¹ Shakki ghawakho bhomo khan pelloh murkho weyohni tih khan pip limim mashanu brodeh kha pirah. ² shakki khan shunryoh mayoh wawaw minna neh yamba shunnu hadoh kham meyanh pira. ³ Shakki teshun mashinu kha sharih manniwem tih milleyom khan bhiroh kham lutunkh khan-khan klubeh shunnu makha sharih showah pellow. ⁴ pip minnah wemeh linyoh meidinah tih pishe meh ilina. ⁵ Pip meime we yelle ameimim mametah wusho piri meh bhukh bhallkhe shomuh lunkhun ankhofok. ⁶ Yelle illoh warih piri, piri khan minnah shunu tih yoh foroh bhadeh tih memre. ⁷ shakki khub Hirudus shinllo pip weh weyoh shakki khannah khadeh mannih tih tehwani yahaya weillekhon tih khun folleh. ⁸ manninyoh tih tewanih iliya weshukhokhuni mannih tih tehwani doktahlla anbhakha pishin won illoh. ⁹ shakki Hirudus tehwani yahaya shakki faroh khunin manni noh weneh tah shinlloh shiram weh yeh netah bhapiri shunnin. ¹⁰ We shibha faroh penkhella shunu tehwuh tih yeshu shewoh warau mannin piri tah betsaida. ¹¹ nihkha kishe ghawah webhgah shunu dakho binih shakki munyoh dokne yoh diyah minnah yamba shakki bhodoh khan meyah bhah bhadanih. ¹² Kha pallan wah kha tum bholloh bhomoh khan pellouh yelle ghina shunun tenin mashakki woshem ghawah shunnun malin minnah khan piri we mehmih mashunnu dehlin shun bhadeh weshunah khan piri linyah. ¹³ Tih pishe shakki teshun mashunu munjih we shinnanh shunu dewina weh weh khokho tih munoh khubampatih khan shilip pelleou mamunh tah warah munh pillo pip tih linyanyeh weshinnah. ¹⁴ bhatih yelle lutunk patih shakki tehwih shibha fok nin mayelle diya fok jikk fox jikk khi kha jikk yahfatih yahfati. ¹⁵ Khishe shun yoh pip yoh yelle dinnah. ¹⁶ shakki sharah khubm fatih khan shinlip pelleou shakki sharoh khanih tih ghakih shakki pamoh tih yamba shakki hakhuro munuh tih shipbha foknih mashunnu waroh tih linyah. ¹⁷ pip yoh yelle showah shunnu khemin yelle ghawuh shor, hakhuro lukhuri bhomoh khan pellou. ¹⁸ Pallan mannih shakki tih yoh dima doknih shipbha foknin yelle wanah pirinin shakki maiyoh malinyah tih teino kha nih. ¹⁹ yelle dewina yahaya anbineh mannih shunnu tehwi iliya mannih shinu tehwih dok tih tahlla anbhakha weh illoh. ²⁰ Shakka tehkho yoh mameh tehsheno kha nih bitruy shakki dewinah khai almasiya yamba ²¹ shakki khan jan you tehshun mashunu khan tehwuh mannih paro yehmin. ²² tih pishe elekhun lalinya shakki tah showh veneh mambhodina khan bhure anwawah khan an shubir a haura shunun khurkhenih yalle bgakhoni tih khun pallan bhomom ele khe nih. ²³ Shakki tahshun pip an mehnih madatuh binih mashakki khurah khunih mansharo bhuroh kha shiram pallah mandawuh binih. ²⁴ pip anmeh bhanani kha khin atih wenim pip miyah we awemh ele humo shekke you. ²⁵ mannin miyanh weyou mashakki wewuh khun pepe tih khun weh weshakki awamh tih loshe kha fok loshon. ²⁶ Pip miyanh we yoh shillo shikhale khan fok noh khan paro noh lalinyah shakki tah shillo shinkhale khon foknih weshakki wanah khan yelshikknih khan yelshikk tanuh kham jilim bhudanihn. ²⁷ tih pishe khishe nahra temein kham mannih shellanin we atih munranim shum weh minnah yamba. ²⁸ Kha yabih khi kha shoh perfirou khan yoh paroh yeh yeshu shakki sharoh biruy khan yahaya khan yakubu shakki tullah mannih pandi ele khun mah. ²⁹ Shakkhi pir yuh dimmah khu dohnih khan phenghelanih, khan landahni diyou phee nhak. ³⁰ Tih yoh dimah kha parashinih shollohni yoh fah tih pellou tih yoh paro meh musa khan Iliya. ³¹ yelle tih tehwuh yeshikki shunu tih tewuh paro mennoh nih we nehmina tih Urushalima. ³² Tih pishe bitruy khan meimeh we yelle khan shunu fushoh tih andeh yoh shinu penkho shinu wewuh we yelshikknih khan linya pellou shallah nih khan shakki. ³³ linya yeh tih pir bhallani shakki bitruy tewauh tih yeshu anminnah yowalla teh pir khai muh lin piri dima bhomon dok shikho dok shinneh musa dok shinneh Iliya shakki apennom we shakki tih taiwanim. ³⁴ Shakki tih piri tehwanih khishe mannih shunnkhgohwatuh nomh dehyih weh shinkhgoh nahkho shewoh khan kha shunh. ³⁵ shun khan shinllo mannih eleh tih yatein shunkhgo tewih teyeh lanno weneh shakho. ³⁶ khan yabih eleh yoh paro shunnu khan weh yeshu shakki dokhnin yelle khan mellanih tih shohyeh yelle atewuw tih mannih we yelleh wewum. ³⁷ We piri bhakukhon shunu shannah tih khun pandi mannih bhure khgawah shunu khokho fok. ³⁸ tih pishe mannih tih tallah anghawah yekhenih shakki tewuh anshabir neira diminkho ninkho lannoh kha andeh weh millan tih piri khai. ³⁹ bhanon limim dantuni shakki yoh yalloh akham pennim limin khan bhgokhni shinnih yoh shonu tih bhushele nih. ⁴⁰ needimoh shipbha fok kho mashunu peroh kha touh shunu khanoh. ⁴¹ Shakki yeshu dewinah shakki tehwih meinuwe akhum bhgah yalosho khnmeh bhgah madiminih neira diyani khan meih neih ghoning. ⁴² shakki tih watun limin khan bhgonin khadekk shinnin tih yoh sholl shakki yeshu khan jannih dikh limin shakki bhodikho kha pira lawuh khan munnon tih tanih. ⁴³ Pip you yelle linyoh shulla tih fohyoh kha pip kha bhure we yamba khan pip yoh tih shilla tih foyoh pip kha we weh yamba khan pip kha we weh shakki tekkho tih shipbha foknih. ⁴⁴ paro yeh linyoh yakhumo tah munh lamiyanh tih lalinyah. ⁴⁵ tih monyeh shunu a pennnom paro yeh weh tunkhe yoh khan teih shunnu kha pennom shunu tih yoh shewoh mayoh paro yeh. ⁴⁶ Tih pishe bhgah fok ille tih shekki yoh mannoh bhure yoh. ⁴⁷ Shakki yeshu penno weh tah losho yoh shakki khetum shinlla lauwu wihkhuluh lin tih jelehnih. Shakki tehshunyoh pip[ miyah ⁴⁸ weh khekho wihkhuluh lauwuh khekha teiyeh ele khun shomonoh neih shakki khekho mihyanh khekho miyanh we shunnonoh mihyanh weh wikhulu tih talle meh minh bhure. ⁴⁹ Shakki yahaya khan dewinah shakki teiwih anminnah munh wewuh mannih tih peroh khan limim kha shomoh kho munh khayoh tih khun ele khun shakki atih binuh." ⁵⁰ "Shakki yeshu tewih mashunu kha khayoh tih khunm tih mohyeh mihyanh we ayoh ghuna khan meih shemem. ⁵¹ We palla khenin tih ghak meih yoh kho dehnih khumon weh waroh urushalima. ⁵² shakke khan shunroh ashunra ma bhene tonm mashunu waroh shunu lih mannih minnah samariyawa shuna mabhakhre pir. ⁵³ shunu samariyawa yelle khunroh khauni elekhun pip yabhgohni tih urushalima. ⁵⁴ Khan shipbha foknin yakubu khan yahaya khe meiji mun lin wiyih mosharo tih ghakh ma debnileyoh. ⁵⁵ shakki penkhilla janyouh. ⁵⁶ yelle khokho tom yelle waroh manni minnah. ⁵⁷ Yelle tih pir yoh milloh mannih linyah teih nih shakki tah dauwu binih piri we shakki tah warahni. ⁵⁸ Yeshu teinih weh bhgah kholani dunyoh khan piri deshonyoh tih mahyeh lahlinyah akham piri diyam. ⁵⁹ shakki teiko mannih an danwbini shakki yoh paro mawushenih mashakki waroh yananuh anmayinah. ⁶⁰ shakki yeshu tewuh mamihya munro mannanu mamollon yoh mihyah munro khai waroh tewuh piri diya ni yamba. ⁶¹ Mannih tewih tih tannih neiro dauwu woshenoh findeh neh waroh pir linyah minnah neh munh bhallon. ⁶² yeshu tehnih wedekh yoh ghokk jahwa shitau shakki tih nikho yabinih shakki adiyoh khan minnanih Yamba.