kpẹnẹkpẹnẹ akọ e siye wa na. ³ Ero fẹnyan nẹnẹ è é su ọfanyẹnyẹrẹ ọnẹ i yi iwu sẹ yi iwu nwọn akọ ka ayẹ siye nwọn na. ⁴ Ẹfẹnẹfẹna è é luwe na è é siye obuburuyuru, ubaka obuburuyuru a wa iluwe nẹ. ⁵ Ni din ka bẹ fọ Ẹkraist nyen kadakada ka e din tiye iluwe abẹ fura, e me diye su iluwe i yi iwu. ⁶ E me su ẹfẹna nẹnẹ ki wo yi iwu na nẹnẹ èke ki ki luwe na. E me su ẹfẹna nẹnẹ ki è é luwe na nẹ gba ẹ gba na sa nẹ din ya gba na ⁷ Egben abẹ, ni me ya ka koroọọrẹ e si nọ ọrẹ. Ẹfẹna nẹnẹ siye ọṣẹrẹ na ṣẹrẹ, kako nẹnẹ Ekraist siye ṣerẹ na. ⁸ Ẹfẹna nẹnẹ siye iluwe na wo eṣu ẹfa ṣa, ubaka eṣu luwe kaba ọtọtọmẹ. Ọ̀nẹ uùba biya fọ Osibina oògben nyẹn nẹ kadakada ka e di fu eṣu uùtun abẹ. ⁹ Ẹfẹnẹfẹna bi wo Osibina ẹfa ba na e è luwe ki i yọ, ubaka Osibina iilukutu ki wo yi iwu. E èke di ki luwe kè ̣ ẹ yọ ubaka bi wo Osibina ẹfa ba ẹ. ¹⁰ Ọnẹ ayẹ Osibina eègben akà eṣu eègben we fi iwu nyen nẹ: Ẹfẹnẹfẹna e è me siye ẹkẹna nẹnẹ wo ọṣẹrẹ na e me wo Osibina ẹfa ṣa, sa ẹfẹna e me ni yọ ọda ẹga na. ¹¹ Ọnẹ a wa ẹga nẹnẹ tẹ wọ kaba ọtọtọmẹ nẹ: ka ti ni abẹn ẹga. ¹² Ti me ki we akọ Ikenyin na, nẹnẹ wo oduduro ẹfa ṣa nẹnẹ diya nwan yọ ọda na. Ẹna a wọrẹ nẹnẹ a nwan ya na? Ubaka yu utun abẹ wa odudu yọ ọda ẹka diya wa ọṣẹrẹ. ¹³ E me jin wo owo fuwa, nẹ ẹda abẹ, è é gbe ka ero goli nu. ¹⁴ Ti din ka ti wo ofọ ṣun ve ṣa fon ẹro, ubaka ti ni ẹda abẹ ẹẹ̀ga Ẹfẹnẹfẹna e è me ni ero na, ki wo ufo. ¹⁵ Ẹfẹnẹfẹna è é goli yọ ọda na wa ọnwanoro. U din ka e me su onwanoro nẹnẹ su ẹrọ otutunmotutun nẹnẹ wo yi iwu na. ¹⁶ Ọnẹ uùba ọrẹ tiye din unini nẹ, ubaka Ekraist bọra yẹ ẹrọ wuje nẹ tọ. E diya bọwọ ka ka atọ a bọra tẹ ẹrọ wuje nẹ ẹda abẹ. ¹⁷ Àmá ẹfẹnẹfẹna è é su ero ọnẹ uùṣe abẹ na, nẹnẹ gba ka yọ ọda su onini, è é ṣi yu uloko eèyi fura yi iwu, gana Osibina uùnini siye wo yi iwo a? ¹⁸ Me egben abẹ, ni bebi ti me ki ni ero ẹ̀ga sa ẹ̀lare nyẹ aarẹ, àmá òsisiye akà ikuwa . ¹⁹ Ọnẹ uùba ọrẹ ayẹ tẹ̀ èke e din ka ti wo ikuwa ve ṣa nẹ, tè èke diye gbe ti iwu uloko i yẹ ẹrẹn. ²⁰ È è gbe ka tu uloko ṣẹn te ebe, Osibina keka fọra tu uloko abẹ, e diye din epẹn fẹnyan. ²¹ Uniniro, tu uloko a à ma ṣẹn te ebe, ti gbu uloko i yọ ọrẹ. ²² Ẹkẹnẹkẹna tè e ṣin na ayẹ tà àka gba na i yẹ ẹfa, ubaka tẹ fọ yo obuburu abẹ su ti diye e siye ẹpẹn ẹnanẹ rọnmuro i yẹ ẹrẹn na. ²³ Ọnẹ a wa yo obuburu ayẹ ne: ka tẹ fọ anyẹn yẹrẹ yo ogben Ijisọs Ekraist ilwuru ti diye ni abẹn ẹga, kpẹnẹkpẹnẹ akọ e siye fọ obuburu ọnẹ nẹ tọ. ²⁴ Ẹfẹna à á fọ Osibina ọbuburu su na wo yi ibe, ka Osibina diye wo yi ibe. Ọnẹ uùba ọrẹ ayẹ tiye din ka e wo ti ibe, Ẹfunwẹnfunwẹn nẹnẹ à á nẹ tọ na ọọ̀rẹ yo iwu one ti din ka á wo eti wu, ako efuewfuew nene anẹ tọ na.