¹ Kantu rei Dariu tenba guvernadu kuatu anu, na kuartu dia di mes di Kisleu (ki era nonu mes), palavra di Nhordes ben pa Zakarias. ² Povu di Bitel manda Sarezer, Rijen-Muloki y ses omi pa pidi dianti Rostu di Nhordes. ³ Es purgunta pa saserdoti ki staba na kaza di Nhordes di Izersitu y pa ses prufeta, ta fla: "Purventura, N debi txora atrabes di jijun nes kintu mes, sima N faze duranti txei anu?". ⁴ Nton, palavra di Nhordes di Izersitu ben na mi, ta fla: ⁵ "Fla pa tudu povu di tera y pa saserdoti y fla-S: 'Kantu nhos jijua y txora na kintu mes ku na setimu mes, duranti kes stenta anu li, di verdadi, nhos jijua pa mi? ⁶ Kantu es kume y bebe, nhos ka kume y bebe pa nhos mesmu? ⁷ Purventura, e ka kes mesmu palavra ki Nhordes pruklamaba na meiu di boka di prufeta antigu, kantu nhos ta moraba na Jiruzalen y na sidadi di se volta, na prusperidadi, y nhos fika xintadu na Negebe ku na munti di oesti?'". ⁸ Palavra di Nhordes ben pa Zakarias, ta fla: ⁹ "Si ki Nhordes di Izersitu fla: Nhos julga ku verdaderu justisa, konpaxon ku mizerikordia. Ki kada kenha faze keli pa se irmon. ¹⁰ Aserka di viuva ku orfon, di stanjeru, ka nhos oprimi-s, y ki ninhun di nhos ka tenta mal kontra ningen, na nhos kurason. ¹¹ Ma es nega presta atenson, es bira kosta ku temozia. Es tapa obidu pes ka obi. ¹² Ses kurason bira rixu, ki bira duru mo pedra, y es ka obi nha Lei o palavras di Nhordes di Izersitu. E tenba mandadu es mensaji pa povu, pa meiu di Se Spiritu, na tenpu antigu, pa boka di prufetas. Ma povu nega obi y Nhordes di Izersitu fika txeu xatiadu ku es. ¹³ Keli kontisi kantu E txoma, y es nega obi; di mesmu forma, Nhordes di Izersitu ki fla, es ta txoma-N, ma N ka ta obi-S. ¹⁴ N ta spadja-S sima tenpestadi pa tudu nason ki nunka es odja, y tera ta fika izoladu dipos des, di sorti ki ningen ka ta pasa pa tera, nen ka ta volta pa la, pamodi es transforma kel tera bunitu na un distruison".