¹ Na dia vinti y kuatu di kel mesmu mes, povu di Israel djunta pa un jijun bistidu di ropa di saku y t pui sinza riba ses kabesa. ² Disendentis di Israel afasta di tudu kes ki era stranjeru. Es labanta y es kunfesa ses propri pekadus y malvadeza di ses ansestral. ³ Es labanta na ses lugar, y pa un kuarta parti di dia, es le Livru di Lei di Nhordes, se Deus. Na otu kuarta parti di dia, es fika ta kunfesa y ta djondju dianti di Nhordes, se Deus. ⁴ Livitas Jezua, Bani, Kadimiel, Sebanias, Buni, Serebias, Bani y Kenani, fika sakedu na skada y es txoma ku vos uma riju pa Nhordes, se Deus. ⁵ Nton, livitas Jezua, Kadimiel, Bani, Azabineias, Serebias, Odias, Sebanias y Petaías fla: "Nhos labanta y nhos lova Nhordes, nhos Deus, pa senpri y senpri. Ki es bendiga pa Bu gluriozu nomi, y ki bu nomi ser izaltadu riba di tudu benson y lovor. ⁶ Abo é Nhordes. So Abo. Bu faze séu, kes séu mas altu, ku tudu ses izérsitus, y Tera ku tudu ki ten na el, y mar ku tudu ki ten na el. Bu da vida pa tudu y izérsitu di séu ta adora-U. ⁷ Abo é Nhordes, Deus ki skodje Abron y tra-l di Ur di kaldeus y da-l nomi di Abraon. ⁸ Bu odja ma se kurason era fiel Bu dianti y Bu faze ku el un aliansa undi Bu ta daba pa ses disendenti tera di kananeus, di eteus, di amoreus, di perizeus, di jebuzeus y di jirgazeus. Bu kunpri Bu prumesa pamodi Abo é justu. ⁹ Bu odja kasabi ki nos antipasadus sa ta pasaba na Ijitu y Bu obi se gritu djuntu di mar Brumedju. ¹⁰ Bu faze sinal ku maravilha kontra Farao y tudu kes ses servu y tudu povu di se tera, pamodi Bu sabia ki ijípisius aji ku arongansia kontra es. Ma Bu faze pa Bo me un nomi, ki ta permanese ti oji. ¹¹ Bu dividi mar ses dianti, y Bu faze-s pasa pa meiu di mar na tera seku; y bu fulha ses pirsigidoris na fundu di mar, sima un pedra na fundu di águ. ¹² Bu gia-s ku un kuluna di nuven duranti dia, y un kuluna di lumi duranti noti, pa lumia-s kaminhu pa undi es debeba bai. ¹³ Na munti Sinai Bu dixi y Bu fala ku es di séu y bu da-s dikretu justu y leis verdaderu, bon rigulamentus ku mandamentus. ¹⁴ Bu faze-s konxe Bu santu sábadu y bu da-s mandamentus, rigulamentus y leis pa meiu di Muzes, Bu servu. ¹⁵ Bu da-s pon di séu pa mata-s fomi y águ di rotxa pa mata-s sedi, y Bu fla-s pa es bai y toma posi di tera ki Bu prumete-s ku juramentu. ¹⁶ Ma es ku nos ansestral es aji ku disruspetu y es era teimozu y es ka sukuta Bus mandamentus. ¹⁷ Es rikuza sukuta y es ka lenbra di maravilha ki Bu faze na ses meiu, ma es bira teimozu, y na se rabeldia es skodje un líder pa leba-s di volta pa skravidon. Ma Abo é un Deus ki ten txeu purdon, grasa y konpaxon, bu dura ki fika xatiadu y Abo bu ten grandi bondadi. Bu ka abandona-s. ¹⁸ Mesmu kantu ki fundi un bizeru di metal y es fla: Kel-li é nhos Deus ki tra nhos di Ijitu, y es kumete grandi insultu; ¹⁹ Abo, na Bu konpaxon, Bu ka abandona-s na dizertu. Kuluna di nuven pa gia-s na kaminhu ka dexa-s duranti dia, nen kuluna di lumi duranti noti pa lumia-s kaminhu pa undi ki es debeba bai. ²⁰ Bu da bu bon Spritu pa instrui-s y Bu maná Bu nega pa ses boka, y Bu da-s águ pa mata-s sedi. ²¹ Pa kuarenta anu Bu prova-s na dizertu y nada ka falta-s. Ses ropa ka bedja y ses pe ka intxi. ²² Bu da-s reinu ku povus, y Bu distribui-s kada kantu di tera. Nton, es toma posi di tera di Sion, rei di Esbon, y tera di Ogi, rei di Bazan. ²³ Bu faze ses fidju bira txeu sima strela di séu, y Bu traze-s pa tera ki Bu fala pa ses ansestral pa entra y pusui. ²⁴ Nton, povu entra y es pusui tera y Bu dumina dianti di es moradoris di tera, ki era kananeus. Bu da-s na ses mon, ku ses rei y povus di tera, pa ki Israel pudeba faze ku es, kuze ki es kreba. ²⁵ Es toma kes sidadi forti y un tera prudutiva y es toma kazas ki staba intxidu di tudu tipu di rikezas, sisternas kobadu, vinhas y olivais y monti árvis ki ta da frutu. Nton, es kume y es fika fartu y es ingorda, y es divirti na Bu grandi bondadi. ²⁶ Sime, es bira dizobidienti y es rabela kontra Bo. Es fulha Bu Lei pa tras di ses kosta. Es mata Bus prufeta ki alerta-s pa es volta pa Bo, y es kumete grandis insultus. ²⁷ Nton, Bu intrega-s na mon di ses inimigus, ki faze-s sufri. Y na tenpu di se sufrimentu, es grita pa Bo y Bu obi-s di séu; y trokadu di Bus grandi mizerikordia Bu invia-s libertadoris ki libra-s di mon di ses inimigus. ²⁸ Ma dipos ki es diskansa, es torna faze mal di nobu dianti di Bo, y Bu abandona-s na mon di ses inimigus, nton, ses inimigus dumina-s, Ma, kantu es volta y es grita pa Bo, Bu obi-s di séu y txeu bes trokadu di Bu konpaxon, Bu resgata-s. ²⁹ Bu alerta-s pa ki es volta pa Bu Lei. Ma, es aji ku arogansia y es ka sukuta Bus mandamentus. Es peka kontra Bus dikretus ki ta da vida pa kalker un ki ta obedese-s. Es bira kosta insistentimenti y es indurese ses piskos y es rikuza obi. ³⁰ Pa txeu tenpu bu suporta-s y bu adiverti-s pa Bu Spritu pa boka di Bus prufeta. Sime, es ka sukuta. Nton, Bu intrega-s na mon di povus vizinhu. ³¹ Ma na Bu grandi mizerikordia, Bu ka distrui-s konpletamenti, nen Bu ka abandona-s, pamodi Abo é un Deus grasiozu y mizerikordiozu. ³² Gosi go nos Deus, grandi, puderozu y maravilhozu Deus, ki ta mante Se aliansa y grandi amor, ka bu dexa ki parse pikinoti pa Bo tudu es difikuldadi ki ben riba nos, di nos rei, di nos prínsipi y riba di nos saserdoti i di nos prufeta y di nos ansestral y di tudu povu desdi tenpu di reis di Asiria ti dia di oji. ³³ Abo é justu na tudu kuza ki kuntise ku nos, pamodi Abo senpri Bu aji ku fidelidadi, ma anos, nu aji ku runhesa. ³⁴ Nos rei, nos prínsipi, nos saserdoti y nos ansestral nu ka guarda Bu Lei, nen ku da atenson pa Bus mandamentus o pa dikretus di Bu aliansa ki bu uza pa Bu adivirti-s. ³⁵ Mesmu na se propri reinu, timenti es ta disfrutaba di Bu grandi bondadi ki Bu tenba ku es, na kel tera grandi y prudutiva ki Bu pui ses dianti, es ka sirbi-U y nen es ka dexa ses kaminhu mau. ³⁶ Gosi nu é skravu na tera ki Bu da pa nos ansestral pa disfruta ses frutu y ses bon prizenti, y ale-nu li, skravu na el. ³⁷ Kel grandi pruduson di nos tera ta bai pa reis ki Bu pui riba nos trokadu nos pekadu. Es ta reina riba nos korpu y riba nos limaria sima es kre. Nu sta na un grandi kasabi. ³⁸ Trokadu di tudu kel-li, nu firma un aliansa skrebedu, Na dukumentu seladu sta nomi di tudu nos prínsipi, livita y saserdoti.