¹ Tudu povu djunta sima un so ómi na prasa na frenti pa Porta di Águ. Es pidi ki Esdras, skriba, pa trazeba livru di Li di Muzes, ki Nhordes ordena pa Israel. ² Na prumeru dia di sétimu mes, Esdras, saserdoti, traze Lei frenti di asenbleia, ómis y mudjeris, y tudu kes ki pudeba obi ku intende. ³ E fika sakedu dianti di prasa na frenti pa Porta di Águas, y e le desdi palmanhan sedu ti meiu dia, dianti di ómis, mudjeris y di tudu kel ki pudeba intende-l. Y tudu povu obi ku atenson Livru di Lei. ⁴ Nton, Esdras, skriba, subi na un palku di madera ki povu faze ku kel obijetivu. Y ku Matitias, Sema, Anaías, Urias, Ilkias y Maazeias sakedu na se ladu ndretu, y na se ladu skerdu, Pedaías, Mizael, Malkias, Azun, Asbadana, Zakarias y Mesulon. ⁵ Esdras abri livru na odju di tudu povu, pamosi e staba mas altu ki povu, y kantu e abri, tudu povu labanta. ⁶ Esdras agradese Nhordes, grandiozu Deus, y tudu povu labanta mon y rusponde: Amen! Amen!. Nton, es inklina ses kabesa y es adora Nhordes ku rostu voltadu pa txon. ⁷ Tanbe Juzua, Bani Serebias, Jamin, Akubi, Sabetai, Odias, Maazeias, Kelita, Azarias, Jozabadi, Anan, Pelaías - kes livitas - djuda povu intende Lei, timenti povu staba na se lugar. ⁸ Es le na livru, Lei di Deus, ta interpreta-l di forma klaru, y ta splika ku xintidu pa ki es intendeba leitura. ⁹ Neemias, guvernador, y Esdras, saserdoti y skriba, y livitas ki ta interpretaba, es fla pa povu: "Es dia é santu pa Nhordes, nhos Deus. Ka nhos lamenta, nen ka nhos txora. Pamodi, tudu povu staba ta txoraba timenti es ta obiba palavras di Lei. ¹⁰ Nton, Neemias fla-s: Nhos bai, nhos kume bon karni y nhos bebe bebida doxi, y nhos manda padas pa kenha ki ka tini nada priparadu, pamodi es dia é santu pa nos Sinhor. Ka nhos fika tristi, pamodi alegria di Nhordes é nhos forsa." ¹¹ Nton, livitas faze povu fika ketu, ta fla: Nhos kalma! Pamodi es dia é santu. Ka nhos fika tristi. ¹² Nton, tudu povu bai kume, bebe, dividi kumida y selebra ku grandi alegria, pamodi es intende palavra ki es splikadu. ¹³ Na sugundu dia, líderis di familia di tudu povu, saserdotis y livitas, ben djuntu pa Esdras, skriba, pa aprende sobri palavras di Lei. ¹⁴ Y es atxa skrebedu na Lei sima Nhordes daba ordi pa meiu di Muzes, ki povu di Israel debia vive na tendas duranti festa di sétimu mes. ¹⁵ Es debia grita na tudu ses sidadi y na Jiruzalen, ta fla: Nhos bai pa muntanhas, y nhos traze ramus di olivera kultivadu, y di olivera di floresta y di murtas, y fodja di palmera y di árvi ki dá txeu fodja, pa faze tendas, sima sta skrebedu". ¹⁶ Nton, povu sai y traze ramus; y es faze pa es me tendas, kada un na se propri terasu, na ses varanda y na spasu di kaza di Deus, y na prasa di Porta di Águ, y na prasa di Porta di Ifrain. ¹⁷ Y asenbleia di kes ki volta di kativeru faze tendas y es mora na es. Pamodi, desdi dia di Juzue, fidju di Nun, ti kel dia, povu di Israel ka tenba selebradu kel festa. Purisu, alegria di povu era uma grandi. ¹⁸ Y tudu dia, desdi prumeru dia ti últimu dia, Esdras faze leitura di livru di Lei di Deus. Es selebra festa pa seti dias, y na oitavu dia kuntise un asenbleia spesial pa obedese dikretu.