¹ Ca dxi que Herodes xaique guidxi binadiaga guiraa ni bi'ni Jesús. ² Laabe gudxi be ca ni runi xhiiña be: "Ndi nga Juan el Bautista; laabe biasa be de lade gue'tu. Nga runi napa be guenda nandxó' ne cayuuni be ca ndi." ³ Ti Herodes ma gunaaze Juan; gulú be guiiba ná' ne biteguyoo be la', runi Herodías, xheela Felipe bi'chi be. ⁴ Ti Juan gudxi laabe: "Cadi xneza guicou laabe casi xheelu". ⁵ Herodes gucuá laabe casi tobi ni ma gu'ti, huaxa cadxibi be binni guidxi que, ti ca binni que napa ca laabe casi ti profeta. ⁶ Dxi bisaa Herodes iza la?, xiiñi Herodías biyaa galaa que ne Herodes guyuula'dxi ni. ⁷ Bidii xtiidxa be zudii be laa inticasi ni guinaba be. ⁸ Biluxe si de guní ne jñaa be laabe, gudxi be laa :"Gudiiu naa ndani ti bladu', ique Juan el Bautista". ⁹ Que ñu la'dxi di xaique que ni gunaba be, huaxa runi ni ma bidii xtiidxa be que, ne runi de guiraa ni cayooxhi né laabe que la?, biziguenda be gaca ni zaquee'. ¹⁰ Ne bisenda be guiaxha ique Juan ra daguyoo que. ¹¹ Ne yenee ca ique be que ndani ti bladu' ne bidii ca be ni ba'dudxapa que. ¹² Ra que ru ca discípulu xti be beeda ca, gundisa ca laabe ne bica'chi ca laabe. Guca si ndi la?, guyee ca ne gudxi ca Jesús. ¹³ Yanna ora Jesús binadiaga ndi la?, biree de ra que ne guye ra chu' xtubi. Ne ora guiraa xixé binni que binadiaga ca ndi la?, guzaa né ca Laabe de ra yenda' ca be ndani ca guidxi roo que. ¹⁴ Ra que Jesús beeda ra nuu ca be, ne biiya guiraa xixé binni que. Laabe gupa be xilase de laaca ne bisianda be ca guenda huará xti ca. ¹⁵ Bixhinni si que la?, ca discípulu que beeda ca ra nuu Be ne na ca: "Ra ti desiertu ndi, ne dxi di ma biluxe ni. Gudxi guiraa xixé ca binni di guiree ca de rari', ti chee ca ndani ca guidxi huiini ne sii ca guendaroo xti ca." ¹⁶ Huaxa Jesús gudxi laacabe: "Que caquiñe di chee ca be. Laatu la gudii ni goo ca be." ¹⁷ Laaca rabi ca Laabe: "Laadu ni napa du' nga gaayu' pan ne chuppa benda." ¹⁸ Jesús guní: "latanee ca ni naa". ¹⁹ Ne ora que Jesús gudxi be guiraa xixé binni cui ca lú guixi yaa que. Laabe gucua be gaayu' pan ne chuppa benda que. Ne gundiza lú be guibá', guluu ndaaya be ne gundaa be ca ni lú ca discípulu xti be. Ca discípulu que bidii ca ni guiraa xixé binni que. ²⁰ Guiraa xixé ca be gudoo ca be, ne bidxa tipa ndani ca be. Ne gundisa ca be ni bianna de ca guendaroo que de bidxa tipa chii ne chuppa dxu'mi. ²¹ Ca ni gudoo que la? bia' gaayu' mil nguiiu laaca, ne gudoo roo gunaa ne xcuidi. ²² Ne ora que ca bicaa be ca discípulu que quiiba ca ndani balaaga que ne saa niru ca cherica nisa que, laga que Laabe cusenda be ca binni que chee ca zitu'. ²³ Gudidisi de biseenda be guiraa xixé binni que la?, Laabe gudxiba be lú ti dani ne guní ne be Diuxi. Ora bixhinni que la?, xtubi Be nuu Be ra que. ²⁴ Huaxa balaaga que ma nuu ni galahui nisado' que, que ganda gucueza ca be ni runi xquitenisa que, ti' bi que cadxelasaa laacabe. ²⁵ Ra guidaapa nda' gueela de nexhenaa ca be Jesús zi zaa lú nisado' que de yendaa ra nuu ca be. ²⁶ Ora biiya ca discípulu que zi zaa be lu nisa que la? laaca bidxiibi ca ne na ca: "Ti bisi ndi", ne cadxiibi ca bicaa ca ridxi. ²⁷ Huaxa Jesús ora que ca guní ne laacabe ne na: "¡Lagaca nadxibalu'! ¡Naa ndi! ¡Cadi guidxiibi tu!.'' ²⁸ Ne ora que Pedro bicabi laabe ne na: "Señor, pa lii nga la? gudxi naa chindaya ra nuu lu nisa di." ²⁹ Jesús guní: "Guda'." Ora que Pedru biete de ndani' balaaga que ne guza' be lu nisa que ti chindaa be ra nuu Jesús. ³⁰ Huaxa ora Pedru biiya bi que, bidxibi. Laga zi yaazi be la?, bicaa be riidxi ne na be: ¡Señor, bilaa naa!". ³¹ Ne oraqueca Jesús bisigaa ná' ne gunaze Pedro ne gudxi be laa: "Lii ni huaxié runi cree lú, ¿xiñe que ñuni cree lú? ³² Ne ora Jesús ne Pedru gudxiba ca ndani balaaga que la? bi que ma que nundubi ³³ Ne ca discípulu dxiiba ndani balaaga que bisisaca Jesús ne na ca: "Dxandí dxandí pe' Lii nga Xiiñi Diuxi" ³⁴ Ore laacabe gudidi laaga ca be nisado' que la?, yenda' ca be ndani guidxi Genesaret. ³⁵ Ne ca binni de ra que binibia ca Jesús, ne bicheeche ca didxa ca guidxi nuu gaxha ra que, ne ora que bedanee ca ra nuu Be guiraa xixé ni huará. ³⁶ Ne canaaba ca be Laabe ne ca tinda' ñee lari nacube que caana ca, ne guiraa ni guda'na ni que la? ziyaanda ca.