¹ Nton, Nhordes mostra-N Juzue, xefi saserdóti, paradu dianti anju di Sinhor, y Satanas staba sakedu na se ndreta pa akuza-L di pekadu. ² Anju di Nhordes fla Satanas: "Ki Nhordes ta reprende-U, Satanas! Kel ki skodji Jiruzalen, ta txomo-U atenson! E ka keli un faiska tradu di lumi?" ³ Juzue staba sakedu dianti di anju, y E tenba ropa suju bistidu. ⁴ Anju fla pa kes ki staba sakedu de dianti: Nhos tra-L ropa suju." Y e fla Juzue: "Odja! N poi bu injustisa pa di bo y N ta bisti-U ku ropa finu." ⁵ E fla: Dexa-s poi un turbanti linpu riba bu kabesa!" Y es poi un turbanti linpu riba kabesa di Juzue, y es bisti-L ku ropa linpu na mumentu ki anju di Nhordes, staba la, sakedu!" ⁶ Dipos, anju di Nhordes, kalmamenti, ordena Juzue, ta fla: ⁷ "Si ki Nhordes di Izersitu ta fla: Si bu anda na Nhas kaminhu, y bu guarda nhas mandamentu, bu ta guverna Nha kaza y bu ta guarda nha santuariu, pamodi N ta dexa-U ten livri entrada dentri kes ki sta li. ⁸ Obi, Juzue, xefi saserdoti, bo ku bus kunpanheru ki ta vivi ku bo! Kes omi é un sinal, pamodi Ami me N ta labanta Nha servu, kel Renovu. ⁹ Gosi, odja pa kel pedra ki N poi dianti di Juzue. Riba de-s pedra sta seti odju, y ne-L N ta graba un inskrison. Keli é diklarason di Nhordes di Izersitu, y N ta tra pekadu des tera na un dia. ¹⁰ Na kel dia, keli e diklarason di Nhordes di Izersitu, kada omi ta konvida se vizinhu pa xinta baxu di se videra y baxu se figera.