¹ Ne dxi que Jesús biree de ra yoo' que ne gurí' be rua nisado'. ² Xtale binni gurí' ca Laabe, gudxiiba ca be lu ti balaaga, ne gurí' be ndaani ni. Ne guira xixe binni que biaana ca rua nisado' que. ³ Ne ra que Jesús biuí ne laacabe xtale ejemplu. Laabe gunii be: "sicarí bizaaca, ti nguiu biree zindú biní, ⁴ Laga cusaba be biní que, cadxi biidxi que biaba ca ni guriá neza, ne ca mani huini ni ripapa beeda ca ne gudó ca ni. ⁵ Xcadxi biidxi que biaba ca ni lade guie, ra huaxié nuu yú. naguenda guchendú ca ni ti luguiasi napa ca ni cadxi yú. ⁶ Huaxa ra biasa gubidxa que, laaca ni biguii ca ni ti que ñapa ca ni xcú, ne bibidxi ca ni. ⁷ Xcadxi biidxi que biaba ca ni lade yaga guichi. Ca yaga guichi que bisoo ca ni ne bitixhié ca ca ni. ⁸ Xcadxi biidxi que biaba ca ni lu layú chahui ne bidii ca ni cuananaxhi, lu tudxi biasa bia ti gayua, lu xtudxi bia chonna late gande ne chii, ne lu xtudxi que ti late gande ne chii. ⁹ Ni riene la? la gudii gucaa diaga. ¹⁰ Ca discipulu que beeda ca ne gudxi ca be Jesús: "¿Xiñee ne ejemplu riní' neu ca binni di pue? ¹¹ Jesús bicabi ne gudxi laacabe: Laatu gucuaa tu guenda risaca de guiene tu ni nagaachi xti guenda runi mandar xti Diuxi, huaxa laacabe que huacaa di ca be ní'. ¹² Ti tu tica laa napa ni la?, laa zacaa jmá, ne laa jmá zasaca. Huaxa ni que gapa ni la?, laa ziaxha ni ma napa. ¹³ Nga runi rinie'nia laacabe ne ejemplu, neca pe cayuuya ca, laaca dxandi pe que ruuya ca. Ne neca pe laaca riudiaga ca, dxandipe que riudiaga ca, ninca que riene ca. ¹⁴ Ne laacabe nga cayaca ni bicaa profeta Isaías, ra na': 'LAGA RUNADIAGU, LII ZUNADIAGA LU, HUAXA LII QUELICA PE ZIENU, LAGA CAYUUYU, LII ZUUYA LU, HUAXA LII QUELICA PE ZUNIBIALU. ¹⁵ TI LADXIDÓ' GUIDXI DI LA?, MA DEGU DIAGA CA, MA QUE RINA CA GUNADIAGA CA, NE LAACA MA BISEEGU LÚ CA, MA QUE GANDA GUUYA CA, Ó GUNADIAGA CA, Ó GUIENE CA NE LADXIDÓ' CA, NGA RUNI PA LAACA NIBIGUETA CA XTI TIRU LA?, NAA ZUSIANDA LAACA BE. ¹⁶ Huaxa laatu la guie'che, ti ma ruuya tu, ne runadiaga tu. ¹⁷ Dxandi pe Naa cayabe laatu xtale de ca profeta ne ca binni ni na cha'hui biluíla'dxi ca' ñuuya ca' ní laatu cayuuya tú, ne que ñuuya ca ní. Laaca biluíla'dxi ca ñuu diaga ca ni laatu riu diaga tu, ne que ñuu diaga ca ni'. ¹⁸ Yanna la? lagucaa diaga ejemplu xti ni ru dxiiba biní. ¹⁹ Ora tutiisi laa guna diaga diidxa xti guenda runi mandar xti Diuxi ne que riene ni la?, reeda binidxaba ne raxha ni ma biaba ndaani ladxidó' be. Ndi nga biidxi ni biaba guriá' neza . ²⁰ Ni bidxiiba cabe lade guie que la? ndiga ni runa diaga diidxa xti Diuxi ne oraqueca ricaa ni ne xtale guendanayeche'. ²¹ Laa nda' que ni caa xcú nga runi que rindá'. Ora gueeda guenda nagana o guzabinanda cabe laabe guni diidxa xti Diuxi la?, oraqueca laabe rixale be. ²² Ne ni bidxiiba cabe lade ca yaga guiichi que la?, ndi nga ni runa diaga diidxa xti Diuxi, huaxa ca guenda xizaa xti guidxilayú ne ca guenda riguite xti ca bidxichi ruti cani diidxa xti Diuxi. Laa zeda gaca casi ti yaga que gapa cuananaxhi. ²³ Ne ni bidxiiba cabe ndani layú cha'hui que la? ndinga ni runa diaga diidxa xti Diuxi ne riene ni. Ndi nga ni dxandi'pe rudii cuananaxhi ne rudxiiba ni; tuudxi bia' ti gayuaa, xtuudxi bia' chonna late gande, ne xtuudxi bia' ti late gande ne chii. ²⁴ Jesús guní nee laacabe ne xti ejemplu. Gudxi laacabe: ''Guenda runi mandar xti Diuxi de guibá' zeda gaca ni casi ti nguiu ni bidxiiba biidxi cha'hui lu layú xti. ²⁵ Laga ca binni que nisiasi ca la?, ni nanala'dxi laabe beeda ne bidxiiba baladxi lade ca trigu que ne oraque ru zee. ²⁶ Ne ora birooba ca biidxi que ne bidii ca cuananaxhi xti ca la?, ca baladxi que laca bihuini cani. ²⁷ Cani runi dxiiña xti xpixuaana layú que la?, beeda ca ne gudxi ca laabe: xpixuaana, ¿cadi biidxi cha'hui nga bidxiibu lu layú xtiu la? ¿Yanna ximodo napa ni baladxi ya? ²⁸ Laabe gudxibe laaca: 'Ti ni nanaladxi naa bi'ni ndi. Cani runi dxiiña xtibe que gudxi ca laabe: 'Yanna ya ¿racaladxu chuu du ne gadxadu cani la? ²⁹ Xpixuaana layú que na: Co', ti ora lii cue lu ca baladxi ca la?, sanda ca gaxhalu trigu ca ne laca ni. ³⁰ Bidii guirooba guiropa' ni tobizi dede dxi guiruugu cani. Dxi ma guiruugu cani naa zabe' ca ni chi guchuugu ni: Niru la cue ca baladxi ca ne la gundibi ti cha'qui cani, ne la guchaa trigu ca ndani' troja xtine.'' ³¹ Ne ora que Jesús guní ne laacabe ne xti ejemplu. Laabe guni be: ''Guenda runi mandar xti Diuxi de guibá' naca ni casi ti biidxi de mostaza ni ti nguiiu yene ne bidxiiba ni lu' layú xti. ³² Biidxi di nga naca ni jma nahuiini de lade guiraa xtudxi biidxi. Huaxa ora ma birooba ni la?, raca ni, ni jma narooba de ndani ra ruzuhua ca yaga huiini. Raca ni ti yaga, ti zacaa ca mani ripapa de guibá' gueda ca ne guni ca lidxica lu ni. ³³ Jesús oraque gudxi laacabe xti ejemplu. "Guenda runi mandar xti Diuxi de guibá' naca ni casi levadura ni ti gunaa sinee ne bigucha' be ni ne chona bia' de harina dede biasa ni.'' ³⁴ De guira ndi la? Jesús gudxi ni ca binni que ne ejemplu; ne pa cadi ne ejemplu la? Laabe que ñabi dibe laaca gaxti. ³⁵ Guca ni sicarí ti ni guní ti profeta que guedagaca ni dxandi, ora Laabe guní be: '' NAA ZAXHALE RUA NE EJEMPLU. NA ZANIE CANI GA'CHI DEDE DXI BIZULU GUIDXILAYÚ.'' ³⁶ Ne ora que Jesús bisaana be ca binni que ne biu' ndani yoo. Ca discipulu xti Be beeda ca ranu Be ne gudxica Laabe: ''Biziene laadu ejemplu de baladxi lu' layú que.'' ³⁷ Jesús bicabi' laacabe ne na: ''Ni laa rudxiiba biidxi cha'hui nga nga Xiiñi Binni Guidxilayú. ³⁸ Layú ca nga guidxilayú; ne ca biidxi cha'hui ca nga ca xiiñi guenda runi mandar xti Diuxi de guibá'. Ne ca baladxi ca la? naca ni ca xiiñi binnidxaba, ³⁹ Ne ni nanaladxi naa ni bidxiiba ca ni nga binnidxaba. Ne dxi ma guiruugu ni nga nga dxi guiluxhe guidxilayú, ne ca ni chi guchuugu ni nga nga ca ángel. ⁴⁰ Ne zacarí laga ca baladxi que gaca ca ni tobisi ne cha'qui ni, zacaa nga zaca dxi guiluxhe guidxilayú. ⁴¹ Xiiñi Bini Guidxuilayú zuzeenda ca angel Xti, ne laacabe sabee chu cabe de ndani guenda runi mandar xti Be guiraa xixé ni ruca guchee ne cabe, ne ca ni bini ca guenda que iquiiñe ⁴² Ne ora que laacabe zalaa cabe ra caya'qui, ra ziu' guenda ruuna ne zuxhidxi laya ca. ⁴³ Ne ora que ca binni ni bini xneza zuzaani ca casi gubidxa ndani ra runi mandar xti Bixhoze ca be. Cani napa diaga la?, lagudii gucadiaga. ⁴⁴ Guenda runi mandar xti Diuxi de guibá' zeda gacani casi guiiba ni nabe risaca ga'chi ndani ti layú. Ti nguiiu bidxela ni ne bica'chi ni. Lu guendanayeche' xtibe zeebe, ne bitoo guiraa ni napa, ne guzi layú que. ⁴⁵ Xti tiru, guenda runi mandar xti Diuxi nacani casi ti nguiiu ni rutoo ne cuyuubi guiee ni risaca. ⁴⁶ Ne ora bidxela be ti guie ni risaca que la?, laabe guyeebe ne bitoo be guiraa ni napa be ne guzibe ni. ⁴⁷ Xti tiru, guenda runi mandar xti Diuxi nacani casi ti chin ni rilaa ndani nisado', ne rutopani guiraa tipu benda. ⁴⁸ Ora ma dxani la?, ca ni cayuuni gu'ze que rixubi yu ca be ni dede rua nisa que. Ne ora que laacabe zuuba cabe ne ribi cabe ca ni zaquiiñe que ndani dxumi huaxa ca ni que iquiiñe que la? rusabi cabe. ⁴⁹ Zaca ni sicarí dxi guiluxe guidxilayú. Ca angel zeeda ca ne zuxhale ca be ca ni que iquiiñe lade ca ni runi xneza. ⁵⁰ Laacabe zulaa ca be laaca ra caya'qui ra ziu' guenda runna ne guenda ruxhidxi laya. ⁵¹ ¿Ma bienetu guiraa xixé ndi la? "Ca discípulu xti Be gudxica Laabe: Maa ". ⁵² Ora que Jesús gudxi laacabe: Ngue runi, guiraa ca escriba ni guca ca ti discípulu de ndani guenda runi mandar xti Diuxi guibá' nacani casi ti nguiiu ni naca xpixuaana ti yoo ni laa ribee guiraa ni nayooxho ne nacubi ni guizá risaca". ⁵³ Ne ora Jesús biluxhe ca ejemplu di la?, Laabe zeebe de ra que. ⁵⁴ Ne ora que Jesús guyu' xquidxi ne bisiidi ca binni que ndani' yudu xti ca. Ne ni bidii ni nga bidxagaya' ca ne na ca: ¿Paraa' ribee nguiiu di guenda nuu xpiani' ne ca guendanandxó' di pue? ⁵⁵ ¿Ñe cadi nguiu di nga xiñii' carpinteru que la? ¿Cadi jñaabe nga Maria la? ¿Ne cadi ca bichi be nga Santiagu, José, Simún ne Judas la? ⁵⁶ ¿Ne ca bizana be' ya?, cadi nuu ca lade nu la? Yanna ya, ¿paraa' ribee nguiiu di guiraa ndi ya?" ⁵⁷ Laaca bidxichi ne ca Labee. Huaxa Jesús gudxi lacabe: "Ti profeta que riana de gusisaca cabe la', ra que risaca be nga ndani xquiidxi be ne lade binni liidxi be." ⁵⁸ Ne Laabe' que ñuni di be xtale guenda nandxó' ra que' runi que ñuni cré cabe Laabe.