¹ Nton, anju ki falaba ku mi volta y korda-N, sima ki N staba ta durmi. ² E purgunta-M: "Kuze ku sa odja?" N risponde: "N sa odja un kau di prinda kanderu di oru masisu, ku basia se riba. Sta seti lanpada riba de-L, y seti tubu riba kada lanpada. ³ Dos olivera sta ne-L, un na ndreta, y otu na skerda." ⁴ Nton, N purgunta anju ki sa falaba ku mi: Kuze ki ta siginifika es kuza, nha Nhordes?" ⁵ Anju risponde-N: Bu ka sabi kuze ki es kuza siginifika?" N risponde: "Nou, nha Nhordes." ⁶ Nton, E fla-M: "Keli e palavra di Nhordes pa Zurubabel: Ka pa forsa nen pa puder, ma pa nha Spiritu, Nhordes di Izersitu ki fla. ⁷ Abo e kenha, grandi munti? Dianti di Zurubabel bu ta bira un planisi, y El ta poi pedra angular, ta grita 'Grasa! Grasa riba de-L!" ⁸ Palavra di Nhordes ben na mi, ta fla: ⁹ "Mon di Zurubabel fulhia fundason de-s kaza li, y ses mon ta finda-L. Nton, bu ta sabi ma Nhordes di Izersitu manda-N na bo. ¹⁰ Kenha ki dispreza dia di kuzas pikinoti? Es povu ta ben alegra y ta odja prumu di pedra na mon di Zurubabel. (Kes seti lanpada e kes seti odju di Nhordes ta todas tera.)" ¹¹ Nton, N purgunta anju: "Kuze ki kes dos olivera sta na skerda y ndreta di kau ki ta poi kanderu. ¹² N torna purgunta: "Kuze ki kes dos ramu di olivera na ladu di dos tubu di oru inborka azeti doradu?" ¹³ Nton, E purgunta-M: "Bu ka sabi keli e kuze?" N fla: Nou, na Nhordes." ¹⁴ Nton E fla-L: "Kes kuza li e dos unjidu ki sta dianti di Nhordes di tudu tera."