¹ Jesús gulidxi ne bini be ca chii ne chupa discipulu que tobi si ne bidii be laaca' ti guenda ti cueeca espiritu xti binidxaba', ne gusianda ca de guirá' xixé yuuba' ne guirá' xixé guenda huará. ² Yanna la?, lá ca chii ne chupa apostol que la? ndi nga laacabe: nirudo', Simún (ni laca lá Pedru), ne Andres bi'chi be, Santiagu, xiiñi Zebedeu, ne Juan bi'chi be, ³ Felipe ne Bartolomé, Tomás ne Mateu, ni ruquixe bidxichi, Santiagu xiiñi Alfeu ne Tadeu, ⁴ Simún Zelote ne Judas Isacariote, ni chi' gudxideche Laabe. ⁵ Ca chii ne chupa di Jesús biseenda laacabe. Bisiidi ne gudxi laacabe: ''Cadi cheetu ra ti'casi ra nabeza ni cadi judíu la', ne cadi guiuu tu ra ti'casi guidxi xti ca Samaritanu. ⁶ Laga, lachee ra nuu ca dendxu' ni canaguiniti xti guidxi Israel. ⁷ Ne laga zeetu la? la güí xtiidxa Diuxi ne la guiní: 'Guenda runi mandar xti Diuxi ma zeda guidxiña.' ⁸ La gusianda ni huará, la gusibani gue'tu, la gusiá ni napa lepra, ne la cuee binidxaba. Bia' ni ma gucuatu', biaca ca zudiitu'. ⁹ Cadi guicatu oro, nin plata, ninca guiiba guiu' lade bidxichi xtitu. ¹⁰ Cadi chinetu ni guiquiñe tu ra cheetu, nin lari soo, nin guelaguiidi, nin ti ndaa yaga, purti ni runi dxiña la? naquiiñe guicaa ni gó. ¹¹ Ra ticasi guidxi roo' o guidxi huini chuutu, la guyubi ni nacha'hui' ne laguiaana racaa de dxi cheetu. ¹² Laga ziyuutu ra yoo ca la?, la gugapa diuxi. ¹³ Pa nacha'hui' ca binni yoo' ca la?, lagudii guendaratadxi ladxido' xti tu ca chu' ne laacabe; huaxa pa que nacha'hui' ca binni yoo' ca la? laatu lagudi guedaratadxi ladxido' xtitu guibigueta ra nuutu. ¹⁴ Ne cani, que na cu' laatu o que na gucá diaga xtiidxa tu, ra guiree tu de ra yoo ca' o guidxi roo ca la?, laquibi yu dé nua' ñee tu. ¹⁵ Ti dxandipe' cayabe laatu dxi gusaba ná Diuxi binni guidxilayu la? jmá huaxié' nga guendananá ni gucuaa guidxi Sodoma ne Gomorra que ni gui caa guidxi di'. ¹⁶ Laguuya, Naa cuseenda laatu casi dendxu lade gueu', nga runi lagataná casi beenda ne lagaca nadó' casi guugu xtia. ¹⁷ ¡Lagapa ga' laatu ne ca' binni ca'!, ti zuchiña cabe laatu neza lú ca xaique yudu, ne ndani ca yudu huini zaguiñe cabe laatu. ¹⁸ Zuchiña cabe laatu neza lú ca xaique guidxi ne ca rey guni Naa, ne zaca' laatu zanda guiní tu de Naa neza lú cabe ne cani cadi judiu. ¹⁹ Ra guchiiña cabe laatu ca la?, cadi chu'tu xizaa de xi o ximodo guiní tu, ti zusiene Diuxi laatu xi chiguinitu ra ca'. ²⁰ Ti cadi laditu nga chi guiní tu, Espiritu xti Bixhoze tu nga chee de ruaa tu. ²¹ Ne laca ti bi'chi zudi bi'chi lu ná' guendaguti ne nuu bixhoze zudi xhiiñi ca xhiñi ca' ziasaca luguia bixhoze ca ne guni laca zati cabe. ²² Guira' zaca nana ladxi laatu' guni Naa. Huaxa tu laa guzuhuá dxi'chi de dxi la' gati la? nga nga ni zala' ²³ Ra saa nanda cabe laatu ndani guidxi roo di la'? la guxooñe' xti guidxi ni nuu gaxha, ti dxandipe cayabe laatu que zadiidi ditu ndani ca guidxi xti Israel dede que guibigueta Xiñii Diuxi. ²⁴ Tobi ni caziidi que risaca di be jmá que ni cusiidi laabe, ne ninca ti ni runi dxiña cadi dxiiba di be jmá que xpixuana be. ²⁵ Napa xidé ni caziidi ca gacabe casi ni cusiidi laabe ca, ne ni runi dxiña ca la? gaca casi xpixuana. ¡Pa ma gulé lá cabe ni cusiidi ra yoo ca, binnidxaba Belcebú, caxape cani nuu ndani lidxi Be! ²⁶ Nga runi, cadi guidxibitu lacabe, ti gaxti ni nagachi ni que zahuini, ne gaxti ni gachi que zacabia'tu. ²⁷ Ni na cayabe latu ra nacahui di la?, laguini lu biani xti dxi, ne ni guna diagatu chahuiduga, lagucheecheni ne guiraa xtipa tu de ique ca yoo ca'. ²⁸ Cadi guidxibitu' ca ni ruti ladi nu, ti que zandadi' guuticabe guenda xtinu. laga, laguidxibi Ni zanda guxuxe casi ca guenda xtinu casi ca ladi nu ndani gabia ²⁹ ¿Cadi chupa bixi'eh nga ni bidoo pur ti bidxichi huini la? Nin ne zaca, nin tobi de laaca que ziaba layú pa que ganna bixhoze ca' . ³⁰ Ti laca de guira guicha ique tu ma bigaba caní. ³¹ Cadi guidxibitu. Latu risacatu jma que ca bixi'eh ca. ³² Ngaruni, tu laa guiní de Naa neza lú binni, Naa laaca zaniee de laa neza lú Bixhoze, ni nuu guiba'; ³³ huaxa tu laa que na gaca xpine laa neza lú binni la? Naa laaca que zune xpine laa neza lu bixhoze ni nu guiba'. ³⁴ Cadi guiní ique tu Naa bedandaquedxie guidxilayú. Naa cadi beda nia guendaratadxi, laga beda gune ya'ya binni. ³⁵ Ti beda gucaa binni gucaalu bixhoze, badudxapa gucaalu jñaa, gunaa guacaalu xhualidxi laa. ³⁶ Ca ni gaca nanaladxi lii nga laaca ca binni lidxi lú'. ³⁷ Ni laa ganaxhi jma bixhoze que Naa la?, que iquiiñedi gaca xpinne'. Ne ni laa ganaxhii ca xhiiñi jma que Naa la?, que iquiiñedi gaca xpinne'. ³⁸ Ni laa que güa cruz xti ne zananda Naa la?, que iquiiñedi gaca xpinne'. ³⁹ Ni laa guyubi xquenda nabani, zuniti ni; ne tu laa guniti xquenda nabani guni Naa la?, zadxela ni. ⁴⁰ Ni laa guchaagalú laatu la?, cuchagalú Naa, ne ni laa guchagalú Naa la?, cuchagalú ni bizenda Naa. ⁴¹ Ni laa guchagalú ti profeta, ti nacabe profeta la?, ziaxa bia' riaxa ti profeta. Ni laa guchagalú ti nguiu ni runi jneza la? ziaxa bia riaxa ti nguiu ni runi jneza. ⁴² Tutiica gudii neca ti xhiga nisa ga'nda guee cani nahuiini xpinne, ti zinanda ca' Naa la?, de dxandipe zabe laatu que zandadi guiaana que guiaxa be.