¹ Ne ora bedaanda siado', guiraa ca xaique xti ca sacerdote ne ca binnigola xti guidxi guni ca luguia Jesús, ti gu'ti cabe Laabe. ² Laacabe bindiibi cabe Laabe, yene cabe Laabe ne bidiicabe Laabe Pilato xaique guidxi que. ³ Ti ora Judas, ni bidxii deche Laabe, bi'ya ma nexhe ga'ti Jesús, uca arrepentir ne bidxigueta gande ne chii nabiuxhe de plata que ca xaique ca sacerdote ne ca binnigola, ⁴ ne na: "Naa bichee ra bidxiee deche ni que gapa donda." Huaxa laaca guni ca: "¿Xi xcuenta gadu de nga ya? Nga ni bi'nu nga." ⁵ Ne ora que laabe bisa'bi be ca nabiuxhe de plata que ndani yu'du, bireebe ne guluube doo yani be. ⁶ Ca xaique xti ca sacerdote que gucuaaca ca nabiuxhe de plata que ne na ca: "Cadi neza di cuu nu ndi ra nuu tesoro ca, ti rinni risaca ndi." ⁷ Laacabe biu'lisaa ca be ni cayaca que, ne nabiuxhe que guzi'cabe layu xti Alfarero para gucha'chi ca be ca ni de gadxe guidxi lu' ni. ⁸ Nga runi layú que runibia' ca be ni casi: "Layú rini" dede yanadxi. ⁹ Ti ora que ni guni' profeta Jeremias que, bizaaca, naa: "LAACABE GUCUAACABE GANDE NE CHII MONEDA DE PLATA QUE, BIA'CA PRECIU GUTABE PUR CA ISRAELITA ¹⁰ NE BIDIICABE LAABE PARA LAYU XTI ALFARERO, CASI CA SEÑOR BISIENE NAA." ¹¹ Yanna Jesus bizuhuaa nezalu xaique guidxi que ne xaique guidxi que gunaba diidxa Laabe: "¿Lii nga rey xti ca Judiu?" Jesus bicabi laabe: "Lii caniu ni." ¹² huaxa ora Laabe ca xaique xti ca sacerdote ne ca binigola bidxiiba donda ique Be que la?, Laabe que nucabidibe gaxti. ¹³ Ne ora que Pilato na: "¿Cadi cayuna diagu guiraa donda ni cudxiiba cabe iquelu la?" ¹⁴ Huaxa Laabe nin ti diidxa que niree rua'be, ngue runi xaique que na bepe cadxagayaa. ¹⁵ Lú zaa que ma biaa xaique guidxi que gundaa ti ni daguyoo ni guira xixe binni que cui'. ¹⁶ Ca dxi que napacabe ti ni daguyoo nabé runibia'cabe laa, ni lá Barrabas. ¹⁷ Ne ora laacabe guyuu cabe tobi si la?, Pilato gudxi laacabe: "¿Tu laa napatu ganna gundaa? ¿Barrabas la? o Jesus, ni rabicabe laa Cristu? ¹⁸ Ti laabe nanna be bidii ca be Laabe pur guenda nadxaba. ¹⁹ Laga zubabe lu bangu ra riní cabe xinga neza, xheela be biseenda ti diidxa ra nuu be na: "Cadi gapu diou gaxti ne nguiu que gapa donda di; ti yanadxi naa gucanaya xtale lu ti bacaanda pur Laabe". ²⁰ Yanna ca xaique ca sacerdote ne ca binigola bicaaca ca xaique que guinabaca Barrabas ne ñuuticabe Jesus. ²¹ Gobernador que gunabadiidxa laacabe: "¿Tulaa de guiropa cabe napatu ganna gundaa?" Laaca naca': "Barrabas." ²² Pilato rabi laacabe: "¿Xi gunenia' Jesus ni rabicabe Cristu ya?" Iracabe bicabicabe "Bicaa laabe lu cruz." ²³ Ne laabe guní be: "¿Xiñee, xi bichee ne be? Huaxa laacabe bicaacabe ridxi jma pe nadi'pa: "Bicaa laabe lu cruz." ²⁴ Ne ora bi'ya Pilato ma que zanda guni gaxti, ne ma guiracabe cayasa yaya cabe, laabe gucuaabe nisa, gudibi ná' be neza lú guiraa xixe cabe ne na be: "Naa que gapa dia donda de riini guxhii Nguiu que gapa donda di; laguuya laatu." ²⁵ Guiraa ca binni na ca: "Riinii xtibe guiaba ni luguiadu ne lugia ca xiiñi du'." ²⁶ Ne ora que laabe bindaabe Barrabás, gudiiñe be Jesús ne bidiibe laa ti guica lu cruz. ²⁷ Ne ora que ca dxu xti xaique que yenee ca' Jesús ra Pretorio ne bichiña cabe guiraa' xixe ca dxu que. ²⁸ Laacabe guxha cabe lari ladibe ne gudixhe cabe ti lari luguia Be. ²⁹ Ne ora que bi'ni cabe ti corona de guiichi, gula'qui cabe ni ique Be, ne bicaacabe ti bastón ladu derechu ná' be, ne bizuxibi ca be ra lú Be ne bixidxi cabe de Laabe na ca: "¡Guibaani, rey xti ca Judiu"! ³⁰ Ne laacabe bicha xhini cabe luguia Be, gucuaa cabe baston que ne bigaase cabe ni ique Be. ³¹ Ora laacabe ma bixiidxi cabe Laabe, guxa ca be Laabe lari que ne bigacu cabe laabe xaba be ne zinecabe laabe ti guica be lu cruz. ³² Ora laacabe biree cabe, bidxaga cabe ti nguiu de Cirene ni lá Simon, ni bicaa cabe laa chine laacabe ti ganda gua gaya cruz que. ³³ Laacabe yenda cabe ti lugar lá Gólgota, ni rini': "Lugar xti Dxita gue'tu." ³⁴ Laacabe bidi cabe Laabe gueebe Vinu niucha ne hiel. Huaxa ora Laabe gulu rua be ni, que ñe' be ni. ³⁵ Ora laacabe ma bica cabe laabe lu' cruz que la?, gundá cabe xhaba be lu' cabe tu laa chinee ni. ³⁶ Laacabe guri cabe, ne cayapa cabe Laabe ³⁷ Luguia de ique be gulu cabe ti diidxa ni cudxiba donda ique be ni na: "NDI NGA JESUS, REY XTI CA JUDIU." ³⁸ Chupa gubana gucua ca lu cruz ne Laabe, tobi ladu derechu xtibe, ne tobi ladu biga xtibe. ³⁹ Ca ni sidiidi cagudi' ca laabe, ne cunibi ique ca ⁴⁰ ne na ca: "Lii ni chi guxhia ndou yu'du ne chi guzaalu ni xti tiru lu chona gubidxa, bilá laaca Lii. Pa naca lu' Xiiñi Diuxi, biete de lu cruz ca." ⁴¹ Saqueca ca xaique xti ca sacerdote cuxhidxi ca Laabe, ne ca escriba ne ca binnigola, ne na ca: ⁴² "Laabe bilá be xcadxi, huaxa que ganda gulá be laaca Laabe. Laabe nga rey xti Israel; lagudi guiete be de lu cruz ca ne oraca zuni cree du Laabe. ⁴³ Laabe nabe runi cree be Diuxi. Diuxi gueeda ne gulá Laabe yana pa naa'?, ti Laabe guní be: " Naa nga Xiiñi Diuxi." ⁴⁴ Ne ca gubana ni gucua ne laabe lu cruz que, laca ngueca diidxa gudxi ca Laabe. ⁴⁵ Dede bia' gala dxi beeda ti guelacahui luguia guidubi naca guidxilayú dede bia' ra guiona xhigaba huadxi. ⁴⁶ Ma yaca ganda guiona xhigaba huadxi que, Jesus bica' ti ridxi narooba ne na: "ELI, ELI, ¿LAMA SABACTANI?" ni rini': "DIUXI XTINE, DIUXI XTINE, ¿XI ÑEE MA BISAANU NAA XTUBE?" ⁴⁷ Ne xtale de ca ni nuu ca xa ñee cruz que binadiaga ca Laabe, laacabe na cabe: "Laabe cucaridxi be Elías." ⁴⁸ Ne ora que ca tobi de laacabe bixhoñe ne gucua ti esponja, ne bigadxe ni ne vinu ni nandá, ne gulu ni lu ti nda' nite, ne bidii gueebe. ⁴⁹ Xcadxi binni que na ca: "Lagusaana Laabe xtubi be; guuyanu pa gueeda Elías ne gulá laabe." ⁵⁰ Oraque Jesus bica ridxi xti tiru ne bidii Espiritu xti. ⁵¹ Ne oraque, Laari ni nanda ndani yu'du gureza chupa nda' de luguia dede xhaguete. Guca ti xú ndani guidxilayú ne ca guie gulaa ca. ⁵² Ca ba' bixale ca, ne xtale de ca ni nandxo ni ma niasi ca, biasa ca. ⁵³ Laacabe biree cabe de ndani ba' xti cabe biasa si Jesús de lade gue'tu, ne guyuu cabe ndani guidxi nandxo, ne bihuini cabe ra lu xtale. ⁵⁴ Ora xaique xti ti gayua dxu que ne ca ni cayapa ca Jesús bi'ya ca guiraa ni bizaaca que la?, laacabe guiza' bidxibi cabe ne na cabe: "Dxandi pe ndi nga Xiiñi Diuxi." ⁵⁵ Xtale gunna ni bedananda ca Jesus dede Galilea ti gapaca Laabe, nu ca raque cayuuya ca de zitu. ⁵⁶ Lade cabe nuu Maria Magdalena, Maria jñaa Jacobo ne José ne jñaa ca xiiñi zebedeu. ⁵⁷ Ra bixhiini, beeda ti nguiu ricu de Arimatea, lá Jose, ni laaca naca ti xpinni Jesús. ⁵⁸ Laabe bidxiña be Pilato ne gunaba be laa xcuerpu Jesús. Oraque Pilato biseenda gudi ca be laabe xcuerpu Jesús. ⁵⁹ José gucua cuerpu que, bichenda be ni lari de linu nayaa ⁶⁰ ne gulaqui be laa ndani laaca ba' xtibe, ni nacubi, ni gundacabe ni lu ti guie. Oraque laabe bica na be ti guie ngola ni bichi' rua ba' que ne zeebe. ⁶¹ Maria Magdalena ne xti Maria que nuu ca raque zuba ca ra ba' que. ⁶² Xti dxi que, ni naca dxi guenda risiladxi, ca xaique ca Sacerdote ne ca fariseu bidxiña ca ra nuu Pilato. ⁶³ Laacabe guní ca be: "Señor laadu rietenaladxi du de que ora ni rusigui ca bibani, Laabe guní be: "Tiidi si chonna gubidxa naa siasa de lade gue'tu." ⁶⁴ Nga runi bini biseenda tu chi gapa cabe ra ba' que dede ra guiona gubidxa; pa ca' la? ca discipulu xtibe sandaca chindana ca Laabe ne gabi ca binni: "Laabe ma bibaani be de lade gue'tu." Ne guendarusigui di zaca jma ru narooba que niru que." ⁶⁵ Pilato gudxi laacabe: "Lachine ti neza dxu de ca ni rapa. Lache' ne lagapa ni modo jma galan ganda laatu." ⁶⁶ Ngue runi laacabe guye cabe ne gupa cabe ba' que, ne bichii cha'hui cabe guie' que ne gulu cabe ti neza dxu de ca ni rapa que.