¹ Ca Fariseu ne ca Saduceu beeda ra nuu Be ne biquinde ca laabe ne gunaba ca guluí be laaca ti señal de guibá'. ² Huaxa Laabe bicabi be ne guní be: "Ora ma huadxi' la?, laatu riní tu: 'Naya'ni ziuu, ti naxiñá nuu guibá'.' ³ Ne siado' la? laatu riní tu: 'Ziaba nisaguié yannadxi', ti naxiñá ne nacahui nuu guibá'. ⁴ Laatu binni de yanna ni nadxaba ne ni ruchee ne Diuxi cuyubi tu guuya tu ti guenda nandxó la?. Huaxa nin ti guenda nandxó que zuuya tu pa cadi ni biini si profeta Jonás. "Ne ora que Jesús bisaana laacabe ne zee. ⁵ Ca discipulu que yenda' ca cherica nisa, huaxa bisianda ca niné ca pan. ⁶ Jesús rabi laacabe: "La gataná ne la gapa laatu de ca levadura xti ca Fariseu ne ca Saduceu". ⁷ Ca discípulu que guní lisaa ca ne na ca: "Caní be ndi tisi que ñedané nu pan." ⁸ Jesús bicaadiaga ndi ne na: "Laatu, ca ni huaxié' runi cree, ¿xiñee caní lisaa tu ne na tu de que tisi que ñedané tu pan? ⁹ ¿Ñee caru guuya tu ne que redasilú laatu tu de ca gayu pan ni gudó gayu mil binni que, ne banda dxumi bitopa tu la? ¹⁰ ¿Nin ca gadxe pan ni gudó tapa mil binni que, ne banda dxumi bitopa tu la? ¹¹ ¿Ximodo ndi cadi cayene tu de que Naa cadi canié dia' de pan ca pue? La gataná ne la gapa laatu de ca levadura xti ca Fariseu ne ca Saduceu". ¹² Ne ora que laacabe biéne cabe de que Laabe cadi caní di be de ga'pa cabe laacabe de levadura napa pan que, laga ga'pa cabe laacabe de ca ni rusiidi ca Fariseu ne ca Saduceu. ¹³ Yanna ora Jesús yendá neza Cesárea xti Filipo la?, Laabe gunabadiidxa be ca discipulu xtibe ne na be: "¿Tuunga na binni Xiiñi Diuxi pue? ¹⁴ Laaca guní ca: "Ca'dxi la na Juan Bautista; xtu'dxi na Elías; ne xtu'dxi, Jeremías, o tobi de ca profeta". Laabe rabi be laaca: ¹⁵ "Hauxa, ¿Laatu tu na tu naca' ya?" ¹⁶ Bicabi, Simón Pedro ne na: "Lii nga Cristu, Xiiñi Diuxi ni Nabani." ¹⁷ Jesús bicabi ne rabi laabe: "Ndaaya xti Diuxi nuu né lii Simón xiiñi Jonás, ti cadi binni ne ri'ni di biluí ndi lii, laga Bixhoze ni nuu guibá'. ¹⁸ Ne laca zabe lii, de que lii nga Pedru, ne lu guié di nga zucué Yu'du xtine; ca puerta xti Guendaguti que zuxhiá di ni. ¹⁹ Naa zudié lii ca llave xti reinu xti guibá'. Intiica ni lii gundiibi lu guidxilayú la? laaca za liibi cani guibá', ne intiica ni lii gundaa lu guidxilayú la? laca zacaca zaca ni guibá'." ²⁰ Ne ora que Jesús gudxi be ca discipulu xtibe cadi naquíñe gabi di ca guiruti de que laabe nga Cristu. ²¹ Dede ca dxii que Jesús bizulú gudxi ca discípulu Xti de que Laabe naquíñe chee be Jerusalén, tiidi be xtale guendana'gaana lu ná' ca binigola ne lu ná' ca sacerdote gola ne ca ni rucaa lu gui'chi', guuticabe laabe, ne guibánibe xti tiru lu guiona gubidxa. ²² Ne ora que gulee chú Pedro laabe ne gudinde né laabe, ne na: "Zitu guixale ndi de lii, Señor, que chuu dxi izaacu ndi". 3 Huaxa Jesús bibigueta ne rabi be Pedro: ¡Biduuba de Naa, binidxaba! Lii nacu ti guié ni carenda Ñee, ti cadi cayapa diou cani xti Diuxi, laga de ca ni xti binni." ²⁴ Ne ora que rabi Jesús ca discípulu xti: "Pa tu laa napa ganna saa nanda naa la?, napa xidé gudxii deche laca laa, guicaa cruz xti, ne guedananda naa. ²⁵ Ti tu laa nuu gulá guendanabani xti la?, zuniti ni, ne tu gati pur Naa la?, zadxela guendanabani xti. ²⁶ Ti, ¿Xi zacaa binni pa gápa guirá xixé ni nuu ndaani guidxilayú pa laga cuniti guendanabani xti ya? ¿Xi zanda gudii tuuxa guni guicaa guendanabani ya? ²⁷ Ti xiiñi Diuxi zeeda lu guenda nandxó Xti bixhoze ne ca ángel Xti. NE ORA QUE LAABE ZAGUIXEBE TOBI TOBI DE CA BINNI BIA' NI BI'NI' CA. ²⁸ Dxandi'pe' gabe laatu, nuu caadxi de laatu zuhuaa tu rarí, que zuuya tu guendaguti dede que guuya tu Xiiñi Diuxi zedandá lu guenda runi mandar Xti.