¹ Nton, N volta y N labanta nhas odju, y N odja kuatu karuaji ta sai di meiu di dos munti y kes dos munti era fetu di bronzi. ² Prumeru karuaji era di kabalu burmedju, sugundu karuaji di kabalu pretu, ³ triseru karuaji di kabalu branku, y kuartu karuaji di kabalu ku pinta sinzentu. ⁴ Nton, N purgunta anju ki falaba ku mi: "Keli é kuze nha sinhor?" ⁵ Y anju ripsonde-M, ta fla: "Kes li e kes kuatu bentu di seu, ki ta sai di undi es staba, dianti di Nhordes di tudu tera. ⁶ Kel ki sta ku kabalu pretu ta bai pa tera di norti, kabalu branku ta bai pa tera di oesti; y kabalu ku pinta sinzentu ta bai pa tera di sul. ⁷ Kes kabalu forti sai ta roda tudu tera, nton anju fla-L: "Nhos bai y roda tudu tera!" Nton, es bai pa tera interu. Nton, ⁸ E txoma-M y fla-M: "Odja pa kes ki ta bai pa tera di norti; es ta intxi nha spritu di pas pa kes tera di norti." ⁹ Nton, palavra di Nhordes ben pa mi, ta fla: ¹⁰ Toma kes oferta di iziladu - di Eldai, di Tubias y di Jidaias - bai nes mesmu dia y leba pa kaza di Juzias, fidju di Zifanias, ki ben di Babilonia. ¹¹ Toma prata ku oru, y faze un kuroa y poi riba kabesa di Juzue, fidju di Juzadaki, xefi sasertodi. ¹² Fla-L, " si ki Nhordes di izersitu fla: kel omi li, ki se nomi e Ramu, ta ben kria undi ke sta, y ta idifika Tenplu di Nhordes! ¹³ E ta idifika se gloria; nton, e ta xinta y ta guverna na se tronu. E ta ser saserdoti riba se tronu, y ta ten konprenson di pas pa tudu dos kargu. ¹⁴ Un kuroa ta ser kolokadu na Tenplu di Nhordes pa onra Eldai, Tubias ku Jidaias, sima mimorial di bondadi di fidju di Zifanias. ¹⁵ Purtantu, kes ki sta lonji ta ben y ta faze Tenplu di Nhordes, y bu ta sabe ma Nhordes di izersitu ki manda-M pa nhos; keli ta kontisi ku nhos, si nhos obi vos di Sinhor nhos Deus!"