¹ N volta ta labanta nhas odju, y N odja un omi ku un fiu di midi na se mon. ² Y N fla: "Undi bu sa bai'". E responde-s: "Midi Jiruzalen, pa-N odja se kunprimentu ku se largura". ³ Nton, anju ki falaba ku mi e sai, y otu anju bai ataka-L. ⁴ Sugundu anju fla-L: "Kori y fla kel joven ki Jiruzalen ta ben mora nun tera aberta trokadu munti algen y animal. ⁵ Pamodi mi, Nhordes fla, N ta ser muru di lumi na bera de-L y N ta ser gloria na se meiu. ⁶ Nhos labanta! Nhos labanta! Nhos fuji di tera di norti, Nhordes ki fla, pamodi N spadja nhos sima kes kuatu bentudi seu, Nhordes ki fla. ⁷ Nhos labanta! Nhos fuji pa Sion, nhos ki ta vivi ku fidja di Babilonia!". ⁸ Pamodi dipos ki Nhordes onra-m y manda-m kontra kes nason ki furta-nhos, tudu algen ki toka na nhos, toka na minina di odju di Deus! Dipos di Nhordesfaze kes kuza li, E fla: ⁹ "Ami me N ta labanta Nha mon riba es y es ta bira servus di ses skravu". Y nhos ta sabi ma Nhordes di Izersitu ki manda-N. ¹⁰ "Kanta alegri, ó fidja di Sion, pamodi N sa ben akanpa djuntu bo, Nhordes ki fla. ¹¹ Nton, grandi nasons ta djunta ku Nhordes na kel dia. "Es ta ser Nha povu; purtantu, N ta akanpa djuntu ku bo", y bu ta sabi ma Nhordes di Izersitu ki manda-N na bo. ¹² Nton, Nhordesta ta ten Juda sima Se propredadi justu na Tera Santu y tanbe ta skodji Jiruzalen pa El. ¹³ Kala boka tudu karni, dianti di Nhordes, pamodi E ten labantadu di Se lugar santu!