¹ Jesús guní ne laacabe xti tiru ne ejemplu, ne na: ² "Guenda runi mandar xti Diuxi seda gaca ni casi ti rey ni bi'ni ti saa de guendaxheela xti xiiñi. ³ Biseenda be ca ni runi dxiña xti be cuidxi ca ca ni ma bisenda tidxi be que gueeda ca zaa xti guendaxheela que, huaxa laaca que ni naaca ñeeda ca. ⁴ Xti tiru rey que biseenda be xcadxi ni runi dxiña xti be, ne gudxi be laaca: "lagabi ca ni ma bisenda tidxe que la?: "Ma bizuchahue ti guendaroo xhi. Ma bi'te yuze roo ne yuze huiini ni naro', ne guiraa ni ma zucha'hui ni. Latá' zaa xti guendaxheela di." ⁵ Huaxa ca binni que la? que nicaa ca de dxandi pe bisenda tidxi be laaca. Cadxi bigueeta ca zee ca ra ñaa xtica, xcadxi bigueeta ca ra rutoo ca. ⁶ Xcadxi la? gucua ca ni biseenda rey que ne bizitui ca be lú ca, ne bi'ti ca be laaca. ⁷ Ne ora que rey que bidxi'chi. Laabe biseendabe ca dxuu xtibe ne bi'ti ca ca binni ni bi'ti ca ni biseenda be que, ne biza'qui ca guidxi que. ⁸ Oraque laabe gudxi be ca ni runi dxiña xti be: "guendaxheela di ma zucha'hui ni, huaxa ca ni biseenda ca que la? naca ca binni ni que naquiñe chu' ca rari. ⁹ Nga runi lachee ca ra rila' neza ne la gusenda tidxi laacabe lú zaa de guenda xheela di bia' binni guidxela tu. ¹⁰ Ca ni runi dxiña xti be que guyé ca ca lu neza ne bichiña ca guiraa binni ni bidxaga ca, ni nacha'hui ne ni cadi nacha'hui. Ne yoo roo ra chigaca guenda xheela que la? bidxani de binni ni biseenda tidxi ca be. ¹¹ Huaxa ora rey que beeda ne biiya ca ni biseenda tidxi ca be que la?, biiya be ti nguiu cadi nacu lari xti ti guendaxheela ¹² Rey que gudxi laabe: "Xhamigua ¿xi modo guyú lu' rari sin lari xti guendaxheela pue?" Ngiu que que ñanda ninni' ¹³ Oraque rey que gudxi ca ni runi dxiña xti be: "Lagundiibi ná' ne ñee nguiu di, ne la cuubi laabe lú guelacahui, ra ziu guendaruuna ne guenda ruxhidxi laya. ¹⁴ Ti xtale binni nga ruseenda tidxi ca be, huaxa huaxie si nga ni bibí ¹⁵ Ne ora que ca fariseu guyeeca ne gulaqui cha'huica xi modo zanda guinase ca Jesús lú ca diidxa ni riní. ¹⁶ Oraque bisenda ca be ca discipulu xti ca be ne ca Herodianu ra nuu Be. Ne gudxi ca be Laabe: "Maistru, nannadu' de que dxandi Lii, ne de que ruziidi' lu neza xti Diuxi ne ni dxandi. Ne que rizaala'dxi' lu ni guini binni. ne que rului lu guni lu pur cadxi lade binni. ¹⁷ Nga runi gudxi laadu, ¿xi rini ique lu? ¿xneza nga quixe du impuestu ne César la? o co?" ¹⁸ Huaxa Jesús biene guenda nadxaba xti ca be ne gudxi laacabe: "xiñe cuquiinde tu Naa pue, binni chuppa diidxa ca? ¹⁹ La gului' Naa ti bidxichi." Ne ora que beda ne ca be ti denariu ra nuu be. ²⁰ Jesús gudxi laacabe: "Tu lú ndi' ne tu lá'? ²¹ Laacabe bicabi ca be "Xti César." Oraque Jesús gudxi laacabe: "Yanna la? la gudi César ca ni xti César ne Diuxi la? ca ni xti Diuxi." ²² Ne ora binadiaga ca be Laabe, bidxagayaa' ca be. Oraque laacabe bizaana ca be Laabe ne zee ca be. ²³ Dxi que cadxi de ca Saduceu beeda ca ra nuu Be, ca ni riní' ca gaxti guendaribani' lade gue'tu. Laacabe gunabadiidxa ca be Laabe ²⁴ na ca: "Maistru, Moises guní: Pa ti nguiu ga'ti, ne que ñapa xiiñi la?, bi'chibe naquiiñe guchaganá' xheela be ne gapa ti xiiñi xti bi'chibe." ²⁵ Raquee nuu gadxe bi'chi ca. Niru que bichaganá' ne gu'ti, ne que ñapa xiiñi. Laabe bizaana be xheela be ne bi'chi be. ²⁶ Ne guiropa bi'chi be que ngueca bizaaca, zaqueca guiona que, ne zacaa dede lu gadxe bi'chi ca be que. ²⁷ Gudiidi si guira ndi gunaa que gu'ti. ²⁸ Yanna dxi guibani ca gue'tu, ¿Tu laa de ca gadxe bi'chi ca be di gacaa xheela gunaa que ya? Ti guiraa ca be gupa ca be laabe." ²⁹ Jesús bicabi laacabe: "Laatu cadi jneza di nuu tu, Ti que runibia' di tu ca ni ca lu xqui'chi Diuxi, ninca guenda nandxo' xti Diuxi. ³⁰ Ti dxi guibani ca gue'tu que zuchaganá' ca be ne que zaca ca be guendaxheela, laga zaca ca be casi ti ángel xti guibá'. ³¹ Huaxa de guenda ribani lade gue'tu la?, ¿que huayunda tú ni maca gudxi Diuxi laatu, na: ³² "NAA NACA DIUXI XTI ABRAHAM, DIUXI XTI ISAAC NE DIUXI XTI JACOB?" Diuxi cadi naca di Diuxi xti ca gue'tu, laga xti ca ni nabani." ³³ Ora xtale binni que binadiaga ca ndi la?, laaca cadxagaya ca ni cuziidi Be. ³⁴ Huaxa ora ca Fariseu binadiaga ca de que Jesús bisigani ca Saduceu, guyú lisaa ca be tobi si. ³⁵ Tobi de laacabe, ni riene ley, gunabadiidxa Laabe ti guquiinde laabe: ³⁶ "Maistru ¿guna nga guenda runi mandar jma narooba ni nu lu ley?" ³⁷ Jesus gudxi laabe: "ZANAXHII LU DIUXI SEÑOR XTI LU NE GUIDUBI NACA LADXIDÓ' LU NE GUIDUBI NACA GUENDA XTI LU NE GUIDUBI NACA XQUENDABIA'NI LU." ³⁸ Ndi nga niru ne ni jma naroba guenda runi mandar. ³⁹ Ne guiropa guenda runi mandar naca ni casi niru que: "ZANAXHII LU NI DXAGA LU CASI CA LII". ⁴⁰ De guiropa ca ndi nga rinaze guiraa ley xti ca profeta." ⁴¹ Yana laga ca Fariseu nuu lisa ru ca,Jesús gunabadiidxa laacabe. ⁴² "¿Xi rini ique tu de Cristu? ¿tu Xiiñi Laabe?" laacabe gudxi ca be Laabe: "Xiiñi David." ⁴³ Jesus gudxi laacabe: "Yana xi modo David lu Espiritu rabi laabe Señor ya ⁴⁴ SEÑOR GUDXI SEÑOR XTINE: "GURII LADU NDIGA XTINE, DEDE NAA CUAQUE CA NI CUCAA LU LII XHA ÑEE LU' " ⁴⁵ Pa David rabi Cristu "Señor" ¿xi modo nga naca be Xiiñi David ya? ⁴⁶ Guiruti ñanda nucabi laabe nin ti diidxa, ne guiruti ru que niná ninabadiidxa ru laabe xixá dede dxi que.