¹ Jesu wakalanga akubona bamasankwa bavibi bakalinga kubika zhipo zhabo mu ciyobwelo. ² Wakabona umwi mukafwiilwa mucete kabikamo tushileni tobile. ³ Ono wakaamba , "ndushinizho ndamwambila uyu mukafwiilwa mucete wakabika kuunji kubainda boonse. ⁴ Boonse aba bapa zhipo kuzwa kubuvubi bwabo buunji. Pesi uyu mukafwiilwa, kuzwa kubucete bwaakwe, wabika zhoonse zhaalinga kucite kuti aponene mpawo." ⁵ Mbuli bamwi mbubakaamba zha tempele, mbuli mbayakalinga kubambilwea mabwe mabotu a zhipo, wakaamba, ⁶ "Izhi zhintu nzhamwabona, mazuba alaakuza neeshi kukabule libwe naliba lyomwe lyeelikashaale palyeenzhinyina litakoolomonwi." ⁷ Ono bakamubuzha, baamba "Omuyi, zhilakucitika lili zhintu iizhi? zhitondezho nzhi zheezhikabe zhaakuyanda kucitika izhi zhintu?" ⁸ Jesu wakaingula, "amucenjele kuti mutakacengwe. Nkaambo baanji balaakuza muliina lyangu kabaamba, 'ndime uyo,' alimwe, 'ciindi cili afaafi,' mutakabacilili. ⁹ Bwaakunyumfwa nkondo amanyongwe, mutakaloondi, kaambo izhi zhintu zhileelele zhikatangune kucitika, pesi mamanino katanashika." ¹⁰ Amane wakaamba kulimbabo, "cishi cilaakulwana acishi, alimwi bwaami bulaakulwana abwami nyina. ¹¹ Kulakuba kuzuzuma kwanyika, alimwi mumasena amwi nzala amapenzhi. zhilaakucitika zhiloondesha azhitondezho zhinene kuzwa mujulu. ¹² Pesi izhi zhoonse kazhitanaba, balaakubika maanza aabo pali ndimwe a kumupenzha, kumwaaba muma Sinagogi amumantolongo, akumuleta kunembo lya baami abeendelezhi nkaambo kazhina lyaangu. ¹³ Cilaakusolela ku coolwe ca bumboni bwanu. ¹⁴ Aboobo mtakayeyi mumyoyo yanu kulibambila bwakulikwabilila ciindi cili kumbele, ¹⁵ Nkaambo ndaakumupa mazwi abusongo ubo basinkondo nyoko mbweebakabule kukaka. ¹⁶ Pesi mulakaabwa abamazhali, bakwaanu, bamikowoyanu, abeezhinanu, alimwi nubamwi balaamukujaya. ¹⁷ Boonse balakumuzoonda nkambo ka zhina lyangu. ¹⁸ Pesi taaku nikaba kasusu kakumitwe yanu keeshi kakanyonyooke. ¹⁹ Mukuzumanana kwanu mulaayumya Muuya wanu. ²⁰ Mwaakubona Jelusalama kazhungulukilwe bashikalumamba, mukazhibe kwamba kunyonyouka kwaakwe kuli pafwifwi. ²¹ Ono abo bali mu Judiya bakabalikile kumalundu, abo bali mu Dolopo bakazwemo, alimwi abo bazwile mucishi tabelele kunjila u Dolopo. ²² Nkaambo aya mazuba aaku jola kuti zhoonse zhintu zhilembelwe zhikazulile. ²³ maawe kuli abo bamitile abaabo banyonsha kumazuba ayo! nkaambo kulaakuba makatazho manene anyika, abukali kubantu. ²⁴ Balakawishigwa alipanga, alimwi balakatolwa mubuzhike kuzhishi onse, alimwi julusalema ulaakulyataulwa abamashi kushika zhiindi zhabamashi zhikazuzikezhigwe. ²⁵ kulaakuba zhitondezho ku zuba, ku mweenzhi, akunyenyeezhi, apanyika. mashi alaakuba mumapenzhi, kutyomopokelwa nkaambo kakuvuuma kwalweenge amayuwe. ²⁶ Kulaakuba bantu bawizukile kuzwa mu kuloonda akuyeeyela zhintu zhiza anyika. Nkambo nguza zhamujulu zhilaakuzungaana. ²⁷ Ono balaakubona mwanaamuntu kaza mumakumbi anguzu abulemu bunene. ²⁸ Pesi zhaakutalika kucitika iizhi zhintu, mukaimikane akunyamuna mitwi yanu, nkaambo lufutuko lwanu lwaswena." ²⁹ Jesu wakabambila mukonzhano, "amulange kucisamuca kuyu, azhisamu zhonse. ³⁰ Na zhashuuka mulabona nubeni akuzhiba kuti cilimo caswena. ³¹ Bwenka ubo, mwakazhibona iizhi zhintu kazhicitika, mukazhibe kuti bwami bwa Leza bulipafwaafwi. ³² Ndushinizho ndamwambila, uyu musela taukaindi kazhitana akucitika iizhi zhintu. ³³ Julu anyika zhilaakumana, pesi mazwi aangu teeshi akamane. ³⁴ Pesi amukalibambe nubene, kuti myoyo yanu itakaleminyi kukunwa alimwi akukolwa, akutyumpokelwa kwabuumi, akuti buzuba ubo bukamushikile kamuliibile mbuli kooye. ³⁵ Nkambo bulaakubashikila bonse bakala a bushu bwa nyika. ³⁶ Pesi amkacenjele zhiindi zhoonse, kupaila kuti mukayume cakukonzha kuloboka iizhi zhintu zhonse zheezhikacitike, alimwi akwimikana kunembo lya mwanaamuntu." ³⁷ Ono kuciindi naakalinga kwiisha mu Tempele, alimwi mashiku wakaya amulundu wa Olivu. ³⁸ Bantu boonse bakaza macunsa kuti bamunyumfwe mu Tempele.