¹ Bizaaca de que ora Jesus biluxe guní ca diidxa di, biree be de Galilea ne bedabe ra riluxe guidxi Judea, jmá cherica de Guiigu Jordan. ² Izaa xtale binni zinanda laabe, ne raque Laabe cusianda be laaca. ³ Ca Fariseu beeda ca ra nuu be para guquiindeca laabe, ne rabi ca laabe:"¿Ñe zanda ti hombre guilaa ne xheela guni xiixa si la?" ⁴ Jesús bicabi ne guní: "¿Laatu caaru gunda tu ra niru bizulú guira xixé, DIUXI BIZAA HOMBRE NE GUNA? ⁵ ¿Ne Laabe laca guní be: 'GUNI NDI TI HOMBRE ZUSAANA BIXHOZE NE JÑA NE ZADAAGU XHEELA, NE GUIROPA CA BE ZACA CA BE TOBI SI.'? ⁶ Ora ca' ma cadi naca ca be chupa, laga ma tobi si. Nga runi, ni Diuxi ma bitagu, cadi gudi tu guiruti guxhale". ⁷ Laacabe gudxi cabe Laabe: " pue, ¿xhi jñe Moisés BINI MANDAR LAADU DE QUE GUDI'DU TI GUI'CHI NI GUINÍ DE QUE MA GULAA TI GUENDAXHELA NE ORACA GUSENDA DU LAABE ZITU?" ⁸ Laabe rabi be laaca:"Guni guenda naguidxi ladxido' tu Moises bidii laatu guilaa né tu xheela tu, huaxa ra bizulú la? cadi zacaca di ni. ⁹ Naa cayabe laatu de que tutiica ni guilaa ne xheela, pa cadi guca ni guni guyú né be ni cadi xheela be, ne guichagana né xtobi la?, cayú né ni cadi xheela. Ne hombre ni guichagana ti guna ni ma gulaa ne xheela la?, cayú né ni cadi xheela". ¹⁰ Ca discípulu que gudxi ca Jesús: "Pa zacá nga rizaaca ti hombre ne xheela la?, cadi galan di nga guenda richagana". ¹¹ Huaxa Jesús gudxi laacabe: "Cadi de guiraa di randa guicaa cani cusiide di, laga ca ni Diuxi si ma bidii guicaa cani. ¹² Ti nuu eunucu ni gúle ca zaca dede ndani jña ca. Ne nuu xcadxi eunucu ni gúca ca eunucu guni ca hombre. Ne nuu xcadxi ni biini ca laaca laaca eunucu guni guenda runi mandar xti ca guibá'. Ni ganda guicaa ni cusiide di la?, la gudii guicaa be ni.'' ¹³ Oraque beda né cabe cadxi xcuidi ti cuaqui ná' be luguiá ca ne guiní né be Diuxi de laaca; huaxa ca discípulu cabee ca laacabe. ¹⁴ Huaxa Jesús gudxi laacabe: "Lagudii ca xcuidi gueeda ca ra Nua', ne cadi gucueza tu laacabe, ti xti cabe nga guenda runi mandar xti ca guibá'." ¹⁵ Ne Laabe gulaqui ná' be luguiá ca ne oraque biree be de ra que'. ¹⁶ Oraque beeda ti hombre ra nuu Jesús ne rabi laabe: "Maistru ¿xhi ni nacha'hui naquiñe gu'ne ti gapa guenda nabani ni que riluxe pue? ¹⁷ Jesús gudxi laabe: "¿Xi jñe canabadiidxa lu naa xinga nacha'hui? Tobi si nga nacha'hui, huaxa pa lii ruluíla'dxi lu chu'lu lu guenda nabani la?, gupa guiraa ca guenda runi mandar xti Diuxi." ¹⁸ Hombre que gudxi laabe: "¿guná ca guenda runi mandar?" Jesus gudxi laabe:"QUE ZUUTI LU; QUE ZIU NEU' NI CADI XHEELU; QUE ZABA'NA LU; QUE ZANÍ LU BIIYA LU XIXA NI CADI DXANDÍ; ¹⁹ ZÚNA LU BIXHOZE LU NE JÑA LU; ZANAXHII LU BICHI LU CASI CA LII." ²⁰ Badu ngiu' que gudxi laabe: "Ma bizuuba xtiidxa ca ndi'; ¿xi ru caquiiñe?" ²¹ Jesús gudxi laabe: "Pa lii racala'dxi lu gaca lu tobi ni que gapa nin ti ra ruché la?, guyé, bitoo ni napa lu ne bidii ni ca ni que gapa gaxti, ne zapalu' ni risáca guibá'. Oraca guda', ne dananda naa." ²² Huaxa ora badu nguiu' que binadiaga ni Jesús gudxi laabe que la?, zé be nagundu, ti laabe napa be xtale ni risaca." ²³ Jesús gudxi ca discípulu xti: "Dxandipe zabe laatu, nagana nga ti hombre ni nápa bidxichi chu ndani guenda runi mandar xti Diuxi. ²⁴ Xti tiru cayabe laatu, jmá naguenda ti camellu chu' ndani huecu xti ti aguxa, que ti nápa bidxichi chu' ndani guenda runi mandar xti Diuxi." ²⁵ Ora ca discípulu binadiaga ca ndi la?, bidxagaya' ca ne guní ca: "¿Tu laa nga zanda guilá ya? ²⁶ ''Jesús biyadxi laacabe ne guní: "binni guidxilayú la que zanda guni ndi, huaxa Diuxi zanda guni guiraa xixé ni." ²⁷ Oraque Pedru bicabi ne rabi laabe: "Biiya, laadu bisaana du guiraa xixé ti guedananda du Lii; yanna, ¿xi zapa du laadu ya? ²⁸ Jesús gudxi laacabe: "Dxandipe cayabe laatu, laatu ca ni ma bedananda tu Naa la?, lu ra gale cabe xti tiru, ora Xiiñi Dios cuí lu bangu ra chi guni mandar de guenda nandxo Xti la?, laatu laaca zabí tu lu chii ne chupa bangu de guenda runi mandar, ne zaní tu xi gaca de ca chii ne chupa nda' de ca binni zaa de Israel. ²⁹ Guiraa ca ni bisaana ca lidxi ca, ca bi'chi ca, ca bizaana ca, bixhoze ca, jña ca, xiñi' ca, o xquidxi ca gúni Naa la?, zacaa ca ti gayua tiru jmá, ne záde ca guenda nabani ni que zaluxe. ³⁰ Huaxa xtale de ca ni naca ca niru la? záca ca ni gueeda de xqui', ne xtale de ca ni zeeda de xqui' la? záca ca niru.