¹ Palavra di Nhordes di Izersitu ben pa mi, ta fla: ² "Si ki Nhordes di Izersitu fla: N ten pa Sion txeu zelu; N ten pa el grandi zelu ki ta kema ku txeu ira! ³ Si ki Nhordes di Izersitu fla: N ta volta pa Sion y N ta vivi na meiu di Jiruzalen, pamodi Jiruzalen ta txomadu 'Sidadi di verdadi' y monti di Nhordes di Izersitu ta txomadu 'Munti Santu!' ⁴ Si ki Nhordes di Izersitu ta fla: Omi e mudjer grandi ta volta ta anda na rua di Jiruzalen, kada un ku se bengala pamodi di idadi txeu. ⁵ Rua ta fika xeiu di mininu y minina ta brinka. ⁶ Si ki Nhordes di Izersitu fla: Si keli ta parsi inposivel na odju di ristante des povu na kel dia, keli ta parse inposivel pa Nha odju? Keli e palavra di Nhordes. ⁷ Si ki Nhordes di Izersitu fla: N sta prontu pa risgata Nha povu di tera di orienti y di osidenti! ⁸ Pamodi N ta traze-s di volta y es ta vivi na meiu di Jiruzalen. Asi, es ta volta ser nha povu y N ta ser ses Deus na verdadi y na retidon! ⁹ Si ki Nhordes di Izersitu fla: Nhos, gosi, ki sa ta obi mesmu palavra ki ben di boka di prufetas kantu fundamentu di Nha kaza lansadu, nhos fortalese nhos mon pa tenplu ser konstruidu. ¹⁰ Pamodi, anti kes dia, ningen ka faze kodjeta, ka tenba lukru pa omi, nen pa animal ka da-s, pamodi inimigu, ka tenba pas pa kenha ki ta entra o sai. N poi kada un kontra se prosimu. ¹¹ Ma, gosi, ka ta ser sima na tenpu antigu. N ta sta ku restanti des povu - keli é palavra di Nhordes di Izersitu. ¹² Pamodi simenti di pas ta ser simiadu; videra ta da se frutu y tera ta da kumida; seu ta da txuba, pamodi n ta faze des povu erda tudu kuza. ¹³ Nhos era izenplu di maldison pa otus nason, kaza di Juda ku kaza di Israel. Nton, N ta risgata nhos y nhos ta ser benson. Ka nhos ten medu; nhos fortalese nhos mon! ¹⁴ Pamodi Nhordes di Izersitu fla: Si tanbe N ta planeja faze-s mal kantu nhos antipasadu provoka-N nha ira, y N ka volta trás, Nhordes di Izersitu ki fla, ¹⁵ asi tanbe N ta planeja faze dretu di nobu pa Jiruzalen y kaza di Juda! Ka nhos ten medu! ¹⁶ Kuze ki nhos debe faze: fala verdadi, kada un ku se prosimu; julga ku verdadi, justisa y pas na nhos porta; ¹⁷ ka planeja, na nhos korason, faze mal pa kunpanheru; y ka nhos ama julgamentu falsu - pamodi N ta abumina kes kuza li! Keli e palavra di Nhordes." ¹⁸ Dipos, palavra di Nhordes di Izersitu ben pa mi, ta fla: ¹⁹ "Nhordes di Izersitu fla keli: jejuns, na kuatu mes, na kintu mes, na setimu mes, y na desimu mes ta bira tenpu di jubilu, aligria, y festa spesial pa kaza di Juda! Purtantu, nhos ama verdadi ku pas! ²⁰ Asi ki Nhordes di Izersitu fla: povu ta volta mesmu kes ki ta vivi na txeu sidadi diferenti. ²¹ Moradores di un sidadi ta bai pa otu sidadi y es ta fla: ' Nu bai, faxi, inplora dianti di Nhordes y buska Nhordes di Izersitu!' ²² Txeu algen y nason puderozu ta buska Nhordes di Izersitu na Jiruzalen, y ta inplora pa favor di Nhordes! ²³ Asi ki Nhordes di Izersitu ta fla: Na kes dia, des omi di kada lingua y nason ta panha bainha di nhos tunika y es ta fla: "Dexa-nu ba ku nhos, pamodi nu obi ma Deus é ku nhos!"