¹ Ne ca dxi qué, ca discípulu beeda ca ra nuu Jesús ne na ca': "¿Tu nga ni jma risáca de ndaani ra runi mandar Diuxi guibá' pue?" ² Jesús bicaa ridxi ti xcuidi ti gueeda ra nuu Be ne guluu be laa lade ca be, ³ ne na be: "Dxandi pe' cayabe laatu, pa que guchaa tu ne que gaca tu casi xcuidi huini la? nin que zanda di guiutu ndani ra runi mandar Diuxi guibá'. ⁴ Nga runi tutiIca laa que gudxiiba laa casi xcuidi huini di' la?, laa nga ni jmá risaca ndaani ra runi mandar Diuxi guibá'. ⁵ Ne tutiica laa ni guicaa ti xcuidi huini casi ndi' guni Naa la? Naa nga ca caabe. ⁶ Huaxa tutiica guuni laa guchee tobi de ca ni nahuiini ni ma runi cré Naa di la? jmá biasi nga ni liibi ti guié ro' xti mulinu yanni, ne nulaa cabe laa ra jmá guete xti nisado'. ⁷ ¡Gapa ga' si binni guidxilayú laa ca dxi de guendaruché! Ti naquiiñe ca dxii ca gueedandá ca ni; huaxa, ¡gapa ga' si tu guni laa gueeda ca dxii ca! ⁸ Pa ná' lu' o ñee lu' cucaa lii guchee lu la?, bigá' ni' ne bisá'bi ni zitu de lii. Jmá jneza nga guibani lu' cayaadxa ti chú ná' lu' o ti chu' ñee lu', que guilá lu' lu bele ni que ziu dxi guizuí ne guiroppa chu ná' lu ne guiroppa chú ñee lu'. ⁹ Pa bizalú lu' cucaa lii guchee lu la?, guxha ni' ne bisa'bi ni zitu de lii. Jma jneza nga guibani lu' ne ti chú lú lu', que guilá lu' lu bele ni que ziú dxi guizuí ne guiropa chú bizalú lu'. ¹⁰ La guuya que chi gudxii deche tu nin tobi de ca xcuidi huini di. Ti Naa zabe ca laatu de que guibá' la?, Ca angel xti Be guiraa dxi ruuya ca lú Bixhoze ni nuu guibá'. ¹¹ Ti Xiiñi Diuxi beda gulá ni ma biniti. ¹² ¿Xi rini' xpiaani lu? Pa tutica laa napa ti gayuaa dendxu, ne tobi de laacame guiníti, ¿que zusaanabe tappa late gande chii ne ga' dendxu qué ndaani currá ne niyúbi be dendxu ni biníti que la? ¹³ Ne pa laabe guidxélabe laame la?, dxandi pe' cayabe laatu zieche né be ndi jmá, que tappa late gande chii ne ga' ni que niníti que. ¹⁴ Ne laca zaca'ca, cadi zacá racaladxi Bixhoze lu' ni nuu giibá' que nin tobi de ca xcuidi huini di guiniti. ¹⁵ Pa bi'chi lu guchee ne lii la?, guyé biluí' laabe ra bi cheebe, lii ne laabe xtubi tu. Pa gucaa diagabe lii la?, ma bi'chitu xti tiru. ¹⁶ Huaxa pa que gucaa diagabe lii la?, yené xtobi o xhupa bi'chi lu', ti zaca' ni guiree rua' chuppa o chonna ni zi neu' ca la? ca diidxa ca gaca ca ni dxandí. ¹⁷ Ne pa laabe que gucaa diaga be laatu la?, gudxi ni cayaca tu di ca bi'chi lu ni nuu ndani yu'du. Ne pa que nábe gucaa diaga be ca bi'chi lu' ni nuu ndani yu'du la?, gucuaa laabe casi tobi ni que runi cré, ne casi tobi ni ruquixe impuestu. ¹⁸ De dxandí cayabe laatu, intiica ni lii gundiibi lu guidxilayú la? laaca za liibi cani guibá'. Ne intiica ni lii gundaa lu guidxilayú la? laca zaca'ca zaca ni guibá'. ¹⁹ Ne cayabe rua' laatu, pa chupa de laatu gaca tu tobisi ndani guidxilayú de intiicasi ni guinaba tu la? Bixhoze' ni nuu guibá' zudii ni laatu. ²⁰ Ti ra nuu chupa o chonna cusisaca ca Naa la?, galahui de laaca Nuaa." ²¹ Gudiidi si ngue la?, beeda Pedru ne gudxibe Jesús: "Señor, ¿Panda tiru gusiaanda xquenda ruchee bichee pa laa guchee né naa pue? ¿Gadxe tiru la?" ²² Jesús gudxi laabe: "Naa cadi cayabe lii gadxe si tiru, huaxa chonna late gande chii ne gadxe tiru." ²³ Nga runi, ra runi mandar Diuxi zeda gaca casi ti ni runi mandar ni dxiiba laapa íque, nuu quixe ca ni runi xhiiña be ni nuzaabi ca laabe. ²⁴ Ora bizulú be chi uquíxe be que la?, bedané ca be tobi ni runi xhiiña be ra nuu be, ni nuzaabi laabe chii mil bidxichi. ²⁵ Huaxa laabe que gapa be xi né quixe né be ni, xpixuaana be bidii xtiidxa guidoo be ne xheela be ne ca xiiñi be ne guiraa xixé ni napa be, ne za'qué guiaxa ni. ²⁶ Ora qué ni runi xhiiña xpixuaana que biába be ne gulaqui lucuá be neza lú xpixuaana que, ne gudxibe laa: 'Xpixuáana, guleza naa xcaadxi si, ne naa zaguíxe guiraa ni lii.' ²⁷ Ne xpixuaana be que la?, gu'pa xilase, bindaa laabe ne bixhiá ni nuzaabi be que. ²⁸ Huaxa ni runi xiiña xpixuaana que guyé be ne bidxagalú be xtobi de ca ni runi né be dxiiña, ni nuzaabi laabe ti gayuaa bidxichi. Laabe biruuxha be laa, gudié be yanni' ne gudxi be laa: 'Gudixe naa ni nuzaabi lu naa.' ²⁹ Huaxa ni runi né be dxiiña que biaba ne iza' canaba xa ñee be na": 'Guleza naa xcaadxi si, ne naa zaguixe guira xixé ni lii.' ³⁰ Huaxa niru ni runi xhiiña xpixuaana que' que niná nibeza, laga, guyé ne bisa'bi laabe ndaani lidxi guiiba, de dxi laa quixe laabe ni nuzaabi laabe que. ³¹ Ora ca xcaadxi ni runiné be dxiiña bi'ya ca' ni guca di la? nabé guyú ca nagúndu; beeda ca' ne gudxi ca' xpixuaana ca' ira ni guca que. ³² Ne ora que xpixuaana be bisenda caa laabe ne gudxi laabe: ' Ni runi dxiiña xtine, ni nadxaba, bixhiáya guiraa ni lii nuzaabi lu naa ti nabé gunabalu ni naa. ³³ ¿Cadi niquiiñe ñapalu xilase de ni runi neu dxiiña ca', casi' naa gupa xilase de lii la?' ³⁴ Xpixuaana be bidxiichi ne bidii laabe lu ná ca ni runiná binni dede dxi laabe ganda quixe be guiraa ni laabe nuzaabibe que. ³⁵ Zaca'ca Bixhoze ni dxiiba guibá' zuni né laatu, pa cadi de ladxido' to guxhiá tu ni bichee né ca bi'chi tu laatu.