¹ Ora que Jesús guní ne be guiraa binni ni nuu raque ne ca discipulu xti Be. ² Laabe na be: "Ca escriba ne ca Fariseu ribí ca lu xpangu Moisés. ³ Nga runi intica si ni guseenda cabe gúnitu, la gúni ca ní ne laguyadxi ca ní. Huaxa cadi gunitu casi runi cabe, ti laacabe riní si ca be, ne que runi cabe ca ní. ⁴ Laacabe rugua' ca be ni nanaa ni guiza' nagana gua' tobi, ne laacabe rudxiiba ca be ni xique binni. Huaxa laacabe que suniibi cabe nin ti bicuini ná' cabe ti gua'ni ca be ni. ⁵ guiraa ni runi ca be, runi cabe ni ti ma guuya binni laacabe. Ti laacabe rusi rooba cabe ra ridxa cadxi gui'chi' ndaani, ni ricá lucua cabe qué, ne laacabe rusi zoo cabe ca ñudu ni riliibi ñee ca ni racucabe qué. ⁶ Laacabe nadxiicabe cui cabe ra jma sicarú ruaa mexa' ra nu ira tipu endaro qué, ne cui cabe lu ca bangu jma sicarú ndaani yu'du huiini, ⁷ ne nabé sicarú ugapadiuxi binni laacabe ndaani ca lugiaa, ne guiree lá cabe 'Rabí' pur ca binni. ⁸ Huaxa laatu que guiree lá tu 'Rabí', ti tobi si nga maistru xti tu, ne guiraatu bi'chitu. ⁹ Ne que cuee lá tu binni ni nuu ndaani guidxilayu bixhoze tu, ti laatu ti Bixhoze si tu nga napa tu, ne LAABE nuu be guiba'. ¹⁰ Nin ca que zanda guiree lá tu 'maistru', ti laatu ti maistru si nga napa tu, laa nga Cristu. ¹¹ Ne ni laa jma risáca de lade tu zaca ni gu'suuba xtiidxa tu. ¹² Ne tutiica gudxiba ná' laca laa Diuxi zusi tui lú. Ne tutiica ni guindete laca laa Diuxi zuni zudxiiba lu ná' laa. ¹³ ¡Pa bia naná zaca ne laatu, escriba ne Fariseu ca, binni chuppa diidxa! Laatu que rudii tu gunibia' binni guenda runi mandar xti Diuxi, ti nin laatu cadi cayuu tu, ne nin ca que cudii tu ca ni ma yaca chu', guni ni. ¹⁴ ¡Pa bia naná zaca ne laatu, escriba ne Fariseu ca, binni chuppa diidxa! Laatu ni raxa tu xti ca gunaa ma guti xheela ca. ¹⁵ ¡Pa bia naná zaca ne laatu, escriba ne Fariseu ca, binni chuppa diidxa! laatu ni rie tu lu nisado' ne neza yú ti za' nanda ca be laatu, ne ora laabe ma zaananda be ni na tu, laatu runi tu laabe chuppa ca tiru xiiñi binnidxaba casi ca laatu nacatu. ¹⁶ La gapa ga si laatu, laatu ni rabi tu xtobi ladu za', laatu ni na tu: 'Tutica si ni gudii xtiidxa pur yu'du' la?, gaxti náca ni, huaxa tutiica ni gudii xtiidxa pur guiiba ruzaani ni nuu ndaani yu'du' la?, nga naquiiñe guni casi ca bidii xtiidxa. ¹⁷ Laatu binni huati ni nacheepa lú, ¿Xinga ni jma rizaca, guiiba ni ruzaani la?, o yu'du' ni ma guluu ndaya guiiba ruzaani que? ¹⁸ Ne, Tutiica ni gudii xtiidxa guni altar la?, gaxti naca ni. Huaxa tutiica ni gudii xtiidxa pur ofrenda ni laa rusába, laabe naquiiñe gunibe casi ca bidii xtiidxa be. ¹⁹ Binni ni nache'pa lú, ¿Xi jma naroba, ofrenda ca la?, o altar nuu ndani yu'du' ni ruguu ndaya ofrenda ca? ²⁰ Nga runi ni laa gudii xtiidxa pur altar la?, rudii xtiidxa lú guiraa ni nuu ne laabe ²¹ Ne ni laa gudii xtiidxa pur yu'du' la?, rudii xtiidxa be pur laabe ne ni nuu ndani ni. ²² Ne tu gudii xtiidxa pur guibá' la?, rudii xtiidxa pur ra ribi' Diuxi ne pur Diuxi. ²³ ¡Pa bia naná zaca ne laatu, escriba ne Fariseu ca, binni chuppa diidxa! laatu runi diezmar tu menta, eneldo ne comino, huaxa laatu ma bisaana tu de gúnitu ca diidxa ni ca lu ley ni jma naquiiñe ga'ca: ni biaasi, guenda ria' ne guenda runi cree. Ca ndi nga ni naquiiñe ñuni tu, sin nusaana tu de ñuni tu ca xcaadxi ca. ²⁴ ¡Laatu ni rului tu tobi ladu za', ribee tu biuxi lu endaro huaxa raabi tu ti camellu! ²⁵ ¡Pa bia naná zaca ne laatu, escriba ne Fariseu ca, binni chuppa diidxa! Ti laatu pur fuera si rusia tu xíga ne bladu', peru pur dentru dxa tu de guenda nadxaba. ²⁶ Laatu Fariseu lu cheepa ca, lagusia niiru ndaani xíga ne bladu', ti zaca laca gia ni nuu pur fuera. ²⁷ ¡Pa bia naná zaca ne laatu, escriba ne Fariseu ca, binni chuppa diidxa! Ti laatu nacatu casi ba' ni bidiee de naqui'chi', pur fuera rihuini sicarú, huaxa ndaani ni dxa dxita gue'tu ne guiraa ni nayuudxu. ²⁸ Ne zacaa zaca, zacaca laatu pur fuera rului nacha'hui tu neza lú binni, huaxa dxa tu de guenda rusi guii ne de ni cadi xneza. ²⁹ ¡Pa bia naná zaca ne laatu, escriba ne Fariseu ca, binni chuppa diidxa! Ti laatu ruza' tu ca ba' xti ca profeta ne ruzucha'hui tu ca ba' xti ca ni nachahui. ³⁰ Laatu na tu: Pa ñaca nibaani du dxi bibani ca bixhozedu, laadu que ñegudidu laacabe ora bixii cabe ríni xti ca profeta'. ³¹ Ne nga runi, laca laatu rudii xtiidxa tu de que zaa tu de ca ni bi'ti ca profeta que. ³² Laatu zunduxhe tu ni bizulú ca bixhoze tu. ³³ beenda, ni zaa de ca beenda, ¿xi modo zanda guxhooñe tu de guenda naná xti gabia pue? ³⁴ Nga runi, la guuya, Naa cuseenda ra nuutu ca Profeta, ne hombre nuu xpiaani, ne ni rucaa lu xqui'chi Diuxi. Caadxi de laaca be su'ti tu ne sucaa tu laacabe lu cruz. Ne xcaadxi suguu tu cuarta laaca ndaani yu'du huini xti tu ne zaza nanda tu laaca de ti guidxi a xti guidxi. ³⁵ Ne pur ndi la? lugia tu seeda guiaba guiraa ríni xti ca ni nacha'hui ni bixii layu, dede ríni xti Abel ni nacha'hui ne dede rini xti Zacarías xiiñi Berequías, ni laatu biiti tu lade santuariu ne altar. ³⁶ Dxandi pe cayabe laatu, guira ndi saca ni lugia ca ni nabani yanna. ³⁷ ¡Jerusalén, Jerusalén, laatu ni ruuti tu ca profeta, ne rucha tu guie ca binni ni ruseenda cabe ra nuu tu! ¡Panda tiru gucaladxe nuchiña ca xiiñi lu' casi ca bere ruchiña ca xpere huiini ca za xiaa, huaxa lii que niná lu'! ³⁸ Biiya, ra liidxu siaana xtúbi. ³⁹ Ti ni naa cayabe laatu, laatu ma que suuya ru tu naa dede yana ne lu ca dxi seeda, dede dxi laatu guiní' tu: 'Nuu ndaaya ni seeda lu lá xti Señor.'